ନିର୍ଭୟା ସୈତାନଙ୍କୁ ହାତ ଠାରି ଡାକୁଛି ମୃତ୍ୟୁ… ଦୋଷୀ ପବନ ଗୁପ୍ତାକୁ ‘ସୁପ୍ରିମ’ ଧକ୍କା ପରେ ଫାଶୀ ପାଇଁ ଫିଟିଲା ବାଟ
କନକ ବ୍ୟୁରୋ: ପବନକୁ ବଡ ଧକ୍କା । ନିର୍ଭୟା ଗଣଦୁଷ୍କର୍ମ ଓ ହତ୍ୟା ଘଟଣାରେ ଦୋଷୀ ସାବ୍ୟସ୍ତ ହୋଇଥିବା ପବନ କୁମାରକୁ ମିଳିଲା ନାହିଁ ଆଶ୍ୱସ୍ତି । ଘଟଣା ସମୟରେ ନାବଳକ ଥିବା ନେଇ ସୁପ୍ରିମକୋର୍ଟରେ କରିଥିବା ଆବେଦନକୁ ଖାରଜ କରିଦେଇଛନ୍ତି ସୁପ୍ରିମକୋର୍ଟ । ଏନେଇ ପବନ କୁମାରଙ୍କ ଓକିଲ ଏପି ସିଂହ ମହକିଲର ସ୍କୁଲ ଲିଭିଂ ସାର୍ଟିଫିକେଟ ଦାଖଲ କରିଥିଲେ । ଏହା ଅନୁସାରେ ଘଟଣା ସମୟରେ ପବନ କୁମାରଙ୍କ ବୟସ ୧୭ ବର୍ଷ ୧ ମାସ ୨୭ ଦିନ ଥିବା ଦାବି କରିଥିଲେ । କିନ୍ତୁ ଏହାକୁ ଗ୍ରହଣ କରି ନାହାନ୍ତି ଉଚ୍ଚତମ ନ୍ୟାୟାଳୟ ।
Kanak News is now on WhatsApp
Join and get latest news updates delivered to you via WhatsApp
୨୦୧୭ରେ ଦୋଷୀ ସାବ୍ୟସ୍ତ ହେବା ପରେ ଏହି ସାର୍ଟିଫିକେଟ ଅଣାଯିବା ନେଇ ପ୍ରଶ୍ନ କରି କାହିଁକି ମାମଲାର ଶୁଣାଣି ବେଳେ ଏହି ତଥ୍ୟ ଉପସ୍ଥାପନ କଲେ ନାହିଁ ବୋଲି କହିଥିଲେ କୋର୍ଟ । ଏହାର ଉତ୍ତରରେ ଆବଶ୍ୟକ ପଡିବା ପରେ ଏହି ତଥ୍ୟ ଅଣାଯାଇଥିବା କହିଛନ୍ତି ଏପି ସିଂହ ।
ସେପଟେ ସମାନ ଧରଣ ଦଲିଲ ତଳ କୋର୍ଟରୁ ସୁପ୍ରିମକୋର୍ଟ ପର୍ଯ୍ୟନ୍ତ ବାରମ୍ବାର ଖାରଜ ହୋଇସାରିଥିବା ବେଳେ କେବଳ ଫାଶୀକୁ ଟାଳିବା ପାଇଁ ଦୋଷୀ ଏଭଳି କାଣ୍ଡ କରୁଥିବା ଅଭିଯୋଗ କରିଛନ୍ତି ନିର୍ଭୟାଙ୍କ ବାପାମାଆ । ବର୍ତ୍ତମାନ ସ୍ଥିତିରେ ଆଇନର ବ୍ୟବସ୍ଥାକୁ ନେଇ ଦୋଷୀମାନେ ଖେଳୁଥିବା ସେମାନେ କହିଛନ୍ତି । ଆଉ ବାପାମାଆଙ୍କ ଏ ଅଭିଯୋଗ ପରେ ଦୋଷୀଙ୍କ ଉପରେ ପ୍ରଶ୍ନ ଉଠିଛି କି, ଆଇନରେ ଥିବା ସୁବିଧାକୁ ନେଇ ବାସ୍ତବରେ ଖେଳ ଖେଳୁଛନ୍ତି କି ନିର୍ଭୟା କାଣ୍ଡର ଦୋଷୀ ? ଫାଶୀକୁ ଟାଳି ପାଇଁ ଚାଲୁଥିବା ଏହି ଉଦ୍ୟମକୁ ରୋକିବା ପାଇଁ ପଦକ୍ଷେପ ନେବେ କି ସୁପ୍ରିମକୋର୍ଟ ?
ସମ୍ବିଧାନର ଧାରା ୧୪୨ ଆଧାରରେ ସୁପ୍ରିମକୋର୍ଟ ଚାହିଁଲେ ଦୋଷୀମାନଙ୍କର ବାରମ୍ବାର କରୁଥିବା ଆବେଦନ ଉପରେ ରୋକ ଲଗାଇ ପାରିବେ ବୋଲି କହିଛନ୍ତି ଆଇନଜୀବୀ । ଏନେଇ ଅତୀତରେ ନଜିର ଥିବା ବେଳେ ବ୍ୟବସ୍ଥାକୁ ଖେଳ ଘର କରିବାକୁ କାହାକୁ ସୁଯୋଗ ଦିଆଯିବ ନାହିଁ ବୋଲି ଆଶା ରଖିଛନ୍ତି ଆଇନଜୀବୀ ।
ସୁପ୍ରିମକୋର୍ଟଙ୍କ ରାୟ ପରେ ଆସନ୍ତା ଫେବୃଆରୀ ୧ ତାରିଖ ସକାଳ ୬ଟାରେ ନିର୍ଭୟାକାଣ୍ଡର ୪ ଜଣ ଦୋଷୀଙ୍କୁ ଫାଶୀ ଦେବା ପାଇଁ ବାଟ ଏକ ପ୍ରକାର ଫିଟିଛି ।