ପୁଣି ଘୁଞ୍ଚିପାରେ ନିର୍ଭୟା ଦୋଷୀଙ୍କ ଫାଶୀ ତାରିଖ । ରାଷ୍ଟ୍ରପତିଙ୍କ ପାଖରେ ରାଜକ୍ଷମା ଆବେଦନ କଲା ଦୋଷୀ ବିନୟ, ସେପଟେ କ୍ୟୁରେଟିଭ୍ ପିଟିସନ ଦାଖଲ କଲା ଅନ୍ୟତମ ଦୋଷୀ ଅକ୍ଷୟ ଠାକୁର ।
କନକ ବ୍ୟୁରୋ : ପୁଣି ଘୁଂଚିପାରେ ନିର୍ଭୟା ଦୋଷୀଙ୍କ ଫାଶୀ ତାରିଖ । ଫେବୃଆରୀ ୧ ତାରିଖରେ ନିର୍ଭୟା ଗଣଦୁଷ୍କର୍ମକାରୀଙ୍କୁ ଫାଶୀ ଦିଆଯିବା ନେଇ ବଢିଲା ଆଶଙ୍କା । ଆଜି ରାଷ୍ଟ୍ରପତିଙ୍କ ପାଖରେ ରାଜକ୍ଷମା ଆବେଦନ କରିଛି ଅନ୍ୟତମ ଅଭିଯୁକ୍ତ ବିନୟ ଶର୍ମା । ଗତ ୧୪ ତାରିଖରେ ସୁପ୍ରିମକୋର୍ଟ ବିନୟର କ୍ୟୁରେଟିଭ୍ ପିଟିସନକୁ ଖାରଜ କରିଦେଇଥିଲେ । ଆଜି ବିନୟ ପକ୍ଷରୁ ଆଇନଜୀବୀ ଏପି ସିଂ, ରାଜକ୍ଷମା ଆବେଦନ କରିଛନ୍ତି । ବିନୟ ଶର୍ମା ପକ୍ଷରୁ ରାଜକ୍ଷମା ଆବେଦନ ପରେ ବର୍ତମାନ ତିହାର ଜେଲ୍ କର୍ତୃପକ୍ଷ ତଳକୋର୍ଟକୁ ଏନେଇ ଅବଗତ କରାଇବେ ଏବଂ ଡେଥ୍ ୱାରେଂଟ୍ ଘୁଂଚାଇବାକୁ ଅନୁରୋଧ କରିବେ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଫାଶୀରୁ ବଂଚିବା ପାଇଁ ନିର୍ଭୟାକାଣ୍ଡର ଅନ୍ୟତମ ଦୋଷୀ ଅକ୍ଷୟ ସିଂହ ସୁପ୍ରିମକୋର୍ଟରେ କ୍ୟୁରେଟିଭ୍ ପିଟିସନ ଦାଖଲ କରିଛି । ଏହା ଖାରଜ ହେଲେ ସେ ମଧ୍ୟ ରାଷ୍ଟ୍ରପତିଙ୍କ ପାଖରେ ରାଜକ୍ଷମା ଆବେଦନ କରିପାରିବ । ଏହାରି ଭିତରେ କିନ୍ତୁ ଆଜି ଅନ୍ୟତମ ଅଭିଯୁକ୍ତ ମୁକେଶ ସିଂହର ଆବେଦନକୁ ଖାରଜ କରିଦେଇଥିଲେ ସୁପ୍ରିମକୋର୍ଟ । ରାଜକ୍ଷମା ନମିଳିବାରୁ ଏହାକୁ ଚ୍ୟାଲେଞ୍ଜ କରି ମୁକେଶ କରିଥିବା ଆବେଦନ ଉପରେ ଶୁଣାଣି କରି ଗତକାଲି ରାୟ ସଂରକ୍ଷିତ ରଖିଥିଲେ ଖଣ୍ଡପୀଠ । ଆଜି ଆବେଦନ ଖାରଜ ହୋଇଯାଇଛି ।
ଜାନୁଆରୀ ୧୭ରେ ମୁକେଶର ରାଜକ୍ଷମା ଆବେଦନକୁ ଖାରଜ କରିଥିଲେ ରାଷ୍ଟ୍ରପତି । ନିର୍ଭୟା ଦୋଷୀଙ୍କୁ ଫେବ୍ରୁଆରୀ ପହିଲା ସକାଳ ୬ଟା ବେଳେ ଫାଶୀ ଦେବା ପାଇଁ ନିର୍ଦ୍ଦେଶ ଦେଇଛନ୍ତି କୋର୍ଟ । ତେବେ ଦିଲ୍ଲୀ ଜେଲ୍ ମାନୁଆଲ ଅନୁସାରେ ଗୋଟିଏ ମାମଲାରେ ଏକାଧିକ ଦୋଷୀ ଥିଲେ ଏବଂ ଜଣକର ରାଜ୍ୟକ୍ଷମା ଆବେଦନ ଫଇସଲା ହୋଇନଥିଲେ ଅନ୍ୟମାନଙ୍କୁ ମଧ୍ୟ ଫାଶୀ ଦିଆଯାଇପାରିବ ନାହିଁ ।