ନିଆଳିରେ ମେଣ୍ଢା ମଡ଼କ ଘଟଣାରେ ଆସିଲା ବ୍ୟବଚ୍ଛେଦ ରିପୋର୍ଟ : ତଂଟି କଣା ପରେ ପେଟ ଚିରା ଯାଇଥିବା ରିପୋର୍ଟରେ ଉଲ୍ଲେଖ
କନକ ବ୍ୟୁରୋ : କଟକ ଜିଲ୍ଲା ନିଆଳିରେ ମେଣ୍ଢା ମଡ଼କ ଘଟଣାରେ ଆସିଛି ବ୍ୟବଚ୍ଛେଦ ରିପୋର୍ଟ । ଯେଉଁ ରିପୋର୍ଟ ମେଣ୍ଢା ମଡ଼କ ଘଟଣାର ସତ ସାମ୍ନାକୁ ଆଣିଛି । ୬ଟି ମେଣ୍ଢାର ବ୍ୟବଚ୍ଛେଦ ରିପୋର୍ଟ ବନ ବିଭାଗକୁ ପ୍ରଦାନ କରିଛି ପ୍ରାଣୀଧନ ଚିକିତ୍ସା ଅଧିକାରୀ । ରିପୋର୍ଟରେ ଯାହା ଲେଖା ରହିଛି ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିବ ନିଶ୍ଚୟ ।
Kanak News is now on WhatsApp
Join and get latest news updates delivered to you via WhatsApp
ମେଣ୍ଢା ଗୁଡିକର ତଂଟି କଣା କରି ରକ୍ତ ଶୋଷିନେବା ପରେ ପେଟ ଚିରି ଅତି ବିଭତ୍ସ ଭାବେ ହତ୍ୟା କରାଯାଉଥିବା ବ୍ୟବଚ୍ଛେଦ ରିପୋର୍ଟରେ ଉଲ୍ଲେଖ କରିଛନ୍ତି ପ୍ରାଣୀ ଚିକିତ୍ସାଧିକାରୀ । ଗତ କିଛି ଦିନ ହେବ ନିଆଳୀରେ ଗୃହପାଳିତ ମେଣ୍ଢାମାନଙ୍କୁ ବିଭତ୍ସ ହତ୍ୟା କରାଯାଉଛି । ପ୍ରତ୍ୟେକଦିନ ରାତିର ଅନ୍ଧାରରେ ମେଣ୍ଢାମାନଙ୍କୁ ତଂଟି କାଟି ହତ୍ୟା କରିବା ପରେ କେହି କଲିଜା ଖାଉଥିବା ନେଇ ଚର୍ଚ୍ଚା ଜୋର ଧରିଛି । ପ୍ରତ୍ୟେକ ଦିନ ୧୦ରୁ ୧୫ ମେଣ୍ଢାକୁ ହତ୍ୟା କରାଯାଉଛି । ଗତ ୪୫ ଦିନରେ ଏଭଳି ଘଟଣା ଯୋଗୁଁ ଶହ ଶହ ମୃତମେଣ୍ଢା ଗୁହାଳ ସମ୍ମୁଖରେ ପଡିଛନ୍ତି । ତେବେ ଏହା ପଛରେ କିଏ ତାର କାରଣ ଖୋଜି ପାଉନାହାଁନ୍ତି ଗାଁ ଲୋକେ । ଗୋଟିଏ ସ୍ଥାନରେ ମେଣ୍ଢାଗୁଡିକୁ ଏକାଠି କରି ରାତି ହେଲେ ଲୋକେ ଟର୍ଚ୍ଚ ଧରି ଗାଁ ଗଣ୍ଡାର ବଣ ବୁଦା ଖୋଜୁଥଲେ ବି ଘଟଣା ପଛରେ କିଏ ତାର ଟେର୍ ପାଉନାହାଁନ୍ତି ।
ଘଟଣା ପଛରେ ଅନ୍ଧବିଶ୍ୱାସ ନା ଅନ୍ୟ କାରଣ ରହିଛି । ସେ ନେଇ କେହି ବି କିଛି ଟେର ପାଇପାରୁନାହାଁନ୍ତି । ତେବେ ଏହି ଘଟଣାକୁ ନେଇ ସୋସିଆଲ ମିଡିଆରେ ଚର୍ଚ୍ଚା ଯୋର ଧରିଛି । ମୃତ ମେଣ୍ଢାଙ୍କ ସହ ଏକ ଅଦ୍ଭୁତ ଜନ୍ତୁର ଫଟୋ ସୋସିଆଲ ମିଡିଆରେ ଘୁରି ବୁଲୁଛି । ସେପଟେ ବନ ବିଭାଗ ପକ୍ଷରୁ ଜନ୍ତୁଟିକୁ ଧରିବା ପାଇଁ ଉଦ୍ୟମ ଆରମ୍ଭ ହୋଇଛି । ଜନ୍ତା ଭିତରେ ଏକ ମେଣ୍ଢାକୁ ବାନ୍ଧି ଜନ୍ତୁଟିକୁ କାବୁ କରିବା ପାଇଁ ଉଦ୍ୟମ କରୁଛି ବନ ବିଭାଗ ।