ଉଠୁଛି ପଡୁଛି ନିଆଳି ରାଜନୀତି ! ସଂରକ୍ଷିତ ଆସନ ପାଇଁ ଚାଲିଛି ଛକାପଞ୍ଝା, ତିନି ଦଳର ଅଙ୍କକଷା, କାହାର ଛିଣ୍ଡିବ ହିସାବ ।
କନକ ବ୍ୟୁରୋ: ଆଗାମୀ ନିର୍ବାଚନ ପାଇଁ ସବୁଠି ଚାଲିଛି କସରତ । ତେବେ ନିଆଳି ସରଂକ୍ଷିତ ବିଧାନସଭା ଆସନ ଅକ୍ତିଆର ନେଇ ସ୍ଥାନୀୟ ଅଞ୍ଚଳରେ ରାଜନୈତିକ ବାତାବରଣ ଦିନକୁ ଦିନ ଉଷ୍ମ ହଉଛି । ପ୍ରମୋଦ କୁମାର ମଲ୍ଲିକ ନିଆଳି ନିର୍ବାଚନମଣ୍ଡଳୀ ଗଠନ ହେବା ଠାରୁ ଗତ ଦୁଇ ଥର ବିଧାୟକ ଭାବେ ନିର୍ବାଚିତ ହୋଇଥିବା ବେଳେ ଏଥର ବିଜେଡ଼ିରୁ ଟିକଟ ପାଇ ହାଟ୍ରିକ୍ ବାଜିମାତ୍ ପାଇଁ ଅଣ୍ଟା ଭିଡ଼ିଛନ୍ତି । ହେଲ ପ୍ରମୋଦଙ୍କୁ ତୃତୀୟ ଥର ପାଇଁ ବିଜେଡ଼ି ଟିକେଟ୍ ପାଇବେ କି ନାହିଁ ତାକୁ ନେଇ ଚିତ୍ର ଅସ୍ପଷ୍ଟ ରହିଛି । ଅନ୍ୟପଟେ କଂଗ୍ରେସ ଓ ବିଜେପିରୁ କିଏ ମୈଦାନକୁ ଓହ୍ଲାଇବେ ତାହାକୁ ନେଇ ସସପେନ୍ସ ଜାରି ରହିଛି ।
Kanak News is now on WhatsApp
Join and get latest news updates delivered to you via WhatsApp
ନିଆଳି ନିର୍ବାଚନ ଗଠନ ହେବା ଦିନଠାରୁ ଇତିହାସକୁ ତର୍ଜମା କରାଯାଏ ତେବେ ଏହା ଅନେକ ବର୍ଷଧରି ଅଣ କଂଗ୍ରେସ ଦଳର ଦୁର୍ଗ ଭାବେ ରହି ଆସିଛି । ୨୦୦୯ରେ ଏହି ନିର୍ବାଚନ ମଣ୍ଡଳୀ ସଂରକ୍ଷିତ ହେବାପରେ କଂଗ୍ରେସ ପ୍ରାର୍ଥୀ ଆର୍ତତ୍ରାଣ ମଲ୍ଲିକଙ୍କୁ ୫୦ହଜାରରୁ ଅଧିକ ଭୋଟ୍ ବ୍ୟବଧାନରେ ହରାଇଥିଲେ ବିଜେଡ଼ି ପ୍ରାର୍ଥୀ ପ୍ରମୋଦ ମଲ୍ଲିକ । ସେହିପରି ୨୦୧୪ ମସିହାରେ ବିଜେଡି ପ୍ରାର୍ଥୀ ପ୍ରମୋଦ ମଲ୍ଲିକ, କଂଗ୍ରେସ ପ୍ରାର୍ଥୀ ଛବି ମଲ୍ଲିକଙ୍କୁ ୨୫ ହଜାରରୁ ଅଧିକ ଭୋଟ ବ୍ୟବଧାନରେ ପରାସ୍ତ କରି ଦ୍ୱିତୀୟଥର ପାଇଁ ବିଧାୟକ ହୋଇଥିଲେ । କିନ୍ତୁ ଆଗାମୀ ନିର୍ବାଚନ ପାଇଁ ବିଜେଡ଼ି ପକ୍ଷରୁ ପ୍ରମୋଦଙ୍କୁ ଟିକେଟ ମିଳିବ କି ନାହିଁ ତାହା ଏବେ ସସପେନ୍ସରେ ରହିଛି । କାରଣ ଦଳମଧ୍ୟରେ ବହୁ ବରିଷ୍ଠ ନେତାଙ୍କ ନାମ ଆଶାୟୀ ତାଲିକାରେ ଯୋଡ଼ି ହୋଇଯାଇଛି । ଏହି ରେସରେ ଆର୍ତତ୍ରାଣ ମଲ୍ଲିକ, ପୂର୍ବତନ ବିଧାୟକ ସ୍ୱର୍ଗତ କଣ୍ଡୁରୀ ଚରଣ ମଲ୍ଲିକଙ୍କ ପୁଅ ପ୍ରମୋଦ ମଲ୍ଲିକ ଓ ନିରଂଜନ ମଲ୍ଲିକଙ୍କ ନାମ ଚର୍ଚ୍ଚାରେ ରହିଛି।
ଅନ୍ୟପଟେ ବିଜେପିରେ ଯୋଗ ଦେଇଥିବା ପୂର୍ବତନ କଂଗ୍ରେସ ନେତା ଛବି ମଲ୍ଲିକ, ଶୁଶାନ୍ତ ମଲ୍ଲିକ ଓ ବେଣୁଧର ବେହେରାଙ୍କ ନାମ ଟିକେଟ୍ ପାଇବା ନେଇ ଚର୍ଚ୍ଚାରେ ରହିଛି । ଗତ ବିଧାନସଭା ନିର୍ବାଚନରେ କଂଗ୍ରେସ ୬୨ହଜାରରୁ ଅଧିକା ଭୋଟ୍ ପାଇଥିଲେ ମଧ୍ୟ ପରବର୍ତୀ ସମୟରେ କଂଗ୍ରେସ ନିଆଳିରେ ମୁରବୀ ଶୂନ୍ୟ ହୋଇପଡ଼ିଥିଲା ।
ଗତ ପଞ୍ଚାୟତ ନିର୍ବାଚନରେ କଂଗ୍ରେସର ଯୁବନେତା ଅଭିମନ୍ୟୁ ମଲ୍ଲିକ କଂଗ୍ରେସର ମଙ୍ଗଧରି ନିର୍ବାଚନ ବୈତରଣୀ ପାର କରାଇଥିଲେ । ଏପରିକି ୮/୯ଟି ପଞ୍ଚାୟତରେ କଂଗ୍ରେସ ସମର୍ଥନରେ ସରପଞ୍ଚ ଓ ସମିତି ସଭ୍ୟଙ୍କୁ ବିଜୟୀ କରାଇବାରେ ସଫଳ ହୋଇଥିଲେ । ଏବେ ନିରଂଜନ ପଟ୍ଟନାୟକ ପିସିସି ସଭାପତି ହେବା ଓ ନିଆଳିରେ ନିଜର ଦବଦବା ରଖିଥିବା ବିଜେଡ଼ି ସରକାରର ପୂର୍ବତନ ମନ୍ତ୍ରୀ ପଞ୍ଚାନନ କାନୁନଗୋ କଂଗ୍ରେସରେ ମିଶିବା ପରେ ‘ହାତ’କୁ ବଳ ମିଳିବ ବୋଲି କର୍ମୀଙ୍କ ମଧ୍ୟରେ ଉତ୍ସାହ ରହିଛି ।