ଅସହାୟଙ୍କ ଆଶା ‘କ୍ଲିନ ସିଟି’: ସମାଜ ଆଖିରେ ବୋଝ ସାଜିଥିବା ମଣିଷଙ୍କୁ ଦେବତା ଭଳି ସେବା କରନ୍ତି, ମଉଳା ଓଠରେ ହସ ଫୁଟାନ୍ତି
କନକ ବ୍ୟୁରୋ: ସେମାନେ ଘୃଣ୍ୟ ନୁହଁନ୍ତି, ଅସ୍ପୃଶ୍ୟ ନୁହଁନ୍ତି, ସମାଜ ପାଇଁ ସେମାନେ ପର ନୁହଁନ୍ତି କି ବୋଝ ବି ନୁହଁନ୍ତି । ହୁଏତ ସେମାନେ କିଛି ବୁଝି ପାରୁନାହାନ୍ତି କି କାହାରିକୁ ଜାଣି ପାରୁନାହାନ୍ତି । ହେଲେ ସବୁ ପରେ ବି ସେମାନେ ଜଣେ ଜଣେ ମଣିଷ । ଆମ ପରି ସେମାନଙ୍କ ଦେହରେ ବି ଜୀବନ ଅଛି, ସମାଜରେ ବଞ୍ଚିବାର ଅଧିକାର ଅଛି । ତେଣୁ ସେମାନଙ୍କୁ ସାହାଯ୍ୟ କରିବା ଆମର ଦାୟିତ୍ୱ… ବୋଧହୁଏ ଏଇ କଥାକୁ ଭଲଭାବେ ବୁଝି ସମାଜ ପାଇଁ ଅଦରକାରୀ ହୋଇପଡିଥିବା ମଣିଷମାନଙ୍କ ସେବା ପାଇଁ ଆଗେଇ ଆସିଛନ୍ତି ଏଇ ହୃଦୟବାନ ବ୍ୟକ୍ତିମାନେ ।
Kanak News is now on WhatsApp
Join and get latest news updates delivered to you via WhatsApp
ମାନସିକ ଅନଗ୍ରସର ବ୍ୟକ୍ତିଙ୍କ ସେବା ପାଇଁ ବ୍ରହ୍ମପୁରରୁ ଯାଇ ଗୁଣପୁରରେ ପହଞ୍ଚିଛନ୍ତି କ୍ଲିନ ସିଟି ସ୍ୱେଚ୍ଛାସେବୀ ସଙ୍ଗଠନର ସଦସ୍ୟମାନେ । ଆଉ ସେଠାରେ ପହଞ୍ଚି ରାସ୍ତା କଡରେ ବୁଲୁଥିବା, ବେସାହାରା ହୋଇ ପଡିଥିବା ୩ ଜଣ ବ୍ୟକ୍ତିଙ୍କୁ ଉଦ୍ଧାର କରିଥିଲେ । ମୁହଁରେ ବଢି ଯାଇଥିବା ଦାଢି, ମୁଣ୍ଡରେ ବଢିଯାଇଥିବା ଚୁଟି ଆଉ ହାତର ବଢିଲା ନଖକୁ କାଟି ସେମାନଙ୍କୁ ଭଲକରି ଗାଧୋଇ ଦେଇଥିଲେ । ତେବେ ସଫାସୁତୁରା କରିବା ପରେ ସେମାନଙ୍କୁ ନୂଆ ଲୁଗା ଦେଇ ପେଟେ ଖୁଆଇଥିଲେ ।
ତେବେ ମାନବ ସେବାକୁ ମାଧବ ସେବା ଭାବି ଜିଲ୍ଲା ଜିଲ୍ଲା ବୁଲି ନିରାଶ୍ରୟଙ୍କୁ ସାହାଯ୍ୟ କରୁଥିବା ଏ ଟିମ ବ୍ରହ୍ମପୁର, ଗଞ୍ଜାମ ଓ ଗଜପତିରେ କିଛି ଦିନ ହେବ ଏଭଳି ପ୍ରୟାସ କରି ଆସୁଛନ୍ତି । ଶୀତ କାକରରେ ରହୁଥିବା ଏ ଅସହାୟଙ୍କ ଦୁଃଖ ଦେଖି ସାମାଜର ସବୁ ବର୍ଗର ଲୋକେ ଆଗେଇ ଆସନ୍ତୁ ବୋଲି ଟିମ ସଦସ୍ୟମାନେ ଅନୁରୋଧ କରିଛନ୍ତି । ଯାହା ଫଳରେ ସମାଜରେ ସେମାନଙ୍କୁ କେହି ଦୂର… ଦୂର… ଖିନ ଖିନ କହିବେନି…