ରତ୍ନଭଣ୍ଡାର ଚାବିକୁ ନେଇ ନୂଆ ଟୁଇଷ୍ଟ ! ଜିଲ୍ଲା ଟ୍ରେଜେରୀର ଦସ୍ତାବିଜରେ ଯାହା ଲେଖା ଅଛି ଜାଣିଲେ ଆଶ୍ଚର୍ଯ୍ୟ ହେବେ
କନକ ବ୍ୟୁରୋ : ଶ୍ରୀମନ୍ଦିର ରତ୍ନଭଣ୍ଡାର ଚାବି ହଜିଯିବା ଯେତିକି ରହସ୍ୟ ସୃଷ୍ଟି କରିନଥିଲା ହଠାତ ଏକ ଡୁପ୍ଲିକେଟ ଚାବି ମିଳିବା ନେଇ ପୁରୀ ଜିଲ୍ଲାପାଳଙ୍କ ମନ୍ତବ୍ୟ ଥିଲା ଆହୁରି ଅଧିକ ରହସ୍ୟମୟ । ହେଲେ ଶ୍ରୀମନ୍ଦିରର ପୂର୍ବତନ ପ୍ରଶାସକ ରତ୍ନଭଣ୍ଡାରର କୌଣସି ଡୁପ୍ଲିକେଟ ଚାବି ନଥିବା କନକ ନ୍ୟୁଜକୁ ସୂଚନା ଦେଇଥିଲେ । ଆଉ ଏହି କ୍ରମରେ ସାମ୍ନାକୁ ଆସିଛି ଏକ ନୂଆ ତଥ୍ୟ । ପୁରୀ ଜିଲ୍ଲା ଟ୍ରେଜେରୀର କିଛି ଦସ୍ତାବିଜ ସ୍ପଷ୍ଟ କରୁଛି ଯେ, ଟ୍ରେଜେରୀରେ ଅରିଜିନାଲ ସହ ଡୁପ୍ଲିକେଟ ଚାବି ରହିବାର ବ୍ୟବସ୍ଥା ଅଛି । ଯାହା ଭିନ୍ନଭିନ୍ନ ଅଧିକାରୀଙ୍କ ପାଖରେ ରହିବ, ତାହାପୁଣି ଅଲଗା ସିଲ ପ୍ୟାକେଟରେ ।
Kanak News is now on WhatsApp
Join and get latest news updates delivered to you via WhatsApp
ଶ୍ରୀମନ୍ଦିର ରତ୍ନଭଣ୍ଡାର ଚାବି ହଜିଯିବାକୁ ନେଇ ତମ୍ବିତୋଫାନ ଭିତରେ ରହସ୍ୟ ବଢାଇଥିଲା ଏକ ଡୁପ୍ଲିକେଟ ଚାବି ମିଳିବା ଘଟଣା । ଆଉ ପ୍ରଶ୍ନ ଉଠିଥିଲା ଯେ, ରତ୍ନଭଣ୍ଡାରର କଣ ଡୁପ୍ଲିକେଟ ଚାବି ଥାଏ କି ? ନା ଅରିଜିନାଲ ଚାବି ହଜିଯିବା ପରେ ଏହି ଡୁପ୍ଲିକେଟ ଚାବି ତିଆରି କରାଯାଇଛି? ଯଦି ଅରିଜିନାଲ ଚାବି ହଜିଛି ତାହେଲେ ସେଥିପାଇଁ ଦାୟୀ କିଏ? ଏହିସବୁ ଅସମାହିତ ପ୍ରଶ୍ନ ଭିତରେ ରହସ୍ୟ ବଢାଇଥିଲା ପୁରୀ ଶ୍ରୀମନ୍ଦିରର ପୂର୍ବତନ ପ୍ରଶାସକଙ୍କ ବୟାନ । ରବିନ୍ଦ୍ର ନାରାୟଣ ମିଶ୍ର କନକ ନ୍ୟୁଜକୁ ସୂଚନା ଦେଇଥିଲେ ଯେ, ଡୁପ୍ଲିକେଟ ଚାବି କିଛି ନଥାଏ ।
କିନ୍ତୁ ଏହି ଆଲୋଚନାକୁ ଆଉ ଏକ ନୂଆମୋଡ଼ ଦେଇଛି ପୁରୀ ଜିଲ୍ଲା ଟ୍ରେଜେରୀର ଦସ୍ତାବିଜ । ଏଥିରେ ଲେଖାଯାଇଛି ଯେ, ପ୍ରତ୍ୟେକ ତାଲାର ଦୁଇଟି ଚାବି ଜିଲ୍ଲା ଟ୍ରେଜେରୀରେ ରଖାଯାଏ, ତାହା ପୁଣି ଅଲଗା ସିଲ ପ୍ୟାକେଟରେ । ଗୋଟିଏ ଟ୍ରେଜେରର ଓ ଅନ୍ୟଟି ସବ ଟ୍ରେଜେରି ଅଫିସରଙ୍କ ହେପାଜତରେ ଥାଏ । ଏହାବାଦ କାହାରି ପାଖରେ ଚାବି ରହିବାର ଥିଲେ ଏଥିପାଇଁ ସରକାରଙ୍କ ସ୍ୱତନ୍ତ୍ର ଅନୁମତି ଲୋଡା । ତେଣୁ ରତ୍ନଭଣ୍ଡାର ଡୁପ୍ଲିକେଟ ଚାବି ଜିଲ୍ଲା ରେକର୍ଡରୁମରୁ ମିଳିବା ବଡ ସନ୍ଦେହ ତିଆରି କରୁଛି । ଗୋଟିଏ ପଟେ ବଢିଚାଲିଛି ଦ୍ୱନ୍ଦ୍ୱ, ଅନ୍ୟପଟେ ରତ୍ନଭଣ୍ଡାର ଚାବି ପ୍ରସଙ୍ଗରେ ଜଷ୍ଟିସ ରଘୁବୀର ଦାସ କମିଶନଙ୍କ ତଦନ୍ତ ଆରମ୍ଭ ହୋଇଛି । କମିଶନ ଏସବୁ ରହସ୍ୟ ଉପରୁ ପରଦା ହଟାଇବେ ବୋଲି ଆଶା କରାଯାଉଛି ।