କନକ ବ୍ୟୁରୋ : ଆଜି ଦୋଳ ପୂର୍ଣ୍ଣିମାରେ ଉନ୍ମୋଚିତ ହୋଇଛି ନୂଆ ପଞ୍ଜିକା । ଶ୍ରୀମନ୍ଦିରରେ ମୁକ୍ତି ମଣ୍ଡପ ସେବାୟତଙ୍କ ଅନୁମୋଦନ କ୍ରମେ ବିଭିନ୍ନ ମନ୍ଦିରରେ ଏହି ପଞ୍ଜିକାକୁ ପୂଜାର୍ଚ୍ଚନା କରାଯାଇଛି । ଏପ୍ରିଲ ମାସଠାରୁ ଲାଗୁ ହେବାକୁ ଯାଉଥିବା ଏହି ପଞ୍ଜିକାରେ ଭାଗ୍ୟ ଭବିଷ୍ୟତ ନେଇ ମଧ୍ୟ ଉଲ୍ଲେଖ ରହିଛି । ଯେଉଁଥିରେ ରାଜନୈତିକ ଦଳର ଭାଗ୍ୟ ଭବିଷ୍ୟତ ଠାରୁ ଆରମ୍ଭ କରି ନେତା ଓ ଅଫିସରଙ୍କ ଭବିଷ୍ୟବାଣୀ କରିଛନ୍ତି ଗଣନାକାର । ତେବେ ଓଡିଶା ଓ ଭାରତକୁ ନେଇ କଣ କହୁଛି ଗଣନା ତାହା ଏବେ ସବୁଠାରୁ ବଡ ଚର୍ଚ୍ଚାର ବିଷୟ ପାଲଟିଛି ।
Kanak News is now on WhatsApp
Join and get latest news updates delivered to you via WhatsApp
ଆଗକୁ ସାଧାରଣ ନିର୍ବାଚନ ଥିବା ବେଳେ ପାଞ୍ଜି ଗଣନାକାର କହିଛନ୍ତି ଦେଶରେ ଆଗକୁ ରାଜନୈତିକ ଅସ୍ଥିରତା ବୃଦ୍ଧି ପାଇବ । ବିଶେଷ ଭାବେ ଦଳ ବଦଳ ରାଜନୀତି ବିଜେଡି ବିଜେପି ଓ କଂଗ୍ରେସ ପାଇଁ ଅଡୁଆ କରିବ । ସେପଟେ ରାଜନୀତିରେ ନାରୀ ନେତ୍ରୀଙ୍କ ଶକ୍ତି ବୃଦ୍ଧି ପାଇବା ନେଇ ଗଣନା ହୋଇଛି ।
ନବୀନ ଓ ଧର୍ମେନ୍ଦ୍ରଙ୍କ ଭବିଷ୍ୟତ ନେଇ ବି ଆକଳନ କରିଛନ୍ତି ଗଣନାକାର । ନବୀନଙ୍କ ପ୍ରତି ବିଶ୍ୱାସନୀୟତା ବଜାୟ ଥିବାର ଆକଳନ ହୋଇଥିବା ବେଳେ ଧର୍ମେନ୍ଦ୍ରଙ୍କ ପାଇଁ ୨୦୧୯ରେ ସୁଯୋଗ ଥିବା ଭବିଷ୍ୟବାଣୀ ହୋଇଛି । ଗଣନାକାରଙ୍କ କହିବା କଥା ଆଗକୁ କିଛି ମନ୍ତ୍ରୀ ସ୍ୱଇଚ୍ଛାରେ ନବୀନଙ୍କ ମନ୍ତ୍ରୀ ମଣ୍ଡଳ ଛାଡି ପାରନ୍ତି । ନବୀନଙ୍କ ପ୍ରତି ଲୋକଙ୍କ ବିଶ୍ୱସନୀୟତା ବଜାୟ ରହିବ । ସ୍ୱାସ୍ଥ୍ୟ କ୍ଷେତ୍ରରେ ମୁଖ୍ୟମନ୍ତ୍ରୀ କିଛି ସମସ୍ୟାକୁ ସାମ୍ନା କରିପାରନ୍ତି । ସେହିଭଳି ଧର୍ମେନ୍ଦ୍ରଙ୍କ କ୍ଷେତ୍ରରେ ଆଗକୁ ସଫଳତାର ସୁଯୋଗ ରହିଛି । ୨୦୧୮ ସେପ୍ଟେମ୍ବରରୁ ଡିସେମ୍ବର ପର୍ଯ୍ୟନ୍ତ କେନ୍ଦ୍ରମନ୍ତ୍ରୀ ଚାପରେ ରହିବେ ।
ମୋଦିଙ୍କୁ ନେଇ ଅନେକ ସମ୍ଭବନା ଥିବା ବେଳେ ବିରୋଧୀଙ୍କ ଭୂମିକା ନେଇ ବି ଭବିଷ୍ୟବାଣୀ ହୋଇଛି । ଆଗକୁ ପ୍ରଧାନମନ୍ତ୍ରୀ ବେରୋଜଗାରୀ ଦୂରୀ କରିବାରେ ସଫଳ ହେବେ । ହେଲେ ଅଫିସରଙ୍କ ଅସହଯୋଗ କେନ୍ଦ୍ର ସରକାରଙ୍କ ପାଇଁ ସମସ୍ୟା ସୃଷ୍ଟି କରିପାରେ । ସେହିଭଳି ଦେଶ ଓ ରାଜ୍ୟର ବିକାଶକୁ ନେଇ ମଧ୍ୟ ପାଞ୍ଜିଗଣନାରେ ଉଲ୍ଲେଖ ରହିଛି । ଏବେ ଦେଖି ନିଅନ୍ତୁ ଖଡିରତ୍ନ ପଞ୍ଜିକାର ଏହି ଭବିଷ୍ୟତବାଣୀ । ଚଳିତ ବର୍ଷ ଓଡିଶାରେ ଭଲ ବର୍ଷା ହେବ । କୃଷି ଉତ୍ପାଦରେ ବି ଅଭିବୃଦ୍ଧି ପରିଲକ୍ଷିତ ହେବ । ଜୁନରୁ ଡିସେମ୍ବର ମାସ ଭିତରେ ପ୍ରାକୃତିକ ବିପର୍ଯ୍ୟୟ ହୋଇପାରେ ।
ପାଞ୍ଜିଗଣନାରେ ଉଭୟ କେନ୍ଦ୍ର ଓ ରାଜ୍ୟରେ ଶାସକ ଦଳ ଭଲ ସ୍ଥିତିରେ ଥିବା କୁହାଯାଉଥିବା ବେଳେ ବିରୋଧୀ ସକ୍ରିୟ ରହିବେ ବୋଲି ଆକଳନ ହେଉଛି । ଏହା ସହିତ ଆର୍ଥିକ ଓ ସାମଜିକ କ୍ଷେତ୍ରରେ ବିକାଶର ପୂର୍ବାନୁମାନ କରାଯାଇଛି ।