ଆସିବ ନୀଳ ରଙ୍ଗର ନୂଆ ୫୦ ଟଙ୍କିଆ ନୋଟ୍ !
କନକ ବ୍ୟୁରୋ : ଗତବର୍ଷ ରିଜର୍ଭ ବ୍ୟାଙ୍କ ପ୍ରଥମ ଥର ପାଇଁ ଗୋଲାପି ରଙ୍ଗର ୨୦୦୦ ଟଙ୍କିଆ ଏବଂ ପଥୁରିଆ ଧୂସର ରଙ୍ଗର ୫୦୦ ଟଙ୍କିଆ ନୋଟ୍ ଆଣିବା ପରେ ଏବେ ନୀଳ ରଙ୍ଗର ନୂଆ ୫୦ ଟଙ୍କିଆ ନୋଟ୍ ଆଣିବାକୁ ଯାଉଛି । ନୂଆକରି ଡିଜାଇନ ହୋଇଥିବା ୫୦ ଟଙ୍କିଆ ନୋଟ୍ରେ କଳା ଧୂସର ରଙ୍ଗର ମହାତ୍ମା ଗାନ୍ଧୀଙ୍କ ଛବି ରହିବ । ଉକ୍ତ ନୋଟ୍ର ପଛ ପାର୍ଶ୍ୱରେ ଦକ୍ଷିଣ ଭାରତୀୟ ମନ୍ଦିରର ଡିଜାଇନ ରହିବ ବୋଲି ଜଣେ ବରିଷ୍ଠ ସରକାରୀ ଅଧିକାରୀଙ୍କ ସୂତ୍ରରୁ ଜଣାଯାଇଛି ।
Kanak News is now on WhatsApp
Join and get latest news updates delivered to you via WhatsApp
୨୦୧୬ ଡିସେମ୍ବରରେ ରିଜର୍ଭ ବ୍ୟାଙ୍କ କହିଥିଲା ଯେ ଖୁବ୍ ଶୀଘ୍ର ଆମେ ନୂଆ ୨୦ ଟଙ୍କିଆ ଏବଂ ୫୦ ଟଙ୍କିଆ ନୋଟ୍ ଆଣିବୁ । ତେବେ ଏବେ ପ୍ରଚଳିତ ୨୦ ଟଙ୍କିଆ ଏବଂ ୫୦ ଟଙ୍କିଆ ନୋଟ୍ ମଧ୍ୟ ବଜାରରେ ଚାଲିବ । ଉଲ୍ଲେଖନୀୟ ଯେ, ଜଣେ ନିରକ୍ଷର ବ୍ୟକ୍ତି ଯେଭଳି ବିଭିନ୍ନ ମୂଲ୍ୟର ଟଙ୍କାକୁ ସହଜରେ ଚିହ୍ନିପାରିବେ ସେଥିପାଇଁ ଟଙ୍କାର ରଙ୍ଗରେ ଭିନ୍ନତା ରଖାଯାଇଥାଏ । ଏତଦ୍ ବ୍ୟତୀତ ନୋଟ୍ର ପଛପଟେ ସାଧାରଣତଃ ଭାରତର ସଂସ୍କୃତି, ଐତିହ୍ୟକୁ ପ୍ରଦର୍ଶିତ କରୁଥିବା କିମ୍ବା ବିଜ୍ଞାନ ଓ ପ୍ରଯୁକ୍ତି କ୍ଷେତ୍ରରେ ଭାରତ ହାସଲ କରିଥିବା ଅଗ୍ରଗତିର ଛବି ଛପାଯାଇଥାଏ ।
ଉଦାହରଣ ସ୍ୱରୂପ ଗତବର୍ଷ ଅଣାଯାଇଥିବା ନୂଆ ୨୦୦୦ ଟଙ୍କିଆ ନୋଟ୍ର ପଛପଟେ ମଙ୍ଗଳାୟନ ଅଭିଯାନର ଛବି ଛପା ଯାଇଥିବାବେଳେ ୫୦୦ ଟଙ୍କିଆ ନୋଟ୍ର ପଛପଟେ ଲାଲକିଲ୍ଲାର ଛବି ରଖାଯାଇଛି । ଏବେ ଦେଶରେ ପ୍ରଚଳିତ ୫୦ ଟଙ୍କିଆ ନୋଟ୍ଟି ଗୋଲାପି ଏବଂ ବାଇଗଣୀ ରଙ୍ଗରେ ଛପାଯାଇଛି । ଉକ୍ତ ନୋଟ୍ରେ ଭାରତୀୟ ସଂସଦର ଛବି ରହିଛି । ମିଳିଥିବା ସୂଚନା ଅନୁଯାୟୀ ନୂଆକରି ଆସିବାକୁ ଥିବା ୫୦ ଟଙ୍କିଆ ନୋଟ୍ ଦେଶରେ ରିଜର୍ଭ ବ୍ୟାଙ୍କର କେତୋଟି ଚେଷ୍ଟରେ ପହଞ୍ଚି ସାରିଲାଣି ।