ସାଇକେଲରେ ୮୦ କିଲୋମିଟର ବୁଲି ଚର୍ଚ୍ଚାରେ ନୟାଗଡ଼ ଜିଲ୍ଲାପାଳ ! ସରକାରୀ ଯୋଜନାର ବାସ୍ତବତା କଲେ ଯାଂଚ୍, ବାକିଥିବା କାର୍ଯ୍ୟ ସାରିବାକୁ ଅଧିକାରୀଙ୍କୁ କଡ଼ା ନିର୍ଦ୍ଦେଶ
କନକ ବ୍ୟୁରୋ: ଜିଲ୍ଲାର ସର୍ବୋଚ୍ଚ ଅଧିକାରୀ । ହାତ ପାଆନ୍ତାରେ ସବୁ ସୁବିଧା । ଯାତାୟତ ପାଇଁ ସରକାର ଦେଇଛନ୍ତି ଦାମୀ ଗାଡି । ହେଲେ ସାଇକେଲରେ ୮୦ କିଲୋମିଟର ବୁଲି ଚର୍ଚ୍ଚାକୁ ଆସିଛନ୍ତି ଜିଲ୍ଲାପାଳ । ନୟାଗଡ଼ ଜିଲ୍ଲାପାଳ ସାଇକେଲର ବିଭିନ୍ନ ଅଂଚଳ ବୁଲି ଲୋକଙ୍କ ସମସ୍ୟା ବୁଝିଛନ୍ତି । ଜିଲ୍ଲାପାଳ ଅରିନ୍ଦମ ଡାକୁଆ ଗୁରୁବାର ଦିନ କାହାକୁ କିଛି ନଜଣାଇ ସାଇକେଲ ଧରି ଜିଲା ଭ୍ରମଣରେ ବାହାରିଥିଲେ । ସକାଳ ସାଢେ ୬ଟାରୁ ସାଇକେଲରେ ଯାତ୍ରା ଆରମ୍ଭ କରି ଜିଲ୍ଲାର ସମସ୍ୟା ବାବଦରେ ଲୋକଙ୍କଠାରୁ ପଚାରି ବୁଝିଥିଲେ ଜିଲ୍ଲାପାଳ । ଜିଲ୍ଲାପାଳ ଯେ, ସାଇକେଲ ଚଳାଇ ଯାଉଛନ୍ତି ସେଥିପ୍ରତି କାହାର ନିଘା ବି ନଥିଲା । ନୟାଗଡ଼ର ଓଡଗାଁରୁ ୧୩ କିଲୋମିଟର ଶରଣକୁଳ ପହଂଚିବା ପରେ ପ୍ରଘଟ ହୋଇଥିଲା କଥା ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ସରକାରୀ ଯୋଜନାର କାର୍ଯ୍ୟକାରୀତା ସଂପର୍କରେ ଜାଣିବା ପାଇଁ ଏହା ଏକ ଅଭିନବ ଉପାୟ ବୋଲି ଜିଲ୍ଲାପାଳ କହିଛନ୍ତି । ପ୍ରାୟ ୮୦ କିଲୋମିଟର ବାଟ ଅତିକ୍ରମ କରି ସରକାରୀ ଯୋଜନାର ଅବ୍ୟବସ୍ଥାର ବାସ୍ତବତା ଦେଖିଥିଲେ । ସ୍ୱଚ୍ଛ ଭାରତ ମିଶନର ବିଫଳତା ସାଙ୍ଗକୁ ପାନୀୟ ଜଳର ବ୍ୟାପକ ଦୁରୁପଯୋଗ ଜିଲ୍ଲାପାଳଙ୍କ ନଜରକୁ ଆସିଥିଲା । ଏହାସହ ଶରଣକୁଳ ନୟାଗଡ଼ ରାସ୍ତା ମରାମତିରେ ଅହେତୁକ ବିଳମ୍ବ ଦେଖି ପଦକ୍ଷେପ ନେଇଛନ୍ତି ଜିଲ୍ଲାପାଳ ଅରିନ୍ଦମ ଡାକୁଆ । ସଂପୃକ୍ତ ବିଭାଗୀୟ ଅଧିକାରୀମାନଙ୍କୁ କାର୍ଯ୍ୟ ସଂପୁର୍ଣ୍ଣ କରିବାକୁ ନିର୍ଦ୍ଦେଶ ଦେଇଛନ୍ତି ।
ସୂଚନା ମୁତାବକ, ଗୁରୁବାର ଦିନ କାହାକୁ କିଛି ନ ଜଣାଇ ପୁରା ବ୍ୟକ୍ତିଗତ ଭାବରେ ସାଇକେଲ ଧରି ଜିଲ୍ଲାପାଳ ବାହାରିଥିଲେ ଭ୍ରମଣରେ । ସକାଳ ସାଢେ ୬ ରୁ ଆରମ୍ଭ କରିଥିଲେ ଯାତ୍ରା । ୧୧ କିଲୋମିଟର ମହିପୁର ପରେ ନୂଅଗାଁ ୨୧ କିଲୋମିଟର । ସେଠାରୁ ବରକୋଳା ଦେଇ ୧୭ କିଲୋମିଟର ପରେ ବାହାଡାଝୋଲା ଆଉ ୧୨ କିଲୋମିଟର ପରେ ଓଡଗାଁ । ସାଧାରଣ ଲୋକ ଭଳି ରାସ୍ତାରେ ଚାଲିଥାଏ ତାଙ୍କ ଭ୍ରମଣ । ଜିଲ୍ଲାପାଳ ଯେ ସାଇକେଲ ଚଳାଇ ଯାଉଛନ୍ତି ସେଥିପ୍ରତି କାହାର ନିଘା ବି ନଥିଲା । କେହି ବି ଭାବୁ ନଥିଲେ ଇଏ ଜିଲ୍ଲାପାଳ ନୁହଁନ୍ତି ତ ? ଓଡଗାଁରୁ ୧୩ କିଲୋମିଟର ଶରଣକୁଳ ପହଂଚିବା ପରେ ପ୍ରଘଟ ହୋଇଥିଲା କଥା ।
ଜିଲ୍ଲାପାଳଙ୍କୁ ଚିହ୍ନିଥିବା ଜଣେ ଫଟୋଗ୍ରାଫର ରାସ୍ତାରେ ସାଇକେଲ ଚଳାଇ ଯାଉଥିବା ଦେଖିଦେଇଥିଲେ ଆଉ ନିଜ କ୍ୟାମେରାରେ ଜିଲ୍ଲାପାଳଙ୍କ ଯାତ୍ରାର ଦୃଶ୍ୟକୁ କ୍ୟାପଚର କରିଥିଲେ । ହେଲେ ଜିଲ୍ଲାପାଳ କହିଲେ ନିଜକୁ ଫିଟ ରଖିବା ପାଇଁ ଆପଣାଇଛନ୍ତି ଏଭଳି ଫଣ୍ଡା । ଆଗରୁ କିଛି ବାଟ ସାଇକେଲରେ ଯାଉଥିବା ବେଳେ ଛୁଟିଦିନ ଯୋଗୁଁ ଆପଣାଇଦେଲେ ଲମ୍ବା ରେସ୍ । ଆଉ ବିଭିନ୍ନ ସରକାରୀ ଯୋଜନାର କାର୍ଯ୍ୟକାରୀତା ସଂପର୍କରେ ଜାଣିବା ପାଇଁ ଏହା ମଧ୍ୟ ଏକ ଅଭିନବ ଉପାୟ ବୋଲି କହିଛନ୍ତି ଜିଲ୍ଲାପାଳ ।
ଦିନ ସାଢେ ଦଶଟା ବେଳକୁ ୭୬ କିଲୋମିଟର ବାଟ ଅତିକ୍ରମ କରି ନିଜ କ୍ୱାର୍ଟରରେ ପହଂଚିଥିଲେ ଜିଲ୍ଲାପାଳ । ହେଲେ ପୁରା ଗସ୍ତରେ ଦେଖିଥିଲେ କିଛି ଅବ୍ୟବସ୍ଥାର ବାସ୍ତବତା । ସ୍ୱଚ୍ଛ ଭାରତ ମିଶନର ବିଫଳତା ସାଙ୍ଗକୁ ପାନୀୟ ଜଳର ବ୍ୟାପକ ଦୁରୁପଯୋଗ । ତା ସହ ଶରଣକୁଳ ନୟାଗଡ ରାସ୍ତା ମରାମତିରେ ଅହେତୁକ ବିଳମ୍ବ । ଏସବୁ ତୃଟି ବିଚ୍ୟୁତି ଲକ୍ଷ କରିବା ପରେ ଏ ନେଇ ନେଇଛନ୍ତି ଆବଶ୍ୟକୀୟ ପଦକ୍ଷେପ । ସଂପୃକ୍ତ ବିଭାଗମାନଙ୍କୁ ଦେଇଛନ୍ତି କଡା ନିର୍ଦ୍ଦେଶ ।
ତେବେ ପୂର୍ବରୁ ମଧ୍ୟ ବିଭିନ୍ନ ସମୟରେ କ୍ରିକେଟ ଖେଳି ନିଜକୁ ଫିଟ ରଖୁଥିବା ଜିଲ୍ଲାପାଳ ଏବେ ସାଇକେଲ ଚାଳନାକୁ ଫିଟ୍ ରହିବାର ଫଣ୍ଡା ବୋଲି କହିଛନ୍ତି । ହେଲେ ଜିଲ୍ଲାପାଳଙ୍କ ଏମିତି ଆଶ୍ଚର୍ଯ୍ୟ କଲାଭଳି ପଦକ୍ଷେପ ସରକାରୀ କର୍ମଚାରୀଙ୍କୁ ଛାନିଆ କରିଛି ।