କନକ ବ୍ୟୁରୋ : ନୟାଗଡ଼ ଅସ୍ତ୍ରାଗାର ଲୁଟ୍ ଅଭିଯୋଗରେ ଗିରଫ ହୋଇ ଦୀର୍ଘ ୯ବର୍ଷ କାଳ ଜେଲର ଅନ୍ଧାର କୋଠରୀରେ ରହିବା ପରେ ନିର୍ଦ୍ଦୋଷରେ ଖଲାସ ହୋଇଛନ୍ତି ଏହି ୪୧ ବର୍ଷୀୟ ବ୍ୟକ୍ତି । ସାକ୍ଷ୍ୟ ପ୍ରମାଣ ଅଭାବରୁ ତାଙ୍କୁ ନିର୍ଦ୍ଦୋଷରେ ଖଲାସ୍ କରିଛନ୍ତି ନୟାଗଡ଼ ଜିଲ୍ଲା ଦୌରା ଜଜଙ୍କ କୋର୍ଟ । ୨୦୦୮ ଫେବ୍ରୁଆରୀ ୧୫ ତାରିଖ ନୟାଗଡ଼ ଥାନା ଆକ୍ରମଣ ଓ ଅସ୍ତ୍ରାଗାର ଲୁଟ୍ ମାମଲାରେ ଗିରଫ ୮ଜଣ ମାଓବାଦୀଙ୍କୁ କୋର୍ଟ ଦୋଷମୁକ୍ତ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
୨୦୦୮ ନୟାଗଡ଼ ଥାନା ଆକ୍ରମଣରେ ୧୩ ପୋଲିସ କର୍ମଚାରୀଙ୍କ ଜୀବନ ଯିବା ପରେ ରକ୍ତ ଚାଉଳ ଚୋବାଉଥିଲା ପୋଲିସ୍ । ଚାରିଆଡେ ଖୋଜୁଥିଲା ମାଓବାଦୀ ଓ ତାଙ୍କୁ ସହାୟତା କରିଥିବା ବ୍ୟକ୍ତିଙ୍କୁ । ଏପଟେ କାମଧନ୍ଦା ଅନ୍ୱେଷଣରେ ପଶ୍ଚିମବଙ୍ଗ ହାୱଡାରୁ ଭୁବନେଶ୍ୱର ଆସିଥିଲେ ରଞ୍ଜିତ । କିଛିଦିନ ରହିବା ପରେ ପଶ୍ଚିମବଙ୍ଗର ନୟାଚୌକ ଫେରିଯିବାକୁ ନିଷ୍ପତ୍ତି ନେଇଥିଲେ ଏବଂ ଭୁଲ ବଶତଃ ଭୁବନେଶ୍ୱର ବସଷ୍ଟାଣ୍ଡରୁ ନୟାଗଡ଼ ବସରେ ବସିଗଲେ ଏବଂ ନୟାଗଡ଼ରେ ମାଓବାଦୀ ଆକ୍ରମଣ ପରେ ତନାଘନା ଚଳାଇଥିବା ପୋଲିସ୍ ହାତରେ ପଡିଗଲେ ରଞ୍ଜିତ । ବଙ୍ଗଳା ଛଡା ଆଉକିଛି କହିପାରୁ ନଥିବାରୁ ତାଙ୍କୁ ସନ୍ଦେହରେ ଧରି ନେଇ ଜେଲ ହାଜତରେ ପୂରାଇ ଦେଲା ନୟାଗଡ଼ ପୋଲିସ୍ ।
ହଠାତ ପୁଅକୁ ମାଓବାଦୀ କହି ପୋଲିସ ଗିରଫ କରିଦେବା ପରେ କିଛି ବୁଝି ପାରିଲେ ନାହିଁ ପରିବାର ଲୋକ । ଓଡିଶା ଆସିଲେ, ପୋଲିସକୁ ଜଣାଇବାକୁ ଚାହିଁଲେ କିନ୍ତୁ କିଛି ଫଳ ମିଳିଲା ନାହିଁ । ଆଉ ଏହିପରି ବିତିଗଲା ୯ବର୍ଷ । ତେବେ ପ୍ରଶ୍ନ ଉଠୁଛି- ୧- ନିରୀହ ରଞ୍ଜିତ ସାନାଙ୍କ ଏହି ଦୁର୍ଦ୍ଦଶା ପାଇଁ ଦାୟୀ କିଏ? ୨- ଜେଲରେ କଟାଇଥିବା ଜୀବନର ମୂଲ୍ୟବାନ ୯ବର୍ଷ କିଏ ଫେରାଇଦେବ? ୩- ବିନା ପ୍ରମାଣରେ ଜଣେ ଯୁବକଙ୍କୁ ମାଓବାଦୀ ସଜାଇ ଦିଆଗଲା କାହିଁକି? ୪- ଏଥିପାଇଁ ଆମର ବିଚାର ବ୍ୟବସ୍ଥା ଦାୟୀ ନୁହେଁ କି?