ବାତ୍ୟା ପ୍ରଭାବିତ ଅଞ୍ଚଳ ଭଞ୍ଜନଗର ଓ ବାରଘର ନିଜେ ଯିବେ ମୁଖ୍ୟମନ୍ତ୍ରୀ । କ୍ଷତିଗ୍ରସ୍ତ ପରିବାର ଲୋକଙ୍କ ସହ କଥା ହେବେ, କ୍ଷୟକ୍ଷତିର ସମୀକ୍ଷା କରିବେ
କନକ ବ୍ୟୁରୋ : ଆସନ୍ତାକାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗଜପତି ଓ ଗଞ୍ଜାମ ଜିଲ୍ଲା ଗସ୍ତ କରିବେ। ନବୀନ ଗଜପତି ଜିଲ୍ଲାର ଗଙ୍ଗାବାଡ଼ ପଞ୍ଚାୟତର ବାରଘର ଓ ଭଞ୍ଜନଗର ଯାଇ ଲୋକଙ୍କୁ ଭେଟିବାର କାର୍ୟ୍ୟକ୍ରମ ରହିଛି। ଭଞ୍ଜନଗରରେ ମୁଖ୍ୟମନ୍ତ୍ରୀ ନବୀନ ବିଗତ ଦିନରେ ଦେଖାଯାଇଥିବା ଭୟଙ୍କର ବନ୍ୟାରେ ହୋଇଥିବା କ୍ଷୟକ୍ଷତି ଆକଳନ ସଂପର୍କୀତ ସମୀକ୍ଷା କରିବେ ଓ ବାରଘରରେ ଲୋକଙ୍କ ସମସ୍ୟା ପଚାରି ବୁଝିବାର କାର୍ଯ୍ୟକ୍ରମ ରହିଛି ।
Kanak News is now on WhatsApp
Join and get latest news updates delivered to you via WhatsApp
ନବୀନଙ୍କ ଗସ୍ତ ପୂର୍ବରୁ ତିତଲି ମୃତ୍ୟୁକୁ ନେଇ ବିବାଦ ମଧ୍ୟରେ ଆଜି ସରକାର ସ୍ପଷ୍ଟ କରିଛନ୍ତି, ବାତ୍ୟା ତିତଲି ପ୍ରଭାବରେ ରାଜ୍ୟର ବିଭିନ୍ନ ଜିଲ୍ଲାରେ ୨୬ ଜଣ ପ୍ରାଣ ହରାଇଛନ୍ତି । କେବଳ ଗଜପତି ଜିଲ୍ଲାରେ ୧୮ ଜଣଙ୍କ ମୃତ୍ୟୁ ହୋଇଛି । ଆଉ ମୃତ୍ୟୁ ଖବର ଆସିଲେ ସଂପୃକ୍ତ ଜିଲ୍ଲାର ଅଧିକାରୀଙ୍କ ଦ୍ୱାରା ତଦନ୍ତ କରାଯାଉଛି । ବାତ୍ୟା ଓ ପରବର୍ତୀ ବନ୍ୟାରେ ୫୭ ଲକ୍ଷ ପ୍ରଭାବିତ ହୋଇଥିବା ଏସଆରସି ସୂଚନା ଦେଇଛନ୍ତି ।
ଏସଆରସି କହିିଛନ୍ତି, ୧୬ଟି ଜିଲ୍ଲାର ୧୪୪ଟି ବ୍ଲକ୍ରେ ୫୭ ଲକ୍ଷ ଲୋକଙ୍କ ଉପରେ ତିତଲିର ପ୍ରଭାବ ପଡିଛି । ଗଜପତି, ଗଞ୍ଜାମ, ରାୟଗଡା ଓ କନ୍ଧମାଳର ରାସ୍ତାଘାଟ ଅଧିକ ପ୍ରଭାବିତ ହୋଇଛି । ୧ ଲକ୍ଷ ୪୮ ହଜାର ହେକ୍ଟର ଜମିରେ ଧାନ ଫସଲ ନଷ୍ଟ ହୋଇଛି । କ୍ଷୟକ୍ଷତି ସମ୍ପର୍କିତ ରିପୋର୍ଟ ଆସନ୍ତାକାଲି ସୁଦ୍ଧା ପହଂଚିବ ବୋଲି କହିଛନ୍ତି ସ୍ୱତନ୍ତ୍ର ରିଲିଫ କମିଶନର ।