କନକ ବ୍ୟୁରୋ : ମୋଦିଙ୍କ ବାରିପଦା ଗସ୍ତର ଦୁଇ ଦିନ ପୂର୍ବରୁ ପ୍ରଧାନମନ୍ତ୍ରୀଙ୍କୁ ଚିଠି ଲେଖିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ରାଜ୍ୟରେ ଜଳସେଚନ ନେଇ ମୋଦି ଦେଇଥିବା ତଥ୍ୟକୁ ନେଇ ମୋଦିଙ୍କୁ ଚିଠି ଲେଖିଛନ୍ତି ନବୀନ । ମୋଦିଙ୍କୁ ନୂଆବର୍ଷର ଶୁଭେଚ୍ଛା ଜଣାଇବା ସହ ୨୦୧୪ ଏପ୍ରିଲରୁ ୨୦୧୮ ନଭେମ୍ବର ପର୍ଯ୍ୟନ୍ତ ଜଳସେଚନ ସର୍ମ୍ପକୀୟ ଗୋଟି ଗୋଟି ଚିଠିରେ ଉଲ୍ଲେଖ କରିଛନ୍ତି ନବୀନ ।
Kanak News is now on WhatsApp
Join and get latest news updates delivered to you via WhatsApp
ଡିସେମ୍ବର ୨୪ ଓଡିଶା ଗସ୍ତ ସମୟରେ ଖୋର୍ଦ୍ଧା ସମାବେଶରେ ମୋଦି ରାଜ୍ୟ ସରକାରଙ୍କ ଜଳସେଚନ ପ୍ରତିଶୃତି ଉପରେ ପ୍ରଶ୍ନର ପାହାଡ ଛିଡା କରିଥିଲେ । ୨୦୧୪ ନିର୍ବାଚନୀ ଇସ୍ତାହାରରେ ୧୦ ଲକ୍ଷ ହେକ୍ଟର ଜମି ଜଳସେଚିତ କରିବାକୁ ପ୍ରତିଶୃତି ଦିଆଯାଇଥିବା ବେଳେ ମାତ୍ର ୨୨ ହଜାର ହେକ୍ଟର ଚାଷ ଜମି ଜଳସେଚିତ ହୋଇଥିବା କହିଥିଲେ ମୋଦି । ତେବେ ମୋଦିଙ୍କ ଅଭିଯୋଗର ୧୦ ଦିନ ପରେ ଏହାର ଜବାବ ଦେଇଛନ୍ତି ନବୀନ । ଚିଠି ଲେଖି ଜଳସେଚନ ବିଭାଗର ପୂରା ହିସାବ ଦେଇଛନ୍ତି ନବୀନ ।
୨୦୧୪ ଏପ୍ରିଲରୁ ୨୦୧୮ ନଭେମ୍ବର ମଧ୍ୟରେ ରାଜ୍ୟରେ ମୋଟ ୭.୮ ଲକ୍ଷ ହେକ୍ଟର ଜମି ଜଳସେଚିତ ହୋଇଥିବା କହିଛନ୍ତି ନବୀନ । ଏପରିକି ନିର୍ବାଚନ ପୂର୍ବରୁ ୧୦ ଲକ୍ଷ ହେକ୍ଟର ଚାଷ ଜମି ଜଳସେଚିତ କରିବାର ପ୍ରତିଶୃତି ପୂରଣ କରିବୁ ବୋଲି କହିଛନ୍ତି ନବୀନ । ୨୦୧୪ରୁ ଏବେ ପର୍ଯ୍ୟନ୍ତ ମୋଟ ୨୬,୮୮୯ କୋଟି ଟଙ୍କା ଚାଷ ଜମି ଜଳସେଚିତ କରିବାକୁ ଖର୍ଚ୍ଚ କରାଯାଇଛି । ଆଉ ଏଥିରେ କେନ୍ଦ୍ରର ମାତ୍ର ୪.୫ ପ୍ରତିଶତ ଅଥାର୍ତ ୧୨୧୧ କୋଟି ଟଙ୍କାର ସହଯୋଗ ରହିଛି ।
ସବୁଠୁ ଗୁରୁତ୍ୱପୂର୍ଣ୍ଣ କଥା ହେଉଛି ଚଳିତ ବର୍ଷ ସର୍ବାଧିକ ୧୦୧୯୬ କୋଟି ଟଙ୍କା ଆବଣ୍ଟିତ ହୋଇଛି । ଏହାର ସମସ୍ତ ତଥ୍ୟ ରାଜ୍ୟ ସରକାରଙ୍କ ୱେବସାଇଟରେ ଉଲ୍ଲେଖ ରହିଛି । ରାଜ୍ୟ ସରକାରଙ୍କ ନିଜସ୍ୱ ସହଯୋଗରେ ୪୬ଟି ମେଗା ଉଠା ଜଳସେଚନ ପ୍ରକଳ୍ପ, ୫୩,୫୭୬ଟି ଗଭୀର ନଳକୂପ, ୫୮୩୭ଟି ଗୋଷ୍ଠୀ ଲିଫ୍ଟ ପଏଣ୍ଟ, ୮୩୩୫ଟି ଚେକ୍ ଡ୍ୟାମ୍ ନିର୍ମାଣ କରାଯାଇଛି । ଏସବୁ ବାଦ୍ ଜଳସେଚନ କ୍ଷେତ୍ରରେ ନିବେଶରେ ଓଡିଶା ଦେଶରେ ଆଗୁଆ ଥିବା ବେଳେ ଆଗାମୀ ଦିନରେ ଓଡିଶାକୁ ସହଯୋଗ ଜାରି ରଖିବାକୁ ଚିଠିରେ ଉଲ୍ଲେଖ କରିଛନ୍ତି ନବୀନ ।
ତେବେ ମୋଦିଙ୍କୁ ନବୀନ ଏହି ଚିଠି ଲେଖିବା ପରେ ରାଜନୈତିକ ମହଲରେ ମଧ୍ୟ ଜୋରଦାର ଚର୍ଚ୍ଚା ଆରମ୍ଭ ହୋଇଛି । କାରଣ ୫ ତାରିଖରେ ମୋଦିଙ୍କ ବାରିପଦା ଗସ୍ତ ପୂର୍ବରୁ ଚିଠି ମାଧ୍ୟମରେ ନବୀନଙ୍କ ଏଭଳି ଆଭିମୁଖ୍ୟ ନୂଆ ରାଜନୈତିକ ସମୀକରଣ ଚର୍ଚ୍ଚାକୁ ଆହୁରି ଖୋରାକ ଯୋଗାଇଛି । ଗୋଟିଏ ପଟେ ଖୋର୍ଦ୍ଧା ସମାବେଶରେ ମୋଦି ନାଁ ନ ନେଇ ରାଜ୍ୟ ସରକାରଙ୍କୁ ଟାର୍ଗେଟ କରିଥିବା ବେଳେ ୨୬ ତାରିଖ ବିଜେଡିର ପ୍ରତିଷ୍ଠା ଦିବସରେ କେନ୍ଦ୍ର ସରକାରଙ୍କୁ ୯ଟି ପ୍ରଶ୍ନ ପଚାରି ଏହାର ଜବାବ ମାଗିବା ସହ ରାଜନୈତିକ ରେସରେ ଫ୍ରଣ୍ଟଫୁଟରେ ରହିଛନ୍ତି ନବୀନ ।