ବିଜେପୁର ବିକାଶ ପାଇଁ ନବୀନ ମାଗିଲେ ଗୋଟିଏ ବର୍ଷ ! ଧର୍ମେନ୍ଦ୍ରଙ୍କ ପ୍ରଶ୍ନ, କଣ କରୁଥିଲ ୧୮ ବର୍ଷ । ପ୍ରଚାର ଶେଷ ହେବା ପୂର୍ବରୁ ବିଜେପୁରରେ ହେଭିୱେଟଙ୍କ ଅପିଲ
କନକ ବ୍ୟୁରୋ : ବିଜେପୁରରେ ବାଜି ଲାଗିଛି ତିନି ଦଳର ସମ୍ମାନ । ଚାଲିଛି ଘମାଘୋଟ୍ ପ୍ରଚାର ଲଢେଇ । ଏହାରି ଭିତରେ ଆଜି ଦ୍ୱିତୀୟ ଦିନ ପାଇଁ ଦଳୀୟ ପ୍ରାର୍ଥୀ ରୀତା ସାହୁଙ୍କ ପାଇଁ ପ୍ରଚାର କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଭୋଟରଙ୍କୁ ଅପିଲ କରି କହିଛନ୍ତି, ବିଜେପୁରର ବିକାଶ ପାଇଁ ବିଜେଡିକୁ ୧ ବର୍ଷର ସମୟ ଦିଆଯାଉ । ସେପଟେ ପ୍ରଚାର ମୈଦାନରେ ଓହ୍ଲାଇଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ପ୍ରଶ୍ନ କରିଛନ୍ତି, ଗତ ୧୮ ବର୍ଷ ଧରି କଣ କରୁଥିଲେ ସରକାର ।
Kanak News is now on WhatsApp
Join and get latest news updates delivered to you via WhatsApp
ମୁଖ୍ୟମନ୍ତ୍ରୀଙ୍କ ଉପରେ ଜୋତାମାଡ଼ ଉଦ୍ୟମ ଘଟଣାକୁ ନେଇ ରାଜ୍ୟ ରାଜନୀତି ସରଗରମ ଥିବାବେଳେ ବିଜେପୁରରେ ଦ୍ୱିତୀୟ ଦିନରେ ପ୍ରଚାର କରିଛନ୍ତି ନବୀନ ପଟ୍ଟନାୟକ ।ଲୋକଙ୍କ ପାଖରେ ପହଂଚି ବୁଝାଇବାକୁ ଚେଷ୍ଟା କରିଛନ୍ତି-ବିଜେଡି, ଲୋକଙ୍କ ଆଶା-ଆକାଂକ୍ଷା ପୂରଣ କରିବ । ବିକାଶ କାର୍ଯ୍ୟକୁ ଆଗେଇ ନେବା ପାଇଁ ବିଜେଡିକୁ ସୁଯୋଗ ଦିଆଯାଉ । ଗୋଟିଏ ବର୍ଷ ଭିତରେ ବିଜେପୁରର ଏକ ନୂଆ ପରିଚୟ ଆଣିବାକୁ ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି ।
ସ୍ଥାନୀୟ ସମସ୍ୟାକୁ ଅସ୍ତ୍ରକରି ଗାଏସିଲଟରେ ରୀତା ସାହୁଙ୍କ ପାଇଁ ଭୋଟ୍ ମାଗିଛନ୍ତି ମୁଖ୍ୟମନ୍ତ୍ରୀ । ଚାଷୀଙ୍କ ପାଇଁ ପାଣି, ବୁଣାକାର ମୁଣ୍ଡରୁ ଜିଏସଟି ବୋଝ ହାଲୁକା କରିବା ସଂପର୍କରେ କହିବା ସହ କୋଶଳି ଭାଷାକୁ ସାମ୍ବିଧାନିକ ଭାଷାର ମାନ୍ୟତା ସଂପର୍କରେ ପ୍ରତିଶ୍ରୁତି ଦେଇଛନ୍ତି । ଆଉ ଏହି ଲଢ଼େଇରେ ରୀତା ସାହୁଙ୍କ ସହ ସାଥିରେ ଥିବା ମୁଖ୍ୟମନ୍ତ୍ରୀ କହିଛନ୍ତି । ଏପରିକି ବିଜେପୁର ନିର୍ବାଚନ ମଣ୍ଡଳୀର ବିକାଶ କାମ ମୁଁ ବ୍ୟକ୍ତିଗତ ଭାବରେ ଦେଖିବି । ଏକ ବର୍ଷ ଭିତରେ ମୁଁ ବିଜେପୁର ପାଇଁ ନୂଆ ପରିଚୟ ଆଣିବି, ଏ ଭରସା ମୋର ରହିଛି ବୋଲି ନବୀନ କହିଛନ୍ତି ।
ଆଉ ଏପଟେ ବିଜେପୁରର ପ୍ରଚାର ଲଢ଼େଇରେ ବିଜେଡିକୁ କାଉଂଟର କରିବା ପାଇଁ ଜୋରଦାର ଉଦ୍ୟମ ଚଳାଇଛି ଭାରତୀୟ ଜନତା ପାର୍ଟି । ଦିଲ୍ଲୀରୁ ଜଣେ ପରେ ଜଣେ କେନ୍ଦ୍ରମନ୍ତ୍ରୀ ଆସି ଆଶୋକ ପାଣିଗ୍ରାହୀଙ୍କ ପାଇଁ ପ୍ରଚାର କରୁଛନ୍ତି । ସ୍ମୃତି ଇରାନୀଙ୍କ ପରେ ରାମକ୍ରିପାଲ ଯାଦବ ଦଳୀୟ ପ୍ରାର୍ଥୀଙ୍କ ପାଇଁ କ୍ୟାମ୍ପେନିଂ କରିଛନ୍ତି । ଆଉ ମାଗିଛନ୍ତି ୧୮ ବର୍ଷର ହିସାବ ।
ଅନ୍ୟପଟେ ସିଧାସଳଖ ବିଜେପୁର ଦାୟିତ୍ୱ ନେବା କଥା କହୁଥିବା ମୁଖ୍ୟମନ୍ତ୍ରୀ, ଏତେ ଦିନ ଯାଏଁ କ’ଣ ଧୋକା କରୁଥିଲେ କି ବୋଲି ଧର୍ମେନ୍ଦ୍ର ପ୍ରଶ୍ନ କରିଛନ୍ତି । ସେହିପରି ପାଣି, ନିଯୁକ୍ତି, ସ୍କୁଲକୁ ଶିକ୍ଷକ, ହସ୍ପିଟାଲକୁ ଡାକ୍ତର ଭଳି ପ୍ରସଙ୍ଗ ଉଠାଇ ରାଜ୍ୟ ସରକାରଙ୍କୁ ଘେରିବାକୁ ଚେଷ୍ଟା କରିଛନ୍ତି ଧର୍ମେନ୍ଦ୍ର ପ୍ରଧାନ ।ବିଜେଡି-ବିଜେପିର କଡ଼ା ଟକ୍କର ଭିତରେ ଅନ୍ତିମ ପର୍ଯ୍ୟାୟରେ ପହଂଚିଛି ପ୍ରଚାର । ପାଖରେ ହାତଗଣତି କେଇ ଘଂଟା, ଆସନ୍ତକାଲି ପ୍ରଚାର ସରିବ । ଆଉ ଏହି ସମୟ ସୀମା ଭିତରେ ଲୋକଙ୍କ ପାଖରେ ନିଜର ବାର୍ତା ପଠାଇବା ପାଇଁ ପ୍ରାଣମୁର୍ଚ୍ଛା ଉଦ୍ୟମ ଚଳାଇଛନ୍ତି ସବୁ ରାଜନୈତିକ ଦଳ ।