ନବୀନଙ୍କ ଫୋକସରେ ଦକ୍ଷିଣ ଓଡ଼ିଶା ! କୋରାପୁଟ ଓ ନବରଙ୍ଗପୁର ବିଭିନ୍ନ ପ୍ରକଳ୍ପର ଶିଳାନ୍ୟାସ ଓ ଉଦଘାଟନ, ଦଳୀୟ ସମାବେଶରେ କେନ୍ଦ୍ର ଉପରେ ବର୍ଷିଲେ ମୁଖ୍ୟମନ୍ତ୍ରୀ ।
କନକ ବ୍ୟୁରୋ : ନବରଙ୍ଗପୁର ଉମରକୋଟ ବିକାଶ ସମାବେଶରେ ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ର ଉପରେ ବର୍ଷିଛନ୍ତି । କହିଛନ୍ତି, ରାଜ୍ୟର ବିକାଶକୁ କେହି ରୋକିପାରିବେ ନାହିଁ । ନବରଙ୍ଗପୁରରେ ନବୀନ ୧୦୯୭ କୋଟି ଟଙ୍କା ବ୍ୟୟରେ ୪ଟି ମେଗା ପାନୀୟ ଜଳ ପ୍ରକଳ୍ପର ଭିତିପ୍ରସ୍ତର ସ୍ଥାପନ କରିଛନ୍ତି । ଏଥିସହ କୋରାପୁଟରେ ନବୀନ ସମାବେଶରେ ଯୋଗ ଦେଇ ୩ଟି ବୃହତର ସେତୁ ନିର୍ମାଣ ପାଇଁ ଘୋଷଣା କରିଛନ୍ତି । ଦୀର୍ଘଦିନର ତେଲେଙ୍ଗିର ପ୍ରକଳ୍ପ ଉଦଘାଟନ କରିଛନ୍ତି ନବୀନ । କୋରାପୁଟ ଯୁବ ସମାବେଶରେ ନୂଆ ଓଡିଶା ଗଢ଼ିବାକୁ ଯୁବପିଢ଼ିଙ୍କୁ ସଫଳତାର ୫ଟି ‘ନି’ ମନ୍ତ୍ର ଦେଇଛନ୍ତି ସାଂସଦ ସୌମ୍ୟରଞ୍ଜନ ପଟ୍ଟନାୟକ ।
Kanak News is now on WhatsApp
Join and get latest news updates delivered to you via WhatsApp
ନବରଂଗପୁରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୧୦୯୭ କୋଟି ଟଙ୍କା ବ୍ୟୟରେ ୪ଟି ମେଗା ପାନୀୟ ଜଳ ପ୍ରକଳ୍ପ ସହ ୧୬ଟି ପ୍ରକଳ୍ପର ଭିତିପ୍ରସ୍ତର ସ୍ଥାପନ କରିଛନ୍ତି । ସେହିପରି ୧୯ କୋଟି ଟଙ୍କା ବ୍ୟୟରେ ନିର୍ମିତ ବିଭିନ୍ନ ଉନ୍ନୟନମୂଳକ ପ୍ରକଳ୍ପର ଶୁଭ ଉଦଘାଟନ କରିଛନ୍ତି । ଉମରକୋଟ ସମାବେଶରେ କେନ୍ଦ୍ର ଉପରେ ବର୍ଷିଛନ୍ତି ନବୀନ । କହିଛନ୍ତି, ରାଜ୍ୟର ବିକାଶକୁ କେହି ରୋକିପାରିବେ ନାହିଁ । କେନ୍ଦ୍ରୀୟ ଅବହେଳାକୁ ମଧ୍ୟ ସମାଲୋଚନା କରିଛନ୍ତି । କେନ୍ଦ୍ର ସରକାର କେବିକେ ଅନୁଦାନ ବନ୍ଦ କରିଛନ୍ତି । ଆମେ ବିକାଶ ଅନୁଦାନ ବନ୍ଦ କରିବୁ ନାହିଁ । ବିଜୁ କେବିକେ ଯୋଜନା ଜାରି ରହିବ ବୋଲି କହିଛନ୍ତି ନବୀନ ।
ସେପଟେ ଆଜି କୋରାପୁଟ ଜୟପୁରରେ ବିଜେଡ଼ିର ଯୁବ ସମାବେଶରେ ନବୀନ ୩ଟି ବୃହତର ସେତୁର ନିର୍ମାଣ ପାଇଁ ଘୋଷଣା କରିଛନ୍ତି । ମୁରାନ ନଦୀରେ ଗିରିଲଗୁମା-ଦୁଆରସୁନି ରାସ୍ତା ଉପରେ, କୋଲାବ ଜଳଭଣ୍ଡାର ନିକଟରେ ନନ୍ଦପୁର-ଲମତାପସ୍ୱଙ୍କ-ବନମାଳୀପୁଟ ରାସ୍ତାରେ ଏବଂ କୋଲାବ ଜଳଭଣ୍ଡାରରେ କୋରାପୁଟ-ସୁକୁ ରାସ୍ତା ଉପରେ ଏହି ୩ଟି ବୃହତ ସେତୁ ନିର୍ମାଣ କରାଯିବ । ୧୧୩୬.୪୧କୋଟି ଟଙ୍କା ମୂଲ୍ୟରେ ୩୧ଟି ଜନହିତକାରୀ ପ୍ରକଳ୍ପ ଉଦଘାଟନ କରିଥିଲେ ନବୀନ ।
ଏହା ମଧ୍ୟରେ ରହିଛି ବହୁ ପ୍ରତିକ୍ଷିତ ୯୫୨କୋଟି ୮୫ ଲକ୍ଷର ତେଲେଙ୍ଗିରି ମଧ୍ୟମ ଜଳସେଚନ ପ୍ରକଳ୍ପ । ଏଥିସହ ନବୀନ ୭୪୯ କୋଟି ଟଙ୍କାର ୯୪ଟି ପ୍ରକଳ୍ପର ଭିତିପ୍ରସ୍ତର ସ୍ଥାପନ କରିଛନ୍ତି । ଏହି ସମାବେଶରେ ଯୋଗଦେଇ ରାଜ୍ୟସଭା ସାଂସଦ ସୌମ୍ୟରଞ୍ଜନ ପଟ୍ଟନାୟକ ସଫଳତାର ୫ଟି ସୁତ୍ର ଦେଇଛନ୍ତି ଜନତାଙ୍କୁ । ଏହି ୫ଟି ସୁତ୍ର ହେଉଛି ୫ଟି ନି ଅର୍ଥାତ ନିରୋଗ, ନିଡର, ନିରହଙ୍କାର, ନିସ୍ୱାର୍ଥପର ଏବଂ ନିଶାକୁ ନା । ଏହି ୫ଟି ସୁତ୍ରକୁ ମାନି ବିଜ୍ଞାନ ଓ କାରିଗରି କୌଶଳର ପ୍ରୟୋଗରେ ଅସମ୍ଭବକୁ ସମ୍ଭବ କରିହେବ ବୋଲି କହିଛନ୍ତି ସୌମ୍ୟରଂଜନ । ମୁଖ୍ୟମନ୍ତ୍ରୀଙ୍କ ସମାବେଶକୁ ଦୃଷ୍ଟିରେ ଏହି ମାଓ ଉପଦ୍ରୁତ ଅଂଚଳରେ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଥିଲା । ସୁରକ୍ଷା ଦୃଷ୍ଟି କୋଣରୁ ୧୪ ପ୍ଲାଟୁନ ଫୋର୍ସ ମୁତୟନ କରାଯାଇଥିଲା ।