କନକ ବ୍ୟୁରୋ : ୪ ବର୍ଷ ପରେ ନବୀନଙ୍କ ନିର୍ଦ୍ଦେଶରେ ବିଭିନ୍ନ ସଂସଦୀୟ କମିଟିରୁ ଇସ୍ତଫା ଦେଇଛନ୍ତି ବିଜେଡି ସାଂସଦ । ପୁଣିଥରେ ସଂସଦୀୟ କମିଟି ପାଇଁ ନିଜ ମନୋନୀତ ସାଂସଦଙ୍କ ତାଲିକା ଦେବେ ଦଳର ସୁପ୍ରିମୋ ନବୀନ ପଟ୍ଟନାୟକ । ତେବେ କାହିଁକି ଏପରି ନିଷ୍ପତି ବିଜେଡି ସୁପ୍ରିମୋ ନେଲେ, ଏ ନେଇ ଚର୍ଚ୍ଚା ଆରମ୍ଭ ହୋଇଛି । ଦଳରୁ ନିଲମ୍ବିତ ହୋଇଥିବା ସାଂସଦ ବୈଜୟନ୍ତ ପଣ୍ଡା, ସଂସଦୀୟ କମିଟିରେ ରହିବେ କି ନାହିଁ, ସେ ନେଇ ପ୍ରଶ୍ନ ଉଠିଛି । କାରଣ ବିଜେଡି ଅଭିଯୋଗ କରିଥିଲା, ଫାଇନାନସ ଷ୍ଟାଣ୍ଡିଂ କମିଟିକୁ ନପଠାଇବାରୁ ଦଳ ବିରୋଧୀ କାର୍ଯ୍ୟ କରୁଥିଲେ ବୈଜୟନ୍ତ ।
Kanak News is now on WhatsApp
Join and get latest news updates delivered to you via WhatsApp
ବିଭିନ୍ନ ସଂସଦୀୟ କମିଟିରେ ଥିବା ବିଜେଡି ସାଂସଦମାନଙ୍କୁ ଇସ୍ତଫା ଦେବାକୁ କହି ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଇସାରା ଇସାରାରେ ଅନେକ କିଛି କହିଛନ୍ତି । ଆଜି ସାଂସଦମାନଙ୍କ ବୈଠକରେ ଏ ସଂପର୍କରେ ନିଷ୍ପତି ଜଣାଇ ଦିଆଯାଇଥିଲା । ବିଭିନ୍ନ ସଂସଦୀୟ କମିଟିରେ ଥିବା ବିଜେଡି ସଦସ୍ୟମାନେ ମଧ୍ୟ ଇସ୍ତଫା ଦେଇଛନ୍ତି । ତେବେ ଦଳରୁ ନିଲମ୍ବିତ ହୋଇଥିବା ସାଂସଦ ବୈଜୟନ୍ତ ପଣ୍ଡା ଇସ୍ତଫା ଦେବେ କି ନାହିଁ ଏ ନେଇ କିଛି ସ୍ପଷ୍ଟ ହୋଇନାହିଁ । ୪ ବର୍ଷ ପରେ ସଂସଦୀୟ କମିଟିଗୁଡିକରେ ପୁଣି ଥରେ ନିଜ ଇଚ୍ଛା ମୁତାବକ ସଦସ୍ୟ ରଖିବାକୁ ଚାହୁଁଛନ୍ତି ବିଜେଡି ସୁପ୍ରିମୋ । ୨୦୧୯ରେ ସାଧାରଣ ନିର୍ବାଚନ ହେବାକୁ ଥିବା ବେଳେ କାହିଁକି ଏହା ଆବଶ୍ୟକ ପଡିଲା ଏ ନେଇ ପ୍ରଶ୍ନ ଉଠିଛି । ବୈଜୟନ୍ତ ପଣ୍ଡା ଯେଉଁସବୁ ସଂସଦୀୟ କମିଟିରେ ଅଛନ୍ତି, ସେଥିରେ ବିଜେଡି ନୂଆ ସଦସ୍ୟ ପାଇଁ ସୁପାରିଶ କରିବ କି ନାହିଁ ସେ ନେଇ ବଡ଼ ପ୍ରଶ୍ନ ଛିଡା ହୋଇଛି ।
ଦୁଇଟି ସଂସଦୀୟ କମିଟିରେ ଅଛନ୍ତି ବୈଜୟନ୍ତ । ଗୃହ ବ୍ୟାପାର ଷ୍ଟାଣ୍ଡିଂ କମିଟି ଓ କର୍ପୋରେଟ୍ ବ୍ୟାପାର କନସଲଟିଭ୍ କମିଟିରେ ସଦସ୍ୟ ଅଛନ୍ତି ବୈଜୟନ୍ତ । ତେବେ ବୈଜୟନ୍ତ ଏହିସବୁ କମିଟିରେ ରହିବେ କି ବିଦା ହେବେ, ଏ ନେଇ କିଛି ସ୍ପଷ୍ଟ ହୋଇନାହିଁ । ବଜେଟର ଦ୍ୱିତୀୟ ପର୍ଯ୍ୟାୟ ଅଧିବେଶନ ଆସନ୍ତା ୫ ତାରିଖରୁ ଆରମ୍ଭ ହେବାକୁ ଯାଉଛି । ମହାନଦୀ, ପୋଲାଭରମ, ଧାନର ସହାୟକ ମୂଲ୍ୟ ଆଦି ପ୍ରସଙ୍ଗକୁ ସଂସଦରେ ଉଠାଇବ ଦଳ । ବିଜେଡି ସଂସଦୀୟ ଦଳ ବୈଠକରେ ଏ ନେଇ ସ୍ୱତନ୍ତ୍ର ରଣନୀତି ପ୍ରସ୍ତୁତ ହୋଇଛି ।