ମକର ସଂକ୍ରାନ୍ତି ପାଇଁ ଛୁଟି ଘୋଷଣା କଲେ ରାଜ୍ୟ ସରକାର । ବୁଧବାର ଦିନ ବନ୍ଦ ରହିବ ସମସ୍ତ ସରକାରୀ ଅଫିସ ଓ ଶିକ୍ଷାନୁଷ୍ଠାନ ।
କନକ ବ୍ୟୁରୋ : ଆସନ୍ତା ବୁଧବାର ତଥା ଜାନୁଆରୀ ୧୫ରେ ରାଜ୍ୟରେ ବେଶ ଧୁମଧାମରେ ପାଳନ ହେବ ମକର ସଂକ୍ରାନ୍ତି । ଆଉ ମକର ସଂକ୍ରାନ୍ତିକୁ ଦୃଷ୍ଟିରେ ରଖି ଆସନ୍ତା ବୁଧବାରକୁ ଛୁଟି ଘୋଷଣା କରିଛନ୍ତି ରାଜ୍ୟ ସରକାର । ଆସନ୍ତା ଜାନୁଆରୀ ୧୫ରେ ସମସ୍ତ ସରକାରୀ ଅଫିସ ଓ ଶିକ୍ଷାନୁଷ୍ଠାନ ବନ୍ଦ ରହିବ ବୋଲି ସରକାରଙ୍କ ତରଫରୁ କୁହାଯାଇଛି । ଛୁଟି ପାଇଁ ମୁଖ୍ୟମନ୍ତ୍ରୀଙ୍କ ଅନୁମୋଦନ ପରେ ବିଧିବଦ୍ଧ ଭାବେ ବିଜ୍ଞପ୍ତି ଜାରି କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ହିନ୍ଦୁ ସଂସ୍କୃତି ଓ ଧାର୍ମିକ ପରମ୍ପରାରେ ଏହି ପର୍ବ ପାଳନର ଅନେକ ମହତ୍ୱ ରହିଛି । ଆଜିଠାରୁ ସୂର୍ଯ୍ୟଙ୍କର ଉତରାୟଣ ଗତି ଆରମ୍ଭ ହୁଏ ଏବଂ ମକର ରାଶିରେ ସୂର୍ଯ୍ୟ ପ୍ରବେଶ କରନ୍ତି । ଏହି ପର୍ବକୁ ଭିନ୍ନ ଭିନ୍ନ ଅଂଚଳରେ ଭିନ୍ନ ଭିନ୍ନ ନାଁରେ ପାଳନ କରିଥାନ୍ତି । ଓଡିଶାରେ ମକର ସଂକ୍ରାନ୍ତି, ଆନ୍ଧ୍ରପ୍ରଦେଶରେ ପୋଙ୍ଗଲ, ପଞ୍ଜାବରେ ଲୋହରି, ଆସାମରେ ବିହୁ, ପଶ୍ଚିମବଙ୍ଗରେ ପୌଷ ସଂକ୍ରାନ୍ତି ଭାବେ ଜଣାଶୁଣା । ମକର ସଂକ୍ରାନ୍ତି ଉତ୍ତର ଓଡିଶାର ଗଣପର୍ବ ଭାବେ ପାଳିତ ହୋଇଥାଏ ।
ମୟୂରଭଞ୍ଜ, ବାଲେଶ୍ୱର ଓ କେନ୍ଦୁଝର ଜିଲ୍ଲାରେ ବସବାସ କରୁଥିବା ବିଶେଷକରି ଆଦିବାସୀ ସମ୍ପ୍ରଦାୟ ଏହି ପର୍ବକୁ ଅତି ଆନନ୍ଦଉଲ୍ଲାସର ସହିତ ପାଳି ଥାନ୍ତି । ଏହି ସମ୍ପ୍ରଦାୟରେ ମକର ସଂକ୍ରାନ୍ତି ନୂଆ ବର୍ଷ । ମକର ବୁଡ ପକାଇ ନବବସ୍ତ୍ର ପରିଧାନ ଓ ପିଠାପଣା ଖାଇ ସମସ୍ତେ ମଉଜରେ ମାତନ୍ତି । ସାନ୍ତାଳ ସମ୍ପ୍ରଦାୟରେ ମୃତବ୍ୟକ୍ତିଙ୍କ ଅସ୍ଥି ବିସର୍ଜନ ସହିତ ଶୁଦ୍ଧିକ୍ରିୟା ସମ୍ପନ୍ନ କରାଯାଏ । ଏହା ଦାମୋଦର ଯାତ୍ରା ଭାବେ ନାମିତ ।