ବିଜେପୁରରେ ନବୀନଙ୍କ ନିଆରା ଅନ୍ଦାଜ ! ବନ୍ଧୁ ଅନଙ୍ଗଙ୍କୁ ହାତ ଦେଖାଇଲେ, ଅଭିନେତା ଅରିନ୍ଦମଙ୍କ ସହ ସେଲଫି ନେଲେ
କନକ ବ୍ୟୁରୋ : ବିଜେପୁର ଉପନିର୍ବାଚନର ପ୍ରଚାର ଓ ହୋହଲ୍ଲା ଭିତରେ ବି ଦେଖିବାକୁ ମିଳିଛି ରୋଚକ ଦୃଶ୍ୟ । ବିଜେପୁରରେ ମୁଖ୍ୟମନ୍ତ୍ରୀଙ୍କ ପ୍ରଚାର ଜନସଭା ଚାଲିଥିବା ବେଳେ ଦେଖିବାକୁ ମିଳିଛି ନବୀନ ବାବୁଙ୍କ ହାଲୁକା ମୁଡର ଦୃଶ୍ୟ । ମଂଚ ଉପରେ ମୁଖ୍ୟମନ୍ତ୍ରୀଙ୍କ ପାଖରେ ବସିଥିଲେ ଦଳର ବରିଷ୍ଠ ନେତା ତଥା ତାଙ୍କର ସ୍କୁଲ ଦିନର ବନ୍ଧୁ ଅନଙ୍ଗ ଉଦୟ ସିଂଦେଓ । ଦୁହେଁ ବେଶ୍ ପାଖାପାଖି ହୋଇ ବସିବା ସହ ବେଶ କିଛି ସମୟ ପାଇଁ କଥା ହୋଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ଏହାଭିତରେ ଅନଙ୍ଗ ମୁଖ୍ୟମନ୍ତ୍ରୀଙ୍କ ବାଁ ହାତକୁ ଧରି କିଛି ସମୟ ନିରୀକ୍ଷଣ କରିବା ପରେ ପୁଣିଥରେ ଗପସପ ଆରମ୍ଭ କରିଥିଲେ । ଆଉ ଏହାକୁ ବେଶ୍ ଖୁସିର ସହ ଶୁଣୁଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଲାଗୁଥିଲା ନିର୍ବାଚନକୁ ନେଇ ଆଦୌ ଚିନ୍ତିତି ନାହାନ୍ତି ନବୀନ । ପୁରା ହାଲୁକା ମନରେ ଥିବା ତାଙ୍କ ଚେହେରାରୁ ବାରି ହୋଇପଡୁଥିଲା । ଲାଗୁଥିଲା ଯେମିତି ଅନଙ୍ଗ ଉଦୟ ସିଂଦେଓ ମୁଖ୍ୟମନ୍ତ୍ରୀଙ୍କ ହାତରେଖା ଦେଖି ଗଣନା କରୁଛନ୍ତି ।
କିଛି ସମୟ ଧରି ନବୀନଙ୍କୁ ଅନଙ୍ଗ କିଛି କହିବା ପରେ ଏଥିରେ ବାଧା ପହଂଚାଇଥିଲେ ସୁରକ୍ଷାକର୍ମୀ । ସେ କିଛି କହିବା ପରେ ମୁଖ୍ୟମନ୍ତ୍ରୀଙ୍କ ହାତ ଛାଡି ଦେଇ ସ୍ୱାଭାବିକ ଭାବରେ ବସିଯାଇଥିଲେ ଦୁଇ ନେତା । ତେବେ ଏନେଇ ଅନଙ୍ଗ କହିଛନ୍ତି ମୁଖ୍ୟମନ୍ତ୍ରୀଙ୍କ ହାତରେ ଟିକିଏ ସମସ୍ୟା ଥିଲା । ସେଥିପାଇଁ ନବୀନ ତାଙ୍କୁ ହାତ ଦେଖାଉଥିଲେ ।
କେବଳ ଏହି ଗୋଟିଏ ଘଟଣା ନୁହେଁ ଆଉ ଗୋଟିଏ ଦୃଶ୍ୟ ବି ଆଜିର ପ୍ରଚାର ମଂଚରେ ଦେଖିବାକୁ ମିଳିଛି । ସଭା ଚାଲିଥିବା ବେଳେ ମୁଖ୍ୟମନ୍ତ୍ରୀଙ୍କ ଠିକ ପଛରେ ଠିଆ ହୋଇଥିଲେ ଅଭିନେତାରୁ ନେତା ସାଜିଥିବା ଅରିନ୍ଦମ ରାୟ । ସେ ହଠାତ ନିଜ ମୋବାଇଲ କାଢି ମୁଖ୍ୟମନ୍ତ୍ରୀଙ୍କ ଆଡକୁ ଯାଇ ସେଲଫି ନେଇଥିଲେ । ଏହି ସମୟରେ ବେଶ୍ ମନଖୋଲା ହସି ଅରିନ୍ଦମଙ୍କ ସହ ସେଲଫି ଉଠାଇଥିଲେ ନବୀନ ପଟ୍ଟନାୟକ । ଅବଶ୍ୟ ଏହା ମୁଖ୍ୟମନ୍ତ୍ରୀଙ୍କ ପ୍ରଥମ ସେଲଫି ନୁହେଁ । ଆଗରୁ ବହୁଥର ମୁଖ୍ୟମନ୍ତ୍ରୀ ସେଲଫି ନେଇଥିବା ଦେଖିବାକୁ ମିଳିଛି ।