କନକ ବ୍ୟୁରୋ : ଗୋଟିଏ ପଟେ ବିଜେପିର ଜାତୀୟ କାର୍ଯ୍ୟକାରିଣୀ । ଅନ୍ୟପଟେ ବଦଳୁଥିବା ରାଜନୈତିକ ପାଣିପାଗ । ଏହାରି ଭିତରେ ଏବେ ବଦଳୁଛନ୍ତି କି ଓଡିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଗତ କିଛି ଦିନ ଭିତରେ ନବୀନଙ୍କ ନୂଆ ଅନ୍ଦାଜ ଚାରିଆଡେ ଚର୍ଚ୍ଚାର ବିଷୟ ପାଲଟିଛି । କୁହାଯାଉଛି ବିଜେଡିର ପୂର୍ବ ଦବଦବା ବଜାୟ ରଖିବାକୁ ଏବେ ଜୋରସୋରରେ ଲାଗିପଡିଛନ୍ତି ନବୀନ ପଟ୍ଟନାୟକ ।
Kanak News is now on WhatsApp
Join and get latest news updates delivered to you via WhatsApp
ଯେତେବେଳେ ନବୀନ ଓଡିଶା ରାଜନୀତିକୁ ପ୍ରବେଶ କଲେ ସେତେବେଳେ ଓଡିଆ ଜାଣି ନଥିବା ଜଣେ ସରଳ କିନ୍ତୁ ଖୁବ ନୀରବ ବ୍ୟକ୍ତି ଭାବେ ସାମ୍ନାକୁ ଆସିଲେ । ଏମିତିକି ଲୋକଙ୍କ ସହ ଖୁବ କମ ମିଳାମିଶା କରୁଥିବା ନବୀନ ଅମଲା ଓ କିଛି ବିଶ୍ୱସ୍ତ ରାଜନେତାଙ୍କୁ ନେଇ ଶାସନ ପରିଚାଳନା କଲେ । ଆଉ ଏଇ ଢାଂଚାରେ ହିଁ ହିଁ ୧୭ବର୍ଷ ଧରି କ୍ଷମତା ଜାବୁଡି ଧରିଛି ବିଜେଡି ।
ହେଲେ ହଠାତ ବଦଳିଯାଇଛି ନବୀନଙ୍କ ଅନ୍ଦାଜ । ଏକା ଏକା ରହୁଥିବା ନବୀନ ଏବେ ସାଧାରଣ ଲୋକଙ୍କ ଗହଣକୁ ଆସୁଛନ୍ତି । ନେତା ଓ ଅଫିସରଙ୍କୁ ଛାଡି ଲୋକଙ୍କ ସହ ମିଶୁଛନ୍ତି ।
କିଛିଦିନ ତଳେ ଓୟୁଏଟିର ସାଧରଣ ଛାତ୍ରଛାତ୍ରୀଙ୍କ ସହ ସେଲଫି ନେଇଥିଲେ ନବୀନ । ଆଉ ଜଣେ ଛାତ୍ରୀ ଦେଇଥିବା ଜୈବିକ ଛତୁ ବି ଖାଇଥିଲେ । ସେହିଭଳି ବିନା କୈାଣସି ଯୋଜନାରେ ଭଉଣୀ ଗୀତା ମେହେଟାଙ୍କ ସହ ମାର୍କେଟ ମଲ ବି ବୁଲି ଚର୍ଚ୍ଚାକୁ ଆସିଥିଲେ ମୁଖ୍ୟମନ୍ତ୍ରୀ ।
ଖାଲି ଏତିକି ନୁହେଁ । ସୋସିଆଲ ମିଡିଆରେ ବି ଖୁବ ସକ୍ରୀୟ ହେଉଛନ୍ତି ମୁଖ୍ୟମନ୍ତ୍ରୀ । କିଛିଦିନ ତଳେ କୁମ୍ଭୀର ମୁହଁରୁ ବର୍ତିଥିବା ଦୁଇ କୁନି ଝିଅଙ୍କ ସହ ସେଲଫି ନେଇ ପୋଷ୍ଟ କରିଥିଲେ ନବୀନ ।
ସବୁବେଳେ ସୁରକ୍ଷାକର୍ମୀଙ୍କ ଗହଣରେ ରହୁଥିବା ଓ ଲୋକଙ୍କ ସହ ସହଜରେ ମିଶି ପାରୁ ନଥିବା ମୁଖ୍ୟମନ୍ତ୍ରୀଙ୍କର ଏ ଅନ୍ଦାଜ ସାଧାରଣ ଲୋକଙ୍କୁ ଯେତିକି ଉତ୍ସାହିତ କରୁଛି ସେତିକି ଆଶ୍ଚର୍ଯ୍ୟ ବି ଲାଗୁଛି । ପ୍ରଶ୍ନ ଉଠୁଛି ପଂଚାୟତ ନିର୍ବାଚନ ବିପର୍ଯ୍ୟୟପରେ ଲୋକଙ୍କ ସହ ଦଳକୁ ଯୋଡି ରଖିବା ପାଇଁ ନୂଆ ଷ୍ଟାଇଲ ଆପଣେଇଚନ୍ତି କି ନବୀନ ।