ଶିଳ୍ପରେ ନିବେଶ କ୍ଷେତ୍ରରେ ନବୀନ ସରକାରଙ୍କ ବଡ଼ ପ୍ରତିଶ୍ରୁତି : ପସ୍କୋ ଗଲା, ଜିନ୍ଦଲ ଆସିଲା
କନକ ବ୍ୟୁରୋ : ରାଜ୍ୟରେ ଶିଳ୍ପ କ୍ଷେତ୍ରରେ ବଡ଼ ନିବେଶକୁ ମିଳିଛି ମଂଜୁରୀ । ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ବସିଥିବା ଉଚ୍ଚସ୍ତରୀୟ କ୍ଷମତା ସଂପନ୍ନ କମିଟି ବୈଠକରେ ୧୦ଟି ପ୍ରକଳ୍ପକୁ ମିଳିଛି ମଂଜୁରୀ । ରାଜ୍ୟରେ ମୋଟ୍ ୧ ଲକ୍ଷ ୧୦ ହଜାର ୮୯୩ କୋଟି ନିବେଶ ହେବାକୁ ଥିବା ବେଳେ ୪୬ ହଜାର ୫୪ ନିଯୁକ୍ତି ସୁଯୋଗ ସୃଷ୍ଟି ହେବ । ତେବେ ବଡ଼ କଥା ହେଉଛି, ପାରାଦୀପରେ ପସ୍କୋ ପ୍ରକଳ୍ପ ବନ୍ଦ ହେବା ପରେ ଜେଏସଡ଼ବ୍ଲ୍ୟୁ ସେଠାରେ ନୂଆ ଇସ୍ପାତ କାରଖାନା ପ୍ରତିଷ୍ଠା କରିବାକୁ ରାଜ୍ୟ ସରକାର ଅନୁମତି ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
୫୦ ହଜାର କୋଟି ନିବେଶରେ ହେବାକୁ ଥିବା ଏହି କାରଖାନାରେ ବାର୍ଷିକ ୧୦ ମିଲିୟନ ଟନ୍ ଷ୍ଟିଲ୍ ଉତ୍ପାଦନ ହେବ । ଏଥିରେ ୩୦ ହଜାର ନିଯୁକ୍ତି ସୁଯୋଗ ସୃଷ୍ଟି ହେବ । ଅନୁମାନ କରାଯାଉଛି, ପସ୍କୋ ପାଇଁ ଅଧିଗ୍ରହଣ ହୋଇଥିବା ଜମି ଏବେ ଜେଏସଡବ୍ଲ୍ୟୁ ପାଇବ । ୨୦୦୫ରେ ରାଜ୍ୟ ସରକାର ପସ୍କୋ ସହ ଏମଓୟୁ ସ୍ୱାକ୍ଷର କରିଥିବା ବେଳେ ଜମି ଓ ଖଣି ବିବାଦରେ ଫସି ରହିଥିବା ଏହି ପ୍ରକଳ୍ପ ପାଇଁ କାମ ବି ଆରମ୍ଭ ହୋଇପାରିନଥିଲା । ଆଉ ଶେଷରେ ଓଡ଼ିଶା ପ୍ରକଳ୍ପରୁ ନିଜକୁ ଓହରାଇ ନେଇଥିଲା ଏହି କଂପାନୀ ।
ଏହାପରେ ପାରାଦୀପରେ ଇସ୍ପାତ ପ୍ରକଳ୍ପ କରିବାକୁ ଆଗ୍ରହ ଦେଖାଇଥିଲେ ଜେଏସଡବ୍ଲ୍ୟୁ ଅଧ୍ୟକ୍ଷ ସଜ୍ଜନ ଜିନ୍ଦଲ । ଆଉ ଶେଷରେ ଏହି ପ୍ରକଳ୍ପକୁ ରାଜ୍ୟ ସରକାରଙ୍କର ଅନୁମତି ମିଳିଛି । ସେହିଭଳି ଝାରସୁଗୁଡାରେ ଏନଏଲସି ଥର୍ମାଲ ପାୱାର ୨୩ ହଜାର ୫୬୯ କୋଟି ନିବେଶରେ ପାୱାରପ୍ଲାଂଟ ପ୍ରତିଷ୍ଠା କରିବ । ଏଥିରେ ୩୨୦୦ ମେଗାୱାଟ ବିଜୁଳି ଉତ୍ପାଦନ ହେବ, ୩ହଜାର ୩୨୦ ନିଯୁକ୍ତି ସୁଯୋଗ ସୃଷ୍ଟି ହେବ । ଏଥିସହ ନାଲକୋ ସ୍ମେଲଟର ପ୍ଲାଂଟର ସଂପ୍ରସାରଣ, ନାଲକୋ ରିଫାଇନାରୀ ସଂପ୍ରସାରଣ, ଭୁଷଣ ଷ୍ଟିଲþ ଆଣ୍ଡ ପାୱାର ଲିମିଟେଡରେ ଝାରସୁଗୁଡ଼ା ପ୍ରକଳ୍ପ, ଏନଏମଡିସି ପେଲେଟ ପ୍ଲାଂଟ, ପିପିଏଲ ସଂପ୍ରସାରଣ ଭଳି ପ୍ରକଳ୍ପକୁ ମଧ୍ୟ ମଂଜୁରୀ ମିଳିଛି । ନିକଟରେ ମେକ୍ ଇନ୍ ଓଡ଼ିଶାରେ ମିଳିଥିବା ପ୍ରତିଶ୍ରୁତିର ୫୦ ପ୍ରତିଶତ ନିବେଶକୁ ଆଜି ମଂଜୁରୀ ମିଳିଥିବାରୁ ମୁଖ୍ୟମନ୍ତ୍ରୀ ଖୁସି ଜାହିର କରିଛନ୍ତି ।