ସବୁଜ ଶିବିରରୁ ଆକ୍ରମଣରେ ଘାଇଲା ଗେରୁଆ । ମୋବାଇଲର ଉଦାହରଣ ଦେଇ ମୋଦି ସରକାରକୁ ଟାର୍ଗେଟ କଲେ ନବୀନ
କନକ ବ୍ୟୁରୋ : ୨୨ ବର୍ଷରେ ପାଦ ଦେଇଛି ବିଜେଡି । ପ୍ରତିଷ୍ଠା ଦିବସରେ ବିଜେଡି ସୁପ୍ରିମୋ କେନ୍ଦ୍ର ସରକାରଙ୍କୁ କରିଛନ୍ତି ଡାଇରେକ୍ଟ ଆଟାକ୍ । ନିଜ ଭାଷଣରେ କେନ୍ଦ୍ର ସରକାରଙ୍କୁ ୯ଟି ପ୍ରଶ୍ନ ପଚାରିବା ସହ ଏହାର ଜବାବ ଓଡିଶା ମାଗୁଛି ବୋଲି କହିଛନ୍ତି ନବୀନ । ତେବେ ୯ଟି ପ୍ରଶ୍ନ ମଧ୍ୟରୁ ନବୀନଙ୍କ ଦ୍ୱିତୀୟ ପ୍ରଶ୍ନ ବେଶ କୌତୁହଳ ସୃଷ୍ଟି କରିଛି । ଦ୍ୱିତୀୟ ପ୍ରଶ୍ନରେ ଟେଲିକମ ସେକ୍ଟରରେ ରାଜ୍ୟରେ ଦେଖାଦେଉଥିବା ସମସ୍ୟା ସର୍ମ୍ପକରେ ବଖାଣିଛନ୍ତି ନବୀନ । ଆଉ ତାହା ପୂରା ମଜାଳିଆ ଢଙ୍ଗରେ । ନବୀନ କହିଥିଲେ , ମୋବାଇଲ ଧରିବାକୁ ହେଲେ ଗଛ ଚଢିବା ଶିଖିବାକୁ ପଡିବ ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟରେ ଟେଲିକମ ସେକ୍ଟରର ସମସ୍ୟା କହିବାକୁ ଯାଇ ନବୀନ କହିଛନ୍ତି ବିଏସଏନଏଲ ହେଉଛି ଭାରତ ସରକାରଙ୍କର ସବୁଠୁ ବଡ ନେଟୱର୍କ । ଏବେ ଅଧିକାଂଶ ଲୋକଙ୍କ ପାଖରେ ମୋବାଇଲ ରହିଛି । କିନ୍ତୁ ଏବେ ମଧ୍ୟ ଓଡିଶାର ଅଧିକାଂଶ ଗାଁକୁ ନେଟୱର୍କ ନାହିଁ । ଗଛ ଉପରେ ବସିଲେ ଯାଇ ମୋବାଇଲ ଲାଗୁଛି । କୋଠା ଉପରକୁ ଗଲେ ହିଁ କଥା ହୋଇପାରିବ । ମୋବାଇଲ ଧରିବା ପାଇଁ ଗଛ ଚଢା ଶିଖିବାକୁ ପଡୁଛି । ସେହିଭଳି ସହରରେ ମଧ୍ୟ ମୋବାଇଲ ନେଟୱର୍କ ସମସ୍ୟା କିଛି କମ ନୁହେଁ । ସହରରେ ଅଧିକାଂଶ ସମୟ ମୋବାଇଲ ନେଟୱର୍କ ବ୍ୟସ୍ତ ରହୁଛି । ଆଉ ଏଭଳି କହି କେନ୍ଦ୍ର ସରକାରଙ୍କୁ କଟାକ୍ଷ କରିଛନ୍ତି ନବୀନ ।
ନବୀନଙ୍କ ୯ଟି ପ୍ରଶ୍ନ :
୧. ଜାତୀୟ ରାଜପଥର ଅବସ୍ଥା ଶୋଚନୀୟ, କୋଷ୍ଟାଲ ହାଇୱେ କେବେ ହେବ ? ତାହାକୁ ଆମେ ଅପେକ୍ଷା କରି ରହିଛୁ
୨. ଟେଲିକମ : ଗଛ ଉପରେ ଚଢ଼ିଲେ ଆସୁଛି ନେଟୱାର୍କ, କେବେ ଗାଁରେ ପହଁଚିବ ଟେଲିକମ ନେଟୱାର୍କ
୩. ରେଲୱେ : ରେଳବାଇରେ ଉନ୍ନତି କେବଳ ପ୍ଲାଟଫର୍ମ ଟିକେଟରେ ଆସିଛି । ଟିକେଟ ଦର ବୃଦ୍ଧି ପାଇଛି । ଖୋର୍ଦ୍ଧା ବଲାଙ୍ଗୀର ରେଳବାଇ ଇତିହାସରେ ରହିଲା ଭଳି ଲାଗୁଛି ।
୪. ବ୍ୟାଙ୍କ ସୁବିଧା ନାହିଁ
୫. କୋଇଲା ନିଲାମ : କୋଇଲା ବ୍ଲକ ନିଲାମ ହେଲେ ଓଡ଼ିଶା ୭୦ ହଜାର କୋଟି ଟଙ୍କା ପାଇବ ବୋଲି କହିଥିଲେ । ହେଲେ ୩ ବର୍ଷରେ ମାତ୍ର ୩୭୦ କୋଟି ଟଙ୍କା ମିଳିଛି ।
୬. ଚାଷୀ : ଚାଷୀଙ୍କୁ ଠିକ ସମୟରେ କ୍ଷତିପୂରଣ ମିଳିଲାନି । ଉଚିତ ମୂଲ୍ୟ ମିଳିଲାନି । ବେସରକାରୀ ବୀମା କମ୍ପାନୀ ଲାଭବାନ ହେଲେ ।
୭. ଇସ୍ତାହାର : ସ୍ୱତନ୍ତ୍ର ରାଜ୍ୟ ପାହ୍ୟା, ଏମଏସପି, ମହିଳାଙ୍କ ପାଇଁ ୩୩% ସଂରକ୍ଷଣ କିଛି ହେଲାନାହିଁ । ସାଢେ଼ ୪ ବର୍ଷ ବିତିଗଲାଣି ।
୮.ଏସସି ଏସଟି ବିକାଶ : ଆଦିବାସୀ ଅଂଚଳର ବିକାଶ ପାଇଁ ଟଙ୍କା ବନ୍ଦ କରିଦେଲେ । ଗରିବ ଏସସି ଏସଟି ଛାତ୍ରଛାତ୍ରୀଙ୍କ ବୃତି ଅର୍ଥ ମଧ୍ୟ ଦେଲେନାହିଁ ।
୯. ଉଜ୍ଜ୍ୱଳା : ବହୁତ ପ୍ରଚାର ହେଉଛି । ସବୁଆଡେ଼ ବଡ଼ବଡ଼ ହୋଡର଼୍ିଂ । ୩୦ ଲକ୍ଷ ମହିଳାଙ୍କୁ ଗ୍ୟାସ କନେକ୍ସନ ଦିଆଗଲା ବୋଲି କୁହାଗଲା, ହେଲେ ରିଫିଲ କଲେ କେତେ ଜଣ ? ଗ୍ୟାସ ଦର କେତେ ଆପଣମାନେ ଜାଣନ୍ତି ।