ଚର୍ଚ୍ଚାକୁ ଆସିଲେ ପୁଲୱାମା ଆକ୍ରମଣରୁ ବଂଚିଯାଇଥିବା ଏହି ଯବାନ ! ସିଆପିଏଫ୍ ଗାଡିରେ ବସିଲା ସମୟରେ ହିଁ ହୋଇଯାଇଥିଲା ଛୁଟି ମଞ୍ଜୁର ।
ପୁଲଓ୍ଵାମା ଆକ୍ରମଣ ପରେ ସେ ଦିନର ହୃଦୟ ଥରାଇବା ଭଳି ଦୃଶ୍ୟ ଦେଖିଥିବା ଯବାନଙ୍କ ବୟାନ ଏବେ ସାମ୍ନାକୁ ଆସିବାରେ ଲାଗିଛି । ହଠାତ୍ କିଭଳି ଜୋରରେ ଶବ୍ଦ କରି ଚାରି ଆଡ଼ ଧୁଆଁ ପାଲଟି ଯାଇଥିଲା । କେହି କିଛି ବୁଝିବା ପୂର୍ବରୁ ୪୦ଜଣ ଯବାନ ସହିଦ୍ ହୋଇ ଯାଇଥିଲେ । ସେ ସବୁକୁ ମନେ ପକାଇ ଏବେ ପ୍ରତିଶୋଧର ନିଆଁରେ ଜଳୁଛନ୍ତି ଭାରତୀୟ ଯବାନ । ଏ ମଧ୍ୟରେ ଠାକା ବେଲକର ନାମକ ଜଣେ ଯବାନ କିପରି ଅଳ୍ପକେ ଏହି ଦୁର୍ଘଟଣାରୁ ବର୍ତ୍ତି ଯାଇଥିଲେ, ସେ ଘଟଣା ସାମ୍ନାକୁ ଆସିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଠାକାଙ୍କ ବିବାହ ଫେବୃଆରୀ ୨୪ରେ ହେବାକୁ ଥିବା ବେଳେ ସେ ଛୁଟି ପାଇଁ ଆବେଦନ କରିଥିଲେ । କିନ୍ତୁ ଶ୍ରୀନଗର ଯିବା ପର୍ୟ୍ୟନ୍ତ ତାଙ୍କ ଛୁଟି ଆବେଦନ ପତ୍ରକୁ ମଞ୍ଜୁରି ମିଳି ନଥିଲା । ଯାହା ପାଇଁ ସେ ଅନ୍ୟ ଯବାନମାନଙ୍କ ସହ ଶ୍ରୀନଗର ଯିବା ପାଇଁ ନିଷ୍ପତ୍ତି ନେଇଥିଲେ । କିନ୍ତୁ ବସରେ ବସିବା ପରେ ତାଙ୍କୁ ଛୁଟି ମଞ୍ଜୁର ହୋଇ ଯାଇଥିବା ଖବର ମିଳିଥିଲା । ଯାହା ପାଇଁ ସେ ବସରୁ ଓହ୍ଲାଇ ନିଜ ସାଥୀ ଯବାନମାନଙ୍କୁ ବିଦାୟ ଦେଇଥିଲେ । ଘରେ ପହଞ୍ଚିବା ପରେ ଠାକା ପୁଲଓ୍ଵାମାରେ ହୋଇଥିବା ଆତଙ୍କବାଦୀ ଆକ୍ରମଣ ବିଷୟରେ ଜାଣିବାକୁ ପାଇଥିଲେ । ଠାକା ଭାଇଙ୍କ କହିବା ଅନୁଯାୟୀ, ସେ ପୁଲଓ୍ଵାମା ଘଟଣା ବିଷୟରେ ଜାଣିବା ପରେ କାହା ସହ କଥା ହୋଇନାହାନ୍ତି । ବିବାହର ଖୁସି ମନାଇବେ ନା ସହିଦ୍ ଯବାନଙ୍କ ପାଇଁ ଦୁଃଖପ୍ରକାଶ କରିବେ ତାହା ସ୍ଥିର କରି ପାରୁନାହାନ୍ତି । ଏହି ଘଟଣା ତାଙ୍କୁ ସମ୍ପୂର୍ଣ୍ଣ ଭାବରେ ଭାଙ୍ଗି ଦେଇଥିବା କହିଛନ୍ତି ଠାକାଙ୍କ ଭାଇ ।