ହାଇଦ୍ରାବାଦ ହାଉସରେ ଆରମ୍ଭ ହେଲା ପୁଟିନ-ମୋଦିଙ୍କ ମଧ୍ୟରେ ଆଲୋଚନା : ଆଜି ସ୍ୱାକ୍ଷରିତ ହୋଇପାରେ ଏସ-୪୦୦ ପ୍ରତିରକ୍ଷା ବାୟୁ କ୍ଷେପଣାସ୍ତ୍ର ଚୁକ୍ତି
କନକ ବ୍ୟୁରୋ : ଦିଲ୍ଲୀ ହାଇଦ୍ରାବାଦ ହାଉସରେ ଆରମ୍ଭ ହେଲା ୧୯ତମ ଭାରତ-ରୁଷ୍ ଦ୍ୱିପାକ୍ଷିକ ବୈଠକ । ରୁଷ୍ ରାଷ୍ଟ୍ରପତି ଭ୍ଲାଦିମିର୍ ପୁଟିନ ଓ ପ୍ରଧାନମନ୍ତ୍ରୀ ମୋଦିଙ୍କ ମଧ୍ୟରେ ଏହି ବୈଠକ ଆରମ୍ଭ ହୋଇଥିବା ବେଳେ ପ୍ରାୟ ୨୦ଟି ରାଜିନାମା ସ୍ୱାକ୍ଷରିତ ହେବା କୁହାଯାଉଛି । ତେବେ ସର୍ବାଧିକ ଫୋକସ୍ ଏସ୍-୪୦୦ ଆଂଟି ମିସାଇଲ୍ ସିଷ୍ଟମ୍ ଡିଲ୍ ଉପରେ ରହିବ । ଆମେରିକୀୟ ପ୍ରତିବନ୍ଧକକୁ ଅଣଦେଖା କରି ଭାରତ ଏହି ଆଂଟି ମିସାଇଲ୍ ସିଷ୍ଟମ୍ ରୁଷ୍ ନିକଟରୁ କିଣିବାକୁ ଚାହୁଁଛି । ଅନ୍ୟପଟେ ପୁଟିନଙ୍କ ସହ ପ୍ରତିରକ୍ଷା, ପରମାଣୁ ଶକ୍ତି, ମହାକାଶ ଓ ଅର୍ଥନୀତି ପରି ପ୍ରମୁଖ କ୍ଷେତ୍ରରେ ପ୍ରଧାନମନ୍ତ୍ରୀ ମୋଦିଙ୍କ ଆଲୋଚନାର କାର୍ଯ୍ୟକ୍ରମ ରହିଛି । ଦିନ ୨ଟା ୩୦ରେ ଦୁଇ ଦେଶ ମଧ୍ୟରେ ଚୁକ୍ତିନାମା ବିନିମୟର କାର୍ଯ୍ୟକ୍ରମ ରହିଛି । ଦୁଇଦିନିଆ ଭାରତ ଗସ୍ତରେ ଅଛନ୍ତି ପୁତିନ୍ ଆଉ ଏହି ଗସ୍ତଉପରେ ସାରା ବିଶ୍ୱର ନଜର ରହିଛି । ଗତକାଲି ପୁତିନ ଭାରତ ପହଁଚିବା ପରେ ପ୍ରଧାନମନ୍ତ୍ରୀ ମୋଦି ତାଙ୍କୁ ନୈଶଭୋଜିରେ ଆପ୍ୟାୟିତ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଏସ୍ ୪୦୦ ଆଂଟି ମିସାଇଲ୍ ସିଷ୍ଟମ୍ ପ୍ରସ୍ତାବ ଉପରେ ଚୂଡ଼ାନ୍ତ ମୋହର ବାଜିବା ପରେ ଭାରତ ୨୪ ମାସ ମଧ୍ୟରେ ଏହି ବ୍ୟବସ୍ଥା ହାସଲ୍ କରିବ । ପୂର୍ବରୁ ୨୦୧୪ ମସିହାରେ ଚୀନ ରୁଷ୍ ପାଖରୁ ଏସ୍ ୪୦୦ ମିସାଇଲ୍ ସିଷ୍ଟମ୍ କ୍ରୟ କରିସାରିଛି । ଏସ୍ ୩୦୦ ସିଷ୍ଟମ୍ର ଉନ୍ନତ ସଂସ୍କରଣ ଭାବେ ରୁଷ୍ ଏସ୍ ୪୦୦ ଆଂଟି ମିସାଇଲ୍ ସିଷ୍ଟମ୍ ନିର୍ମାଣ କରିଥିବା ବେଳେ ଆଗକୁ ଏହି ବ୍ୟବସ୍ଥା ହାସଲ୍ କରି ଦକ୍ଷିଣ ଏସିଆର ପ୍ରମୁଖ ଶକ୍ତିଭାବେ ନିଜ ଉପସ୍ଥିତି ଜାହିର୍ କରିବ । ପୁତିନଙ୍କ ଭାରତଗସ୍ତ ବେଳେ ଚୂଡ଼ାନ୍ତ ହେବ ଏହି ଡିଲ୍ । ପାକିସ୍ତାନ ଓ ଚୀନ ଭାରତପାଇଁ ଆହ୍ୱାନ ସୃଷ୍ଟି କରୁଥିବାରୁ ଏଥିସହ ଭାରତ ହେବ ଶକ୍ତିଶାଳୀ ।