ଯୋଗେଶ ସିଂଙ୍କ ସଭ୍ୟ ପଦ ରଦ୍ଦ ପରେ କଂଗ୍ରେସ ବିରୋଧୀଦଳ ମାନ୍ୟତା ହରାଇନେବା ଚର୍ଚ୍ଚା ! ବିରୋଧୀ ଦଳ ନେତା ନରସିଂହ ମିଶ୍ର କହିଲେ, ନିଷ୍ପତି ନେବେ ବାଚସ୍ପତି
କନକ ବ୍ୟୁରୋ : ସୁନ୍ଦରଗଡ ବିଧାୟକ ଯାଗେଶ ସିଂଙ୍କ ସଭ୍ୟ ପଦ ରଦ୍ଦ ପରେ କଂଗ୍ରେସ ବିରୋଧୀଦଳ ମାନ୍ୟତା ହରାଇବା ଚର୍ଚ୍ଚା ଆରମ୍ଭ ହୋଇଛି । ବିରୋଧୀ ଦଳ ନେତା ନରସିଂହ ମିଶ ଏନେଇ ପ୍ରତିକ୍ରିୟା ରଖିଛନ୍ତି । କହିଛନ୍ତି, ଆଇନ ଅନୁସାରେ ୧୦ ପ୍ରତିଶତରୁ କମ ସଦସ୍ୟ ରହିଲେ, ବିରୋଧୀ ଦଳ ମାନ୍ୟତା ହରାଇବା କଥା ଏବଂ ଏନେଇ ବିଧାନସଭା ବାଚସ୍ପତି ଯାହା ନିଷ୍ପତି ନେବେ ବୋଲି କହିଛନ୍ତି ନରସିଂହ । ବିଜେପୁର ବିଧାୟକ ସୁବଳ ସାହୁଙ୍କ ଦେହାନ୍ତ ପରେ ବିଧାନସଭାରେ କଂଗ୍ରେସର ସଭ୍ୟ ସଂଖ୍ୟା ୧୫କୁ ଖସିଆସିଥିଲା । ଏବେ ଜାଲ ଜାତିଗତ ପ୍ରମାଣପତ୍ର ବିବାଦରେ ଯୋଗେଶ ସିଂଙ୍କ ପଦ ଯିବା ପରେ ଏହି ସଂଖ୍ୟା ୧୪କୁ ଖସିଆସିଛି । ନିୟମ ଅନୁସାରେ ବିଧାନସଭାର ମୋଟ ସଭ୍ୟ ସଂଖ୍ୟା ୧୪୭ ର ୧୦ ପ୍ରତିଶତ ମୁଖ୍ୟ ବିରୋଧୀ ଦଳ ନିକଟରେ ରହିବା କଥା । ଆଗକୁ ବିଧାନସଭାରେ ବଜେଟ ଅଧିବେଶନ ଥିବାରୁ ବାଚସ୍ପତିଙ୍କ ନିଷ୍ପତି ଉପରେ ନିର୍ଭର କରୁଛି କଂଗ୍ରେସର ଭାଗ୍ୟ ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଜାତିକୁ ନେଇ ଭୁଲ ତଥ୍ୟ ଦେଇଥିବାରୁ କଂଗ୍ରେସର ସୁନ୍ଦରଗଡ ବିଧାୟକ ଯୋଗେଶ ସିଂହଙ୍କ ବିଧାୟକ ପଦକୁ ରଦ୍ଦ କରିଦେଇଛନ୍ତି ହାଇକୋର୍ଟ । ୨୦୧୪ ସୁନ୍ଦରଗଡ ବିଧାନସଭା ନିର୍ବାଚନକୁ କୋର୍ଟ ଅସିଦ୍ଧ ଘୋଷଣା କରିଛନ୍ତି ଓଡିଶା ହାଇକୋର୍ଟ । ସୁନ୍ଦରଗଡ ଆସନରୁ ୨୦୦୯ ଓ ୨୦୧୪ରେ ଦୁଇ ଦୁଇଥର ବିଧାନସଭାକୁ ନିର୍ବାଚିତ ହୋଇଥିବା ଯୋଗେଶ ସିଂଙ୍କ ପାଇଁ ମିଥ୍ୟା ସତ୍ୟପାଠ ମହଙ୍ଗା ପଡିଛି । ଜାଲ ଜାତିଗତ ପ୍ରମାଣପତ୍ର ଦେଇ ୨୦୧୪ ଜିତିଥିବାରୁ ନିର୍ବାଚନକୁ ଅସିଦ୍ଧ ଘୋଷଣା କରିବା ସହ ତାଙ୍କ ସଭ୍ୟପଦକୁ ରଦ୍ଦ କରିଦେଲେ ହାଇକୋର୍ଟ । ବିଜେପିର ପରାଜିତ ପ୍ରାର୍ଥୀ ଶହଦେବ ଖାକା ଓ ଅନ୍ୟଜଣେ ବ୍ୟକ୍ତି ଅଜୟ ପଟେଲଙ୍କ ଅଭିଯୋଗର ଶୁଣାଣି କରି କୋର୍ଟ ଗତକାଲି ଏହି ରାୟ ଶୁଣାଇଥିଲେ ।