ମେଘାଳୟ ଓ ନାଗାଲାଣ୍ଡ ବିଧାନସଭା ପାଇଁ ମତଦାନ ଆରମ୍ଭ ! ୫୯ଟି ଲେଖାଁଏ ଆସନରେ ଚାଲିଛି ଭୋଟିଂ
କନକ ବ୍ୟୁରୋ: ମେଘାଳୟ ଓ ନାଗାଲାଣ୍ଡରେ ଆଜି ଭୋଟ୍ । ଉତ୍ତରପୂର୍ବ ଭାରତର ୨ଟି ରାଜ୍ୟ ମେଘାଳୟ ଓ ନାଗାଲାଣ୍ଡରେ ଆଜି ବିଧାନସଭା ନିର୍ବାଚନ ପାଇଁ ଆଜି ଭୋଟ୍ ଗ୍ରହଣ କରାଯାଉଛି । ନାଗାଲାଣ୍ଡର କିଛି ଜିଲ୍ଲାକୁ ଛାଡି ଦେଲେ ବାକି ସମସ୍ତ ଅଂଚଳରେ ସକାଳ ୭ଟାରୁ ଅପରାହ୍ନ ୩ଟା ଯାଏଁ ଭୋଟ ଗ୍ରହଣ କରାଯିବ । ମେଘାଳୟ ଓ ନାଗାଲାଣ୍ଡର ଫଳାଫଳ ମଧ୍ୟ ତ୍ରିପୁରା ସହ ମାର୍ଚ୍ଚ ୩ ତାରିଖରେ ପ୍ରକାଶ ପାଇବ । ୬୦ ଆସନ ବିଶିଷ୍ଟ ମେଘାଳୟର ବିଧାନସଭା ଆସନ ପାଇଁ ଏଥର ପ୍ରତିଦ୍ୱନ୍ଦିତା କରୁଛନ୍ତି ୩୭୦ ଜଣ ପ୍ରାର୍ଥୀ । ରାଜ୍ୟରେ ମୋଟ ୩ ହଜାର ୮୩ଟି ମତଦାନ କେନ୍ଦ୍ରରେ ଭୋଟ ଦେଇ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ ୧୮.୪ ଲକ୍ଷ ଭୋଟର । ସେପଟେ ୬୦ ଆସନ ବିଶିଷ୍ଟ ନାଗାଲାଣ୍ଡ ବିଧାନସଭା ପାଇଁ ଆଜି ୨ ହଜାର ୧୫୬ଟି ମତଦାନ କେନ୍ଦ୍ରରେ ଭୋଟ ଗ୍ରହଣ କରାଯାଉଛି । ୧୧ ଲକ୍ଷ ୯୧ ହଜାର ୫୧୩ ଭୋଟର ସେମାନଙ୍କ ମତ ସାବ୍ୟସ୍ତ କରିିବେ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଥାଉ କି, ୬୦ ବିଧାନସଭା ଆସନ ବିଶିଷ୍ଟ ଉଭୟ ମେଘାଳୟ ଏବଂ ନାଗାଲାଣ୍ଡ ରାଜ୍ୟରେ ୫୯ଟି ଲେଖାଏଁ ନିର୍ବାଚନ ମଣ୍ଡଳୀ ପାଇଁ ନିର୍ବାଚନ ହେଉଛି । ନିର୍ବାଚନ ଜିତିବା ପାଇଁ ଉଭୟ ବିଜେପି ଏବଂ କଂଗ୍ରେସ ଜୋରସୋର ଉଦ୍ୟମ ଜାରି ରଖିଥିବା ବେଳେ ନିର୍ଦ୍ଦିଷ୍ଟ ଭାବେ ମେଘାଳୟରେ କଂଗ୍ରେସ ପାଇଁ ଚଳିତ ଥରର ନିର୍ବାଚନ ଅଧିକ ଗୁରୁତ୍ୱପୂର୍ଣ୍ଣ ହୋଇପଡ଼ିଛି । ଗତ ୧୦ବର୍ଷ ହେଲା ମେଘାଳୟରେ କ୍ଷମତା ଅକ୍ତିଆର କରିଥିବା କଂଗ୍ରେସ ପାଇଁ ଏହା ସମ୍ମାନର ପ୍ରଶ୍ନ ହୋଇଛି । ମେଘାଳୟରେ କଂଗ୍ରେସ ୫୯ ଜଣ ପ୍ରାର୍ଥୀ ଦେଇଥିବା ବେଳେ ବିଜେପି ୪୯ ଜଣଙ୍କୁ ଛିଡ଼ା କରାଇଛି । ସେହିପରି ୧୯୬୩ ମସିହାରେ ନାଗାଲାଣ୍ଡ୍ ଗଠନ ପରଠାରୁ ରାଜ୍ୟକୁ ୩ ଥର ମୁଖ୍ୟମନ୍ତ୍ରୀ ଦେଇଥିବା କଂଗ୍ରେସ ଏଥର ମାତ୍ର ୧୮ଟି ଆସନରୁ ଲଢ଼ୁଥିବାବେଳେ ବିଜେପି ୨୦ଟି ଆସନରେ ପ୍ରାର୍ଥୀ ଦେଇଛି ।
ସେହିପରି ବିଜେପିର ସହଯୋଗୀ ଏନଡିପିପି (ନ୍ୟାସନାଲ ଡିମୋକ୍ରାଟିକ୍ ପ୍ରୋଗ୍ରେସିଭ୍ ପାର୍ଟି) ୪୦ଟି ଆସନରୁ ଲଢ଼ୁଛି । ମେଘାଳୟରେ ମୋଟ ୧୮ଲକ୍ଷ ୪୦ ହଜାର ଭୋଟର ୩,୦୮୩ ମତଦାନ କେନ୍ଦ୍ରରେ ୩୭୦ ଜଣ ଆଶାୟୀଙ୍କ ଭାଗ୍ୟ ନିର୍ଣ୍ଣୟ କରିବେ । ରାଜ୍ୟରେ ପ୍ରଥମ ଥର ପାଇଁ କେବଳ ମହିଳାଙ୍କ ପାଇଁ ୬୭ଟି ମତଦାନ କେନ୍ଦ୍ର ଏବଂ ୬୧ଟି ଆଦର୍ଶ ମତଦାନ କେନ୍ଦ୍ର ସ୍ଥାପନ କରାଯାଇଥିବା ମେଘାଳୟର ମୁଖ୍ୟ ନିର୍ବାଚନ ଅଧିକାରୀ ଏଫ୍ଆର୍ ଖାରକୋଙ୍ଗୋର ସୂଚନା ଦେଇଛନ୍ତି । ସେହିପରି ନାଗାଲାଣ୍ଡରେ ସମୁଦାୟ ୧୧,୯୧,୫୧୩ ଭୋଟର ୨,୧୫୬ ମତଦାନ କେନ୍ଦ୍ରରେ ମତଦାନ ହେଉଛି ।