ତିନି ବର୍ଷ ପରେ ପୁଣି ତାଜା ହୋଇଛି ନଗଡାର ନଗ୍ନ ଚିତ୍ର: ଭୋକର ଭୂଗୋଳ ଭିତରେ ଖାଦ୍ୟ ଖୋଜୁଛି ନଗଡାର ଭାଗ୍ୟ
ଭୋକର ଭୂମିରେ ଅଟକିଗଲା ବିକାଶର ଗାଡି଼...
କନକ ବ୍ୟୁରୋ: ତିନି ବର୍ଷ ତଳେ ନିଦ ହଜାଇ ଦେଇଥିବା ନଗଡ଼ାର ନଗ୍ନଚିତ୍ର ଏବେ ତିନି ବର୍ଷ ପରେ ପୁଣି ତାଜା ହୋଇଛି । ଭୋକର ଭୂମିରେ ସରକାର ବିକାଶର ବୀଜ ବୁଣିବା ପରେ ଯଦିଓ କିଛିଟା ପରିବର୍ତ୍ତନ ଆସିଛି ହେଲେ ତଥାପି ନଗଡାବାସୀଙ୍କ ପେଟରୁ ଭୋକ ମିରିନି । ତାଙ୍ଗ ନିଦୁଆ ଆଖିରୁ ନେହୁରାର ଠାର ଜମା ଯାଇନି । ଏବେବି ନଗଡାବାସୀ ଭାତ ଆଉ ଆଳୁ ଖାଇ ବଞ୍ଚୁଥିବାର ଚିତ୍ର ସାମ୍ନାକୁ ଆସିଛି । ସରକାର ମାସକୁ ୩୫ କିଲୋ ଚାଉଳ ଦେଇ ତାଙ୍କ କାମ ସାରି ଦେଉଥିବା ବେଳେ ଭାତ ସହ ତରକାରୀ ପାଇଁ ଡାଲି ସଉଦା କେଉଁଠୁ ଆଣିବେ ବୋଲି ପ୍ରଶ୍ନ କରିଛନ୍ତି ନଗଡ଼ାବାସୀ । ଉତ୍ତମ ଖାଦ୍ୟ ପାଉନଥିବାରୁ ନଗଡାରେ ରହୁଥିବା ଅନେକ ପିଲା ବିଭିନ୍ନ ରୋଗରେ ଆକ୍ରାନ୍ତ ହେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଶିଶୁ ମୃତ୍ୟୁର ଉପତ୍ୟାକା ପାଲଟିଥିବା ଯାଜପୁର ଜିଲ୍ଲାର ନଗଡା ଅପପୃଷ୍ଟି ପାଇଁ ୨୦୧୬ରେ ସାରା ଦେଶରେ ଚର୍ଚ୍ଚାର ପରିସରକୁ ଆସିଥିଲା । ଅପପୃଷ୍ଟିରେ ୧୯ ଶିଶୁଙ୍କ ପ୍ରାଣହାନୀ ପରେ ସାମ୍ନାକୁ ଆସିଥିଲା ନଗଡ଼ାର ନଗ୍ନ ଚିତ୍ର । ନଗଡାକୁ ନେଇ ସାରା ଦେଶରେ ଚର୍ଚ୍ଚା ହେବା ପରେ ନଗଡାର ବିକାଶ ପାଇଁ ଅଂଟା ଭିଡିଥିଲେ ସରକାର । ଯୁଦ୍ଧକାଳୀନ ଭିତ୍ତିିରେ ଆରମ୍ଭ ହୋଇଥିଲା ନଗଡାର ଉନ୍ନୟନ କାର୍ଯ୍ୟ । ନଗଡାର ଜୁଆଙ୍ଗ ଆଦିବାସୀଙ୍କୁ ମୌଳିକ ସୁବିଧା ଯୋଗାଇ ଦେବାକୁ ୩ ବର୍ଷରେ ଖର୍ଚ୍ଚ ହୋଇଛି ପ୍ରାୟ ୨୪ କୋଟି ଟଙ୍କା ।
ନଗଡାର ୬୦ ପରିବାରକୁ ପକ୍କା ଘର ଯୋଗାଇ ଦିଆଯାଇଛି । ଲୋକଙ୍କୁ ପାନୀୟ ଜଳ ଯୋଗାଇ ଦେବା ପାଇଁ ଖର୍ଚ୍ଚ ହୋଇଛି ୫୩ ଲକ୍ଷ ୫୬ ହଜାର ଟଙ୍କା । ହେଲେ ଏବେ ବି ଷ୍ଟାଣ୍ଡ୍ ପୋଷ୍ଟଗୁଡ଼ିକ ଅଚଳ । ଅଧାରେ ପଡ଼ିଛି ଅଧିକାଂଶ ପାଇପ୍ କାମ । ପାଇପ ପାଣି ନମିଳିବାରୁ ବାଧ୍ୟ ହୋଇ ଲୋକେ ଝରଣା ଓ ଚୁଆର ପାଣି ପିଉଛନ୍ତି । ପିଇବା ପାଣି ପାଇଁ ସେମାନଙ୍କୁ ବହୁ ଦୂରକୁ ଯିବାକୁ ପଡ଼ୁଛି । ବିଜୁଳି ସଂଯୋଗ ପାଇଁ ୧ କୋଟି ୮୦ ଲକ୍ଷ ଟଙ୍କା ବ୍ୟୟ କରାଯାଇଛି । ହେଲେ ଏବେ ବି କୌଣସି ଘରକୁ ବିଜୁଳି ସଂଯୋଗ ହୋଇପାରିନି । ପରିତ୍ୟକ୍ତ ଅବସ୍ଥାରେ ପଡ଼ିଛି ମେନ୍ ସୁଇଜ୍ ଓ ମିଟର ।
ନଗଡାକୁ ରାସ୍ତା ନଥିବାରୁ ରାସ୍ତା ତିଆରି ପାଇଁ ୧୭ କୋଟି ଟଙ୍କା ଖର୍ଚ୍ଚ ହୋଇଛି । ଅପହଞ୍ଚ ପାହାଡି ଇଲାକାକୁ ନାଲି ଗୋଡି ରାସ୍ତା ମେଲିଛି । ଅଶୋକଝରରୁ ନଗଡ଼ା ପର୍ଯ୍ୟନ୍ତ ଲମ୍ବିଛି ୭.୮ କିଲୋମିଟରର ପଥର-ମୋରମ ରାସ୍ତା । ହେଲେ ଆଗକୁ ବର୍ଷା ଆସିଲେ ପୁଣି ରାସ୍ତାରୁ ମୋରମ ଉଠିଯିବ । ଆଣ୍ଠୁଏ ଆଣ୍ଠୁଏ କାଦୁଅ ହେବ । ନଗଡ଼ା ପୁଣି ଥରେ ବାହ୍ୟଜଗତରୁ ବିଚ୍ଛିନ୍ନ ହୋଇଯିବେ । ଆଉ ତାପରେ ନଗଡା ଯେମିତି ଥିଲା ସେମିତି ରହିଯିବ ।
ରାସ୍ତା ହେବା ପରେ ଦୁଇ ବର୍ଷ ତଳେ ପାହାଡ଼ ଉପରକୁ ଗଡିଥିଲା ବିଜୁ ଗାଡ଼ି । ଦେଓଗାଁ ପର୍ଯ୍ୟନ୍ତ ଚାଲିିଥିଲା ଏହି ବସ୍ । ମାତ୍ର ଚାରି ଦିନ ଚାଲିବା ପରେ ବସ୍ ବନ୍ଦ ହୋଇଗଲା । ଆଉ ତାପରେ ନଗଡାବାସୀଙ୍କ ବାହାରକୁ ଯିବା ସ୍ୱପ୍ନ ପାହାଡ ଭିତରେ ସମାଧି ନେଇଗଲା । ବସ ବନ୍ଦ ପରେ ଏବେ ସପ୍ତାହକୁ ଥରେ ଅର୍ଥାତ କେବଳ ଶନିବାର ଦିନ ନଗଡ଼ାରେ ମିଳୁଛି ଅଟୋ । ବାହରକୁ ଯିବା ହେଉ କିମ୍ବା ଅନ୍ତ୍ୟୋଦୟ ଯୋଜନାରେ ପରିବାର ପିଛା ୩୫ କେଜି ଚାଉଳ ଆଣିବା ପାଇଁ ସେମାନଙ୍କୁ ଯିବାକୁ ପଡ଼ୁଛି କାଳିଆପାଣି । ଆଉ କାଳିଆପାଣି ଯିବା ପାଇଁ ଦେବାକୁ ପଡୁଛି ୪୦ ଟଙ୍କା ଓ ଆସିବା ପାଇଁ ୪୦ ଟଙ୍କା ।
ନଗଡାରେ ଡାକ୍ତରୀ ସେବା ସ୍ୱପ୍ନ ପାଲଟିଛି । ଆଗରୁ ନିୟମିତ ଭାବେ ଡାକ୍ତରୀ ଦଳ ଆସି ଲୋକଙ୍କ ସ୍ୱାସ୍ଥ୍ୟ ପରୀକ୍ଷା କରୁଥିଲେ, ହେଲେ ଏବେ କେହି ଆସୁନଥିବା ଅଭିଯୋଗ ହୋଇଛି । ତେବେ ୩ ବର୍ଷ ପରେ ଭୋକର ଇଲାକାରୁ ଆସିଥିବା ସତ, ସରକାରଙ୍କ ପାରିବା ପଣିଆ ଉପରେ ଆଙ୍ଗୁଠି ଉଠାଇଛି । ବିକାଶର ନାରା ଦେଇ ନଗଡାରେ ସରକାର ଯେଉଁ ବିକାଶର ଗାଡି ଗଡାଇଥିଲେ ତାହା ଅଧା ବାଟରେ ଅଟକିଛି । ତେବେ ଅଧା ଅଧୁରା ହୋଇ ପଡିଥିବା କାମକୁ ପୂରା କରି ସରକାର ନଗଡାବାସୀଙ୍କୁ କେବେ ଶାନ୍ତିର ନିଦ ଦେଉଛନ୍ତି ତାକୁ ଅପେକ୍ଷା ।