ନବରଙ୍ଗପୁର ରାଇଘରରେ ମଶାଣିକୁ ନେଇ ବିବାଦର ନୂଆମୋଡ: ପୁଲିସ ଜୋର ଜବରଦସ୍ତି ମୃତଦେହ ପୋତି ଦେଇଥିବା ଅଭିଯୋଗ, ପ୍ରତିବାଦରେ ରାସ୍ତାରୋକ, ତହସିଲ ଅଫିସ ଘେରାଉ
କନକ ବ୍ୟୁରୋ: ନବରଙ୍ଗପୁର ରାଇଘରରେ ମଶାଣିକୁ ନେଇ ଚାଲିଥିବା ବିବାଦ ନୂଆମୋଡ ନେଉଛି । ଶବ ରଖି ରାସ୍ତାରୋକ କରିଥିବା ଗ୍ରାମବାସୀ ଆଜି ତହସିଲ କାର୍ଯ୍ୟାଳୟ ଘେରାଉ କରିଛନ୍ତି । ରାଇଘର ପତ୍ରକୋଟି ଓ ଧୋଡ୍ରାପର ଗାଁ ମଧ୍ୟରେ ମଶାଣି ଜମିକୁ ନେଇ ବିବାଦ ଲାଗି ରହିଥିବା ବେଳେ ଏହାକୁ ସମାଧାନ କରିବା କ୍ଷେତ୍ରରେ ବିଫଳ ହୋଇଛନ୍ତି ପ୍ରଶାସନିକ ବାବୁ । ଗତକାଲି ପୁଲିସ ଓ ବ୍ଲକ ପ୍ରଶାସନ ଆନ୍ଦୋଳନକାରୀଙ୍କ ସହ ଆଲୋଚନା କରି ବିଫଳ ହେବା ପରେ ମୃତଦେହ ରଖି ରାସ୍ତାରୋକ ଜାରି ରହିଥିଲା ।
Kanak News is now on WhatsApp
Join and get latest news updates delivered to you via WhatsApp
ରାତିରେ ବର୍ଷା ହେବା ଯୋଗୁଁ ଆନ୍ଦୋଳନକାରୀ ରାସ୍ତାରୁ ଉଠି ଯାଇଥିବା ବେଳେ ମୃତଦେହ ରାସ୍ତା ଉପରେ ବର୍ଷାରେ ପଡି ରହିଥିଲା । ଫଳରେ ମୃତଦେହର ବ୍ୟବଚ୍ଛେଦ ପାଇଁ ପ୍ରଶାସନ ପକ୍ଷରୁ ଉଦ୍ୟମ କରାଯାଇଥିଲା । ପୁଲିସ ରାତିରେ ମୃତ ବୃଦ୍ଧାଙ୍କ ପୁଅ ଜଗନ୍ନାଥ ହରିଜନଙ୍କୁ ମିଛ କହି ଘରୁ ଡାକି ଆଣିଥିଲେ । ଏହାପରେ ଜୋର ଜବରଦସ୍ତି ରାଇଘର ତହସିଲ ଅଫିସ ପଛପଟେ ପୋତି ଦେଇଥିବା ଅଭିଯୋଗ କରିଛନ୍ତି ମୃତକଙ୍କ ସଂପର୍କୀୟ ।
ଏହା ପ୍ରତିବାଦରେ ଆଜି ବି ରାସ୍ତାରୋକ ଜାରି ରହିଥିବା ବେଳେ ଦୋକାନ ବଜାର ବନ୍ଦ ରହିଛି । ଆନ୍ଦୋଳନକାରୀ ତହସିଲ କାର୍ଯ୍ୟାଳୟକୁ ଘେରାଉ କରିଛନ୍ତି । ପରିସ୍ଥିତିକୁ ନଜରରେ ରଖି ରାଇଘରରେ ୨ ପ୍ଲାଟୁନ୍ ପୋଲିସ ମୁତୟନ କରାଯାଇଛି ।