କନକ ବ୍ୟୁରୋ : ପୁଣି କାନ୍ଧରେ ବୁହାହେଲେ ପ୍ରସୂତୀ । ଘନଅନ୍ଧାର ସାଙ୍ଗକୁ ବର୍ଷା ରାତି । ଏହାରି ଭିତରେ ପ୍ରସୂତୀଙ୍କୁ ଭାରରେ ୪ କିଲୋମିଟର ରାସ୍ତା ବୋହିଲେ ସମ୍ପର୍କୀୟ । ଦୁର୍ଗମ ଅଂଚଳ ହୋଇଥିବାରୁ ଗାଁକୁ ଆସି ପାରିଲାନି ଆମ୍ବୁଲାନ୍ସା । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ଉମରକୋଟ ବ୍ଲକର ପହଁରିକୁମୁଡା ଗାଁରେ ।
Kanak News is now on WhatsApp
Join and get latest news updates delivered to you via WhatsApp
ପହଁରିକୁମୁଡା ଗାଁର ଜଣେ ମହିଳାଙ୍କର ପ୍ରସୂତୀ ଯନ୍ତ୍ରଣା ହେବାରୁ ଆଶା କର୍ମୀ ଆମ୍ବୁଲାନ୍ସକୁ ଫୋନ କରିଥିଲେ, ହେଲେ ଦୁର୍ଗମ ଅଂଚଳ ହୋଇଥିବାରୁ ଗାଁରେ ପହଂଚି ପାରିନଥିଲା ଆମ୍ବୁଲାନ୍ସ । ଗାଁ ଠାରୁ ୪ କିଲୋମିଟର ଦୂରରେ ଅଟକି ରହିଥିଲା ଆମ୍ବୁଲାନ୍ସ । ରାତି ପ୍ରାୟ ୧୧ଟାରେ ପ୍ରସୂତୀଙ୍କୁ ଖଟିଆରେ ଶୁଆଇ, ଉପରେ ଜରି ପାଲ ଘୋଡାଇ ଆମ୍ବୁଲାନ୍ସ ପାଖକୁ ଆଣିଥିଲେ ସମ୍ପର୍କୀୟ । ରାତି ୨ଟା ବେଳେ ପ୍ରସୂତୀ ଜଣଙ୍କ ଆମ୍ବୁଲାନ୍ସ ପାଖରେ ପହଂଚିଥିଲେ । ସେତେବେଳକୁ ସେ ଏକ ଶିଶୁପୁତ୍ରକୁ ଜନ୍ମ ଦେଇ ସାରିଥିଲେ । ଭାଗ୍ୟ ବଶତଃ ମା’ ଓ ନବଜାତକ ଦୁଇ ଜଣ ସୁସ୍ଥ ଥିବା ବେଳେ ସେମାନଙ୍କୁ ଉମରକୋଟ ଡାକ୍ତରଖାନାକୁ ନିଆଯାଇଥିଲା ।