କାଳିଆ ପ୍ୟାକେଜକୁ କଳାତ୍ମକ କହିଲା ନବନିର୍ମାଣ କୃଷକ ସଂଗଠନ । ନିର୍ବାଚନ ପୂର୍ବରୁ ବାହାନା ଅଭିଯୋଗ କଲା ସଂଗଠନ
କାଳିଆ ପ୍ୟାକେଜକୁ କଳାତ୍ନକ କହିଲା ନବନିର୍ମାଣ କୃଷକ ସଂଗଠନ
କନକ ବ୍ୟୁରୋ : ରାଜ୍ୟ ସରକାର ଚାଷୀଙ୍କ ପାଇଁ ଗତକାଲି କାଳିଆ ଯୋଜନା ଘୋଷଣା କରିଛନ୍ତି । ତେବେ ସରକାର ଏହି ଯୋଜନା ଘୋଷଣା କରିବା ପରେ ରାଜନୀତି ତେଜିବାରେ ଲାଗିଛି । ମିଳିଥିବା ସୂଚନା ଅନୁସାରେ ଏହି ଯୋଜାନକୁ ବିରୋଧ କରିଛି ନବନିର୍ମାଣ କୃଷକ ସଂଗଠନ । ଯୋଜନାକୁ କଟାକ୍ଷ କରି କଳାତ୍ମକ ଯୋଜନା ବୋଲି କହିଛି ସଂଘ । ରାଜସ୍ଥାନ, ମଧ୍ୟପ୍ରଦେଶ ଓ ଛତିଶଗଡ ସରକାର ଚାଷୀମାନଙ୍କ ଋଣ ଛାଡ କରିବା ପରେ ଓଡିଶା ସରକାର ଝାଳ ନାଳ ହୋଇ ତରତର ହୋଇ ଯୋଜନା କରିଥିବା ସଂଘ ଅଭିଯୋଗ କରିଛି । ସରକାରଙ୍କ ଏହି ଯୋଜନା ଉପରେ ଗୁମର ଖୋଲିଛନ୍ତି ନବିନିର୍ମାଣ କୃଷକ ସଂଗଠନର ରାଷ୍ଟ୍ରୀୟ ସଂଯୋଜକ ଅକ୍ଷୟ କୁମାର ।
Kanak News is now on WhatsApp
Join and get latest news updates delivered to you via WhatsApp
ଶ୍ରୀ କୁମାର କହିଛନ୍ତି ଯେ, ସରକାର ଯେଉଁ ଯୋଜନା ଘୋଷଣା କରିଛନ୍ତି ତାହା ପୂର୍ବରୁ ଚାଷୀଙ୍କ ପାଇଁ ଅନେକ ଯୋଜନା ରହିଛି । ତେଣୁ ସରକାର ସେହି ଯୋଜନାରେ ଟଙ୍କା ଖର୍ଚ୍ଚ ନକରି କିପରି ଭାବରେ ପୁଣି ଥରେ ନୂଆ ଯୋଜନା ଘୋଷଣା କରିଛନ୍ତି ସେନେଇ ଶ୍ରୀ କୁମାର ପ୍ରଶ୍ନ କରିଛନ୍ତି । ଏହାସହ ସେ କହଛନ୍ତି ଯେ, ସରକାର ଆଗାମୀ ନିର୍ବାଚନକୁ ଦୃଷ୍ଟିରେ ରଖି ଏପରି ଯୋଜନା କରିଛନ୍ତି । ୨୦୧୭-୨୮ ଆର୍ଥିକ ବର୍ଷରେ ଚାଷୀଙ୍କ ଉନ୍ନତି ପାଇଁ ୨୩୭୭ କୋଟି ଥିବା ସମୟରେ ରାଜ୍ୟ ସରକାର ୫୦୦ କୋଟି ଟଙ୍କା ପ୍ରାବଧାନର ବ୍ୟବସ୍ଥା କରିଥିଲେ । ତେବେ ନାବାର୍ଡ ଗତବର୍ଷ ୧୭ ହଜାର କୋଟିର ଯୋଜନା ରଖଥିବା ବେଳେ ୨୦୧୮-୧୯ ଆର୍ଥିକ ବର୍ଷ ପାଇଁ ୪୦ ହଜାର କୋଟି ଟଙ୍କା ଯୋଜନା ରହିଛି ।
ଏହାସହ ପୂର୍ବରୁ ମନରେଗା ଯୋଜନାରେ ଗୃହପାଳିତ ପଶୁମାନଙ୍କ ପାଇଁ ଅନେକ ଯୋଜନା ରହିଛି । ଗ୍ରାମାଞ୍ଚଳରେ ଚାଷୀଙ୍କ ପାଇଁ ମଧ୍ୟ ଯୋଜନା ରହିଛି । ହେଲେ ସେହି ଯୋଜନାକୁ ଏବେ ସରକାର ଏକ ନୂଆ ରୂପରେ ଦେବାକୁ ଚେଷ୍ଟା କରୁଥିବା ଶ୍ରୀ କୁମାର କହିଛନ୍ତି । ଏହାସହ ବିନା ବାଧାରେ ଚାଷୀମାନଙ୍କୁ ୧ ଲକ୍ଷ ଟଙ୍କା ପର୍ଯ୍ୟନ୍ତ ଜାତୀୟ ବ୍ୟାଙ୍କରୁ ଋଣ ଦିଆଯିବ ବୋଲି ଭାରତୀୟ ରିଜର୍ଭ ବ୍ୟାଙ୍କର ଗାଇଡଲାଇନ ରହିଛି । ତେବେ ସେହି ଗାଇଡଲାଇନ ଅନୁସାରେ ରାଜ୍ୟ ସରାକର କେତେ ଚାଷୀଙ୍କୁ ଋଣ ଦେଇଛନ୍ତି ବୋଲି ପ୍ରଶ୍ନ କରିଛନ୍ତି ଅକ୍ଷୟ ।
ଏହାସହ ଭାଗଚାଷୀମାନଙ୍କୁ ଚିହ୍ନଟ କରିବା ଏକ ଜଟିଳ ପ୍ରକ୍ରିୟା ବୋଲି କହି ରାଜ୍ୟ ସରକାର ଏଡାଇ ଚାଲିଛନ୍ତି । ତେବେ ବର୍ତମାନ ସମୟରେ ଭାଗଚାଷୀକୁ ବିନା ଚିହ୍ମଟ କରି ଚାଷୀମାନଙ୍କୁ କିପରି ସହାୟତା ଦିଆଯାଇପାରିବ ବୋଲି ଶ୍ରୀ କୁମାର ପ୍ରଶ୍ନ କରିଛନ୍ତି । ଚାଷୀଙ୍କ ପାଇଁ ବଜେଟରେ ବିଭିନ୍ନ ପ୍ରକାର ଯୋଜନା କରାଯାଉଛି । ହେଲେ ପ୍ରକୃତରେ ତାହାର ଲାଭ ଚାଷୀମାନେ ପାଉନଥିବା ଅକ୍ଷୟ ଅଭିଯୋଗ କରିଛନ୍ତି । ସରକାର ବର୍ତମାନ ସମୟରେ ଚାପ ଗ୍ରସ୍ତରେ ଅଛନ୍ତି ବୋଲି ଜଣାପଡୁଛି । ତେଣୁ ଚାଷୀମାନଙ୍କ ପାଇଁ ଏପରି ଏକ କାଳିଆ ଯୋଜନା ଘୋଷଣା କରିଛନ୍ତି । ଚାଷୀମାନଙ୍କ ପାଇଁ ଉଦ୍ଦିଷ୍ଟ ବୀମା ମଧ୍ୟ ଚାଷୀଙ୍କୁ ମିଳୁନାହିଁ ବୋଲି ସେ କହିଛନ୍ତି । ତେବେ ଯୋଜନା ଯାହା ପାଇଁ ହେଉଛି ସେ ପାଉନଥିବା ସମୟରେ କିଛି ଦଳୀୟ କର୍ମୀ ସେହି ଟଙ୍କା ହଡପ କରୁଥିବା ଅକ୍ଷୟ ଅଭିଯୋଗ କରିଛନ୍ତି ।