ରାଜ୍ ଠାକରେଙ୍କ ରଣହୁଙ୍କାର : ମୋଦି ମୁକ୍ତ ଭାରତର ଦେଲେ ଆହ୍ୱାନ । କହିଲେ, ବିପକ୍ଷ ଦଳ ଏକଜୁଟ ହୁଅନ୍ତୁ
ମହାରାଷ୍ଟ୍ର ନବନିର୍ମାଣ ସେନା (ମନସେ)ର ମୁଖ୍ୟ ରାଜ ଠାକରେ ରବିବାର ଦିନ ମୋଦି ସରକାରଙ୍କ ବିପକ୍ଷରେ ଆହ୍ୱାନ ଦେଇଛନ୍ତି । ୨୦୧୯ ମସିହା ସୁଦ୍ଧା ଭାରତକୁ ମୋଦି ମୁକ୍ତ ଦେଶ କରିବା ପାଇଁ ଆହ୍ୱାନ ଦେବା ସହ ଅନ୍ୟ ବିରୋଧୀ ଦଳକୁ ଏକଜୁଟ୍ ହୋଇ ଏହାକୁ ମୁକାବିଲା କରିବା ପାଇଁ ସେ କହିଛନ୍ତି । ମୁମ୍ବାଇର ଶିବାଜୀ ପାର୍କଠାରେ ଏକ ରାଲିରେ ପାର୍ଟି କର୍ମକର୍ତ୍ତାଙ୍କୁ ଏକଜୁଟ୍ କରି ଠାକରେ କହିଲେ ଯେ ଦେଶ ନରେନ୍ଦ୍ର ମୋଦି ଏବଂ ତାଙ୍କ ସରକାରଙ୍କ ମିଛ ପ୍ରତିଶ୍ରୁତିରେ ବିରକ୍ତ ହୋଇଗଲାଣି । ଏବେ ଦେଶକୁ ମୋଦି ମୁକ୍ତ କରିବାର ସମୟ ଆସିଛି ।
Kanak News is now on WhatsApp
Join and get latest news updates delivered to you via WhatsApp
ଠାକରେ କଟାକ୍ଷ କରି କହିଥିଲେ, ଭାରତ ୧୯୪୭ ମସିହାରେ ପ୍ରଥମ ସ୍ୱାଧୀନତା ପାଇଥିଲା,ଦ୍ୱିତୀୟ ସ୍ୱାଧୀନତା ୧୯୭୭ ମସିହାରେ ହୋଇଥିଲା ଏବଂ ୨୦୧୯ ମସିହାରେ ଭାରତ ମୋଦି ମୁକ୍ତ ହେବା ପରେ ତୃତୀୟ ସ୍ୱାଧୀନତା ପାଇବ । ମୋଦି ସରକାର ଶାସନରୁ ବାହାର ହେବା ପରେ ଯଦି ବିମୁଦ୍ରାକରଣ ଉପରେ ଯାଂଚ କରାଯାଏ ତେବେ ଏହା ଭାରତର ଦ୍ୱିତୀୟ ବଡ ଘୋଟାଲା ରୂପେ ସାବ୍ୟସ୍ତ ହେବ ।
ଏତଦବ୍ୟତୀତ ଠାକରେ ସ୍ୱର୍ଗୀୟ ଅଭିନେତ୍ରୀ ଶ୍ରୀଦେବୀଙ୍କ ରାଜକୀୟ ଅନ୍ତ୍ୟେଷ୍ଟି ସମ୍ମାନକୁ ନେଇ ମଧ୍ୟ ପ୍ରଶ୍ନ କରିଥିଲେ । ତାଙ୍କ ମତରେ ଶ୍ରୀଦେବୀ ଜଣେ ଦମଦାର ଅଭିନେତ୍ରୀ ଥିଲେ ସତ କିନ୍ତୁ ସେ ଦେଶ ପାଇଁ ଏମିତି କ’ଣ କାମ କରିଥିଲେ ଯେଉଁଥିପାଇଁ ତାଙ୍କ ଶବକୁ ତ୍ରିରଙ୍ଗା ପତକା ସହ ଗୁଡାଇ ସତ୍କାର କରାଯାଇଥିଲା । ନୀରବ ମୋଦି-ପଂଜାବ ନ୍ୟାସନାଲ ବ୍ୟାଙ୍କ ଦୁର୍ନୀତିରୁ ଲୋକଙ୍କ ଧ୍ୟାନ ହଟାଇବା ପାଇଁ ସରକାରଙ୍କ ଇସାରାରେ ଶ୍ରୀଦେବୀଙ୍କ ସତ୍କାରକୁ ଧୁମଧାମରେ କରାଯାଇଥିଲା ।