ନୂଆ ପଦକ୍ଷେପ ! ଋତୁସ୍ରାବ ସମୟରେ ମହିଳା କର୍ମଚାରୀଙ୍କୁ ଛୁଟି ଦେଉଛି ମୁମ୍ବାଇର ଏକ କମ୍ପାନୀ

6

ଜାପାନ୍, ଇଣ୍ଡୋନେସିଆ, ଇଟାଲୀ ଏବଂ ସାଉଥ କୋରିଆ ଆଦି ଦେଶରେ ମାସିକ ଧର୍ମ ସମୟ (ଋତୁସ୍ରାବ)ରେ ମହିଳା କର୍ମଚାରୀଙ୍କୁ ଛୁଟି ଦେବା ସେଠାକାର କମ୍ପାନୀ ପଲିସିର ଏକ ଅଂଶ ବିଶେଷ । କିନ୍ତୁ ଏବେ ମୁମ୍ବାଇର ଏକ ଡିଜିଟାଲ୍ ମିଡିଆ ‘କଲଚର୍ ମେସିନ୍’ ନିଜ ମହିଳା କର୍ମଚାରୀଙ୍କୁ ମାସିକ ଧର୍ମର ପ୍ରଥମ ଦିନ ଦେୟ ଛୁଟି ଦେବାକୁ ଘୋଷଣା କରିଛି । ଏହା ସହ ଏହି ଛୁଟି ନେବା ବେଳେ କମ୍ପାନୀ ପକ୍ଷରୁ କୌଣସି ପ୍ରଶ୍ନ ମଧ୍ୟ ପଚାରାଯିବ ନାହିଁ । ସମାଜରେ ପ୍ରଚଳିତ ପ୍ରଥା ବିରୋଧରେ ଏହା ଏକ ପ୍ରୟାସ ବୋଲି କହିଛନ୍ତି କମ୍ପାନୀ କର୍ତ୍ତୃପକ୍ଷ ।

କେବଳ ଏତିକି ନୁହେଁ କମ୍ପାନୀ ଏନେଇ ମହିଳା ଏବଂ ଶିଶୁ ବିକାଶ ମନ୍ତ୍ରୀ ମାନେକା ଗାନ୍ଧୀ ଏବଂ ମାନବ ସମ୍ବଳ ବିକାଶ ମନ୍ତ୍ରୀ ପ୍ରକାଶ ଜାଭଡେକରଙ୍କୁ ଏକ ଅନଲାଇନ୍ ପିଟିସନ୍ ଦେଇଛନ୍ତି । ଯେଉଁଥିରେ ଦେଶର ଅନ୍ୟ କମ୍ପାନୀ ମାନଙ୍କରେ ମଧ୍ୟ ଏହି ନିୟମ ପ୍ରଚଳନ କରିବା ପାଇଁ ଅନୁରୋଧ କରାଯାଇଛି ।

ଅନେକ ମହିଳା ସେମାନଙ୍କ ମାସିକ ଧର୍ମ ସମୟରେ ଅନେକ କଷ୍ଟ ଏବଂ ଯନ୍ତ୍ରଣା ସହି କାମ କରିଥାନ୍ତି । ତେଣୁ ମହିଳାମାନଙ୍କ ଏହି ସମସ୍ୟାକୁ ଆଖି ଆଗରେ ରଖି ‘କଲଚର୍ ମେସିନ୍’ ଏକ ଭିଡିଓ ମଧ୍ୟ ଜାରି କରିଛି । ଯେଉଁଥିରେ ମହିଳା ମାନେ ଏହି ଦିନ ମାନଙ୍କରେ କେଉଁ କେଉଁ ସମସ୍ୟା ଦେଇ ଗତି କରିଥାନ୍ତି ତାକୁ ବୟାନ୍ କରିଛନ୍ତି ।

ଭିଡିଓରେ ଜଣେ ମହିଳା କହିଛନ୍ତି , ଘରେ ବିଶ୍ରାମ ନେବାକୁ ଇଚ୍ଛା ଥିଲେ ମଧ୍ୟ ଅଫିସରେ କାମ କରିବାକୁ ପଡିଥାଏ । ଆଉ କେତେ ଜଣ ମହିଳା ମତ ଦେଇଛନ୍ତି ପୁରୁଷ ବସ୍ ମାନଙ୍କୁ ଏହି ସମସ୍ୟା ନେଇ କହିବା ଅସମ୍ଭବ ହୋଇଥାଏ । ଭିଡିଓ ଶେଷରେ ଦେଖିବାକୁ ମିଳିଛି କମ୍ପାନୀ ନିଜର ମହିଳା କର୍ମଚାରୀମାନଙ୍କୁ ମାସିକ ଧର୍ମର ପ୍ରଥମ ଦିନରେ ଦେୟ ଛୁଟି ପ୍ରଦାନ କରାଯିବ ବୋଲି ଘୋଷଣା କରିଛି । ଏବେ ସୋସିଆଲ୍ ମିଡିଆରେ ଏହି ଭିଡିଓ ଭାଇରାଲ୍ ହେବା ସହ ସାଉଁଟିଛି ଅନେକ ପ୍ରଶଂସା ।

ଭାରତ ଏପରି ଏକ ଦେଶ ଯେଉଁଠି ଆଜି ପର୍ଯ୍ୟନ୍ତ ମହିଳା ସଶକ୍ତିକରଣ କେବଳ ଆଲୋଚନା, ପର୍ଯ୍ୟାଲୋଚନା, ତର୍କ ଏବଂ ବିତର୍କ ମଧ୍ୟରେ ରହିଯାଇଛି । କିନ୍ତୁ ଆମେ ଏହାକୁ କାମରେ ପରିଣତ କରିବାକୁ ଚାହୁଁ ବୋଲି କହିଛନ୍ତି କମ୍ପାନୀର ସହ ପ୍ରତିଷ୍ଠାତା ଭେଙ୍କଟ୍ ପ୍ରସାଦ ।

କଣ କହେ ଓଡିଶା :
ଏନେଇ ବିଶିଷ୍ଟ ସମାଜ ସେବୀ ନମ୍ରତା ଚଢ଼ାଙ୍କ ମତାମତ ନେଇଥିଲା କନକ ନ୍ୟୁଜ୍ । ‘କଲଚର୍ ମେସିନ’ର ଏହାକୁ ଏକ ସ୍ୱାଗତ ଯୋଗ୍ୟ ପଦକ୍ଷେପ ବୋଲି କହିଛନ୍ତି ନମ୍ରତା । କିନ୍ତୁ ଏହା ସହ ଆଉ ଏକ ପ୍ରଶ୍ନ ଉଠାଇଛନ୍ତି ସେ । କହିଛନ୍ତି, କମ୍ପାନୀ ଯଦିଓ ଏହି ପଦକ୍ଷେପ ନେଇଛି କିନ୍ତୁ କେତେଦିନ ପର୍ଯ୍ୟନ୍ତ ଏହି ନିୟମକୁ ପାଳନ କରିପାରୁଛି ତାହା ବଡ କଥା ।

ଅନ୍ୟପଟେ ସମାଜସେବୀ ଋତୁପର୍ଣ୍ଣା ମହାନ୍ତି ମଧ୍ୟ ଏହି ପଦକ୍ଷେପକୁ ପ୍ରଂଶସା କରିବା ସହ କହିଛନ୍ତି ମହିଳା ମାନେ ନିଜ କାମକୁ ନେଇ ସର୍ବଦା ସଚେତନ ଥାନ୍ତି । କିନ୍ତୁ ରୁତୁସ୍ରାବ ସମୟରେ ସେମାନଙ୍କ ଶରୀରକୁ ବିଶ୍ରାମ ଆବଶ୍ୟକ ଥାଏ । ହେଲେ ଏହି ସମୟରେ ଛୁଟି ନେଲେ କାଳେ ବର୍ଷର ଅନ୍ୟ ଛୁଟି ମାନଙ୍କ ଉପରେ ପ୍ରଭାବ ପଡିବ ତେଣୁ ବାଧ୍ୟ ହୋଇ କର୍ମକ୍ଷେତ୍ରକୁ ଯାଇଥାନ୍ତି । ତେବେ ‘କଲଚର୍ ମେସିନ’ର ମହିଳା ମାନଙ୍କ ପ୍ରତି ଏହି ସମ୍ମାନ ଜନକ ପଦକ୍ଷେପ ନିଶ୍ଚିତ ଭାବରେ ଅନ୍ୟ କମ୍ପାନୀ ମାନଙ୍କ ପାଇଁ ଏକ ଉଦାହରଣ ସାଜିବ ବୋଲି କହିଛନ୍ତି ଋତୁପର୍ଣ୍ଣା ।

ଅନ୍ୟପଟେ ପୁରୁଷଙ୍କ ଅଧିକାର ପାଇଁ କାମ କରୁଥିବା କିଛି ସମାଜସେବୀ କହିଛନ୍ତି ଆଜିର ସମାଜ ଯେଉଁଠି ସମାନତାର କଥା କହୁଛି ସେଠି ମହିଳା ମାନଙ୍କୁ ଅଗ୍ରାଧିକାର ଦେବା କେତେ ଦୂର୍ ଠିକ୍ । କର୍ମକ୍ଷେତ୍ରରେ ଉଭୟ ମହିଳା ଏବଂ ପୁରୁଷଙ୍କୁ ସମାନ ନଜରରେ ଦେଖିବା ପାଇଁ ଅନେକ ସମୟରେ କଥା ଉଠିଛି । କିନ୍ତୁ ଏହି ପଦକ୍ଷେପ ପ୍ରମାଣିତ କରୁଛି ଯେ ମହିଳା ଏବଂ ପୁରୁଷ କେବେ ବି ସମାନ ହୋଇପାରିବେ ନାହିଁ ।

ଏଭଳି ଭିନ୍ନ ମତ ଭିତରେ କଲଚର୍ ମେସିନର ପଦକ୍ଷେପ ଓ ସାମଜସେବୀଙ୍କ ବୟାନ୍ ନୂଆ ବିତର୍କକୁ ଜନ୍ମ ଦେଇଛି  ।

Comments are closed.