ମୁକ୍ତିକାନ୍ତଙ୍କୁ କେବେ ମିଳିବ ମୋଦିଙ୍କ ଦର୍ଶନ ! ରାଜ୍ୟର ସ୍ୱାର୍ଥ ପାଇଁ ଦିଲ୍ଲୀ ଦରବାରରେ ଅଖିଆ ଅପିଆ ବସିଛନ୍ତି ଓଡିଆ ପୁଅ, ପ୍ରଧାନମନ୍ତ୍ରୀଙ୍କର ପଡୁନି ନଜର
କନକ ବ୍ୟୁରୋ : ଯନ୍ତରମନ୍ତରରୁ ପୋଲିସ ଉଠାଇନେବା ପରେ ରାମଲୀଳା ମୈଦାନରେ ଅନଶନ କରିବେ ମୁକ୍ତିକାନ୍ତ ବିଶ୍ୱାଳ । ପ୍ରଧାନମନ୍ତ୍ରୀଙ୍କୁ ନଭେଟିବା ଯାଏଁ ସେ ଅନଶନ ଜାରି ରଖିବେ ବୋଲି କହିଛନ୍ତି । ସେପଟେ ମୁକ୍ତିକାନ୍ତଙ୍କୁ ନେଇ ବଢିବାରେ ଲାଗିଛି ରାଜନୀତି । ବରିଷ୍ଠ କଂଗ୍ରେସ ନେତା ନରସିଂହ ମିଶ୍ର କହିଛନ୍ତି, ପ୍ରଧାନମନ୍ତ୍ରୀ, ମୁକ୍ତିକାନ୍ତଙ୍କୁ ଭେଟିବା ଉଚିତ । ଅନ୍ୟପଟେ ମୁକ୍ତିକାନ୍ତଙ୍କୁ ସମର୍ଥନ କରି ରାଉରକେଲାରେ ବିଭିନ୍ନ ସଂଗଠନ ପକ୍ଷରୁ ଆନ୍ଦୋଳନ ଆରମ୍ଭ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ପ୍ରଧାନମନ୍ତ୍ରୀ ମୋଦିଙ୍କୁ ଭେଟିବାକୁ ଅନୁମତି ନମିଳିବା ଏବଂ ପରେ ଅନଶନସ୍ଥଳରୁ ପୋଲିସ ଜୋରଜବରଦସ୍ତ ଉଠାଇନେବା ପରେ ବି ପଛକୁ ହଟିନାହାଁନ୍ତି ମୁକ୍ତିକାନ୍ତ । ତାଙ୍କର ଏକା ଜିଦ୍, ପ୍ରଧାନମନ୍ତ୍ରୀଙ୍କୁ ଭେଟି ରାଉରକେଲାବାସୀଙ୍କୁ ସେ ଦେଇଥିବା ପ୍ରତିଶ୍ରୁତି ମନେ ପକାଇବେ । ଆଉ, ପ୍ରଧାନମନ୍ତ୍ରୀଙ୍କୁ ସାକ୍ଷାତ ନକରିବା ଯାଏଁ ଅନଶନ ଜାରି ରଖିବେ । ଏରପିକି ପ୍ରଧାନମନ୍ତ୍ରୀ ଦେଶବାସୀଙ୍କୁ ଯେଉଁ ଯେଉଁ ପ୍ରତିଶୃତି ଦେଇଥିଲେ ତାହାକୁ ପୂରଣ କରନ୍ତୁ ବୋଲି ମୁକ୍ତିକାନ୍ତ ଦାବି କରିଛନ୍ତି ।
ରାଉରକେଲାରୁ ଦିଲ୍ଲୀ, ୧୬ ଶହ କିଲୋମିଟର ଚାଲି ଚାଲି ଆସିବା ପରେ ପ୍ରଧାନମନ୍ତ୍ରୀଙ୍କୁ ଭେଟିବାକୁ ଅନୁମତି ନମିଳିବାରୁ ଅନଶନରେ ବସିଥିଲେ ମୁକ୍ତିକାନ୍ତ । ହେଲେ ରବିବାର ରାତିରେ ପୋଲିସ ତାଙ୍କୁ ଅନଶନସ୍ଥଳରୁ ଉଠାଇନେଇଥିଲା । ମେଡିକାଲ୍ ଚେକ୍ ଅପ୍ ପରେ ରାମଲୀଳା ମୈଦାନରେ ଛାଡିଦେଇଥିଲା । ଏବେ ସେଠାରେ ରହି ଅନଶନ ଜାରି ରଖିବେ ବୋଲି କହିଛନ୍ତି ରାଉରକେଲାର ମୁକ୍ତିକାନ୍ତ ବିଶ୍ୱାଳ । ଅନ୍ୟପଟେ ଟ୍ୱିଟ୍ କରି ମୁକ୍ତିକାନ୍ତଙ୍କ ସପକ୍ଷରେ ବାହାରିଛନ୍ତି ବରିଷ୍ଠ କଂଗ୍ରେସ ନେତା ନରସିଂହ ମିଶ୍ର । ଟ୍ୱିଟରେ ନରସିଂହ ଲେଖିଛନ୍ତି, ଏକ ମହତ ଉଦ୍ଦେଶ୍ୟ ନେଇ ଆସିଥିବା ମୁକ୍ତିକାନ୍ତଙ୍କ ସ୍ୱରକୁ ପୋଲିସ ଲଗାଇ ଚପାଇବାକୁ ଉଦ୍ୟମ ନକରି ପ୍ରଧାନମନ୍ତ୍ରୀ ତାଙ୍କୁ ଭେଟିବା ଉଚିତ ।
ଏହାରି ଭିତରେ ମୁକ୍ତିକାନ୍ତଙ୍କ ସମର୍ଥନରେ ଅନଶନ ଆରମ୍ଭ କରିଛି ରାଉରକେଲା ଯୁବ ଜାଗୃତି ମଂଚ । ପ୍ରତିଦିନ ନିଜ ଶରୀରର ରକ୍ତ, ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟକୁ ପଠାଇବେ ବୋଲି ମଂଚ ଘୋଷଣା କରିଛି ।ଏହାଦ୍ୱାରା ପ୍ରଧାନମନ୍ତ୍ରୀଙ୍କ ହୃଦୟ ତରଳିବ ଓ ନିଶ୍ଚିତ ଭାବରେ ମୁକ୍ତିକାନ୍ତଙ୍କୁ ଦେଖା କରିବେ ବୋଲି ମଞ୍ଚ ପକ୍ଷରୁ କୁହାଯାଇଛି । ରାଉରକେଲାରେ ବ୍ରାହ୍ମଣୀ ନଦୀ ଉପରେ ଦ୍ୱିତୀୟ ପୋଲ ନିର୍ମାଣ ଓ ଆଇଜିଏଚକୁ ସୁପର ସ୍ପେଶାଲିଟି ହସ୍ପିଟାଲ କରିବାକୁ ପ୍ରତିଶ୍ରୁତି ଦେଇଥିଲେ ପ୍ରଧାନମନ୍ତ୍ରୀ । ଆଉ ପ୍ରତିଶ୍ରୁତିର ୩ ବର୍ଷ ପରେ ତାହା ପୂରଣ ନହେବାରୁ ମୋଦିଙ୍କୁ ତାଙ୍କ ପ୍ରତିଶ୍ରୁତି ମନେପକାଇବାକୁ ରାଉରକେଲାରୁ ଦିଲ୍ଲୀ ଚାଲି ଚାଲି ଆସିଛନ୍ତି ମୁକ୍ତିକାନ୍ତ ବିଶ୍ୱାଳ ।