ମଧ୍ୟପ୍ରଦେଶ ମହାଡ୍ରାମା: ରାଜନୀତିରେ ଘଡ଼ିକେ ଘୋଡ଼ା ଛୁଟୁଛି । କ୍ଷମତା ପାଇଁ ବଳି ପଡ଼ିଯାଉଛି ବର୍ଷ ବର୍ଷର ସମ୍ପର୍କ ।
କନକ ବ୍ୟୁରୋ: ରାଜନୀତି କେତେବେଳେ କେଉଁ ରଙ୍ଗ ନିଏ ତାହା କହିବା ମୁସକିଲ । ମଧ୍ୟପ୍ରଦେଶରେ ହୋଲି ଦିନ ଆରମ୍ଭ ହୋଇଥିବା ରାଜନୈତିକ ଝଡ ବୁଧବାର ବେଳକୁ ନୂଆ ରୂପ ନେଇସାରିଥିଲା । ହୁଏତ କେହି କେବେ ଭାବିନଥିବେ ମଧ୍ୟପ୍ରଦେଶ କଂଗ୍ରେସ ରାଜନୀତିର ଜଣେ ବଡ ଚେହେରା ହଠାତ୍ ବିଜେପିରେ ଯାଇ ମିଶିଯିବେ । ଯେଉଁ ନେତାଙ୍କୁ ଭରସା କରି କଂଗ୍ରେସ ବିଜେପି ଉପରେ ଆକ୍ରମଣ କରୁଥିଲା, ସେହି ନେତା ଏବେ ବିଜେପିରେ । ବୁଧବାର ବିଜେପି କାର୍ଯ୍ୟାଳୟରେ ସିନ୍ଧିଆଙ୍କ ଉପସ୍ଥିତି ସାରା ଦେଶରେ ପୁଣି ଏକ ରାଜନୈତିକ ଝଡ ସୃଷ୍ଟି କରିଛି ।
Kanak News is now on WhatsApp
Join and get latest news updates delivered to you via WhatsApp
୪୯ ବର୍ଷିୟ ଗ୍ୱାଲିୟର ରାଜପରିବାରର ଏହି ନେତା ବିଜେପିରେ ଯୋଗ ଦେବା ପରେ ତାଙ୍କର ୧୮ ବର୍ଷର କଂଗ୍ରେସ ରାଜନୀତିରେ ପୂର୍ଣ୍ଣଚ୍ଛେଦ ପଡିଛି । ମନମୋହନ ସିଂହ ସରକାରରେ ଶକ୍ତି ମନ୍ତ୍ରାଳୟ ଦାୟିତ୍ୱରେ ଥିବା ଜ୍ୟୋତିରାଦିତ୍ୟ ସିନ୍ଧିଆ ୨୦୦୨ରେ ମଧ୍ୟପ୍ରଦେଶର ଗୁନା ନିର୍ବାଚନମଣ୍ଡଳୀରୁ ନିର୍ବାଚନ ଜିତି ରାଜନୈତିକ କ୍ୟାରିଅର ଆରମ୍ଭ କରିଥିଲେ । ଲଗାତର ସେହି ଗୁନା ନିର୍ବାଚନ ମଣ୍ଡଳିରୁ ଜିତି ଆସୁଥିବା ସିନ୍ଧିଆ ୨୦୧୯ରେ କିନ୍ତୁ ହାରିଯାଇଥିଲେ । ଗ୍ୱାଲିଅର ରାଜପରିବାରର ପ୍ରାୟ ୨୦ ହଜାର କୋଟି ଟଙ୍କାର ସମ୍ପତିର ମାଲିକ ଜ୍ୟୋତିରାଦିତ୍ୟ ବୁଧବାର ରାଜନୀତିରେ ନୂଆ ଇନିଂସ ଆରମ୍ଭ କରିଛନ୍ତି ।
ହୋଲିରେ ଯେତେବେଳେ ସାରା ଦେଶ ରଙ୍ଗର ଉତ୍ସବ ମନାଉଥିଲା ସେତେବେଳେ ସିନ୍ଧିଆ ଏକ ବଡ ଯୋଜନାର ବ୍ଲୁ ପ୍ରିଂଟ୍ ତିଆରି କରୁଥିଲେ । ଦୀର୍ଘଦିନର ଶତ୍ରୁ ବିଜେପିକୁ ଯିବା ପାଇଁ ପ୍ଲାନ ବନାଇସାରିଥିଲେ । ଆଉ ଏହେଉଛି ସେହି ଇସ୍ତଫା ପତ୍ର , ଯେଉଁଥିରେ ସିନ୍ଧିଆ ନିଜର ମନର କଥା ଲେଖିଥିଲେ । ବର୍ଷେ ହେଲା ଏଭଳି ଏକ ଘଟଣା ଘଟିବା ନେଇ ଆପେ ଆପେ ପ୍ରକ୍ରିୟା ଆରମ୍ଭ ହୋଇଥିଲା ଏବଂ ଆଗକୁ ବଢିବା ପାଇଁ ସମୟ ଆସିଛି ବୋଲି ଚିଠିରେ ଲେଖିଥିଲେ ସିନ୍ଧିଆ ।
ସିନ୍ଧିଆ ବିଜେପିରେ ମିଶିବାକୁ ଯାଉଛନ୍ତି ବୋଲି ପ୍ରଥମେ ମଙ୍ଗଳବାର କେହି ବିଶ୍ୱାସ କରିପାରୁନଥିଲେ । ଏପରିକି ବୁଧବାର ଦିନ ୨ ଟା ଯାଏ ଦ୍ୱନ୍ଦ୍ୱ ଲାଗି ରହିଥିଲା । ଏପରିକି ଅନ୍ୟ ଦଳ ଗଢିପାରନ୍ତି ବୋଲି କୁହାଯାଉଥିଲା । କିନ୍ତୁ ଯେତେବେଳେ ତାଙ୍କ ଘରକୁ ବିଜେପି ନେତା ଗଲେ ଏବଂ ବିଜେପି ମୁଖ୍ୟ କାର୍ଯ୍ୟଳୟ ଅଭିମୁଖେ ସିନ୍ଧିଆଙ୍କ ଗାଡି ବାହାରିଲା, ସେତେବେଳେ ସବୁ ସ୍ପଷ୍ଟ ହୋଇଗଲା । ଆଉ କିଛି ସମୟ ପରେ ରାଜନୀତିର ଅନେକ ରଙ୍ଗ ଭିତରୁ ଆଉ ଏକ ରଙ୍ଗ ଦେଖିବାକୁ ମିଳିଲା ।