ଦାରିଦ୍ର୍ୟର ଭୟାବହ ପରିଣତି ! ଝିଅକୁ ମାରି ପୋଖରୀରେ ଫିଙ୍ଗିଦେଲା ମା’, ଖାଇବାକୁ ମାଗିବାରୁ ରାଗିଯାଇ ହତ୍ୟା କରିଥିବା ଅଭିଯୋଗ
କନକ ବ୍ୟୁରୋ: ଦାରିଦ୍ର୍ୟ ଓ ପାରିବାରିକ କଳହର ଭୟାବହ ପରିଣତି । ଯାଜପୁର କୁଆଖିଆ ଥାନା ମୁଗୁପାଳ ପଂଚାୟତରେ ଝିଅକୁ ମାରି ପୋଖରୀରେ ଫିଙ୍ଗିଦେଲା ମା’ । ଝିଅଟି ବାରମ୍ବାର ଖାଇବାକୁ ମାଗିଥିଲା ହେଲେ ମା ଖାଇବାକୁ ଯୋଗାଇ ନପାରି ଉତକ୍ଷିପ୍ତ ହୋଇ ତଂଟି ଚିପି ମାରି ଦେଇ ପୋଖରୀରେ ଫିଙ୍ଗି ଦେଇଥିବା ଅଭିଯୋଗ ହୋଇଛି । ହତ୍ୟାକାରୀ ମା’କୁ ପୁଲିସ ଗିରଫ କରି କୋର୍ଟ ଚାଲାଣ କରିଛି ।
Kanak News is now on WhatsApp
Join and get latest news updates delivered to you via WhatsApp
ପୁଲିସ ସୂତ୍ରରୁ ମିଳିଥିବା ସୂଚନା ଅନୁସାରେ, ମୁଗୁପାଳ ଗାଁର ଦଳିତ ସାହି ନିକଟରେ ରହୁଥିବା ବିଜୟ ବେହେରାଙ୍କର ବୁଧବାର ଦିନ ପତ୍ନୀ ସୋନିଙ୍କ ସହ ଝଗଡ଼ା ହୋଇଥିଲା । ପରେ ବିଜୟ ବାହାଘରିଆ ବାଜା ବଜାଇବା ପାଇଁ ବାହାରକୁ ଚାଲି ଯାଇଥିଲେ । ଶନିବାର ସୁଦ୍ଧା ଘରକୁ ଫେରି ନଥିଲେ କି ଘର ଚଳାଇବା ପାଇଁ ସ୍ତ୍ରୀକୁ କିଛି ପଇସାପତ୍ର ଦେଇ ନଥିଲେ । ଏପଟେ ଘର ଚଳାଇବା ପାଇଁ ସୋନି ପାଖରେ ଟଙ୍କା ନଥିବାରୁ ସେ ଓ ତାର ଦୁଇ ସନ୍ତାନ ଦୁଇ ଦିନ ହେଲା କିଛି ଖାଇ ନଥିଲେ । ଶନିବାର ଦିନ ବଡ଼ ପୁଅ ଉପବାସରେ ଶୋଇ ପଡିଥିଲା । ଝିଅ କିନ୍ତୁ ଭୋକ ସହି ନପାରି ମା’କୁ ଖାଇବାକୁ ମାଗିଥିଲା ।
ମା’ ରାଗି ଯାଇ ଝିଅକୁ ସାଙ୍ଗରେ ଡାକି ନେଇ ଖଇରାବାଦ ଗାଁ ଆଡକୁ ଚାଲି ଯାଇଥିଲା । ଗାଁ ମୁଣ୍ଡରେ ଥିବା ଶଙ୍କରା ପୋଖରୀ ହୁଡ଼ାରେ ଝିଅର ତଣ୍ଟି ଚିପି ମାରିଦେବା ପରେ ପୋଖରୀ ମଧ୍ୟକୁ ଫୋପାଡି ଦେଇଥିଲା । ଏହି କାଣ୍ଡ ଭିଆଇବା ପରେ ସେ ତା ବାପଘର ଯାଜପୁର ସଦର ଥାନା ବରୁଆଁ ଅଂଚଳକୁ ପଳାଇ ଯାଇଥିଲା। ସେଠାରେ ପହଞ୍ଚି ବାପଘର ଲୋକଙ୍କ ଆଗରେ ସବୁ କଥା କହିଥିଲା । ବାପଘର ଲୋକେ ସବୁ ଜାଣିବା ପରେ ବିଜୟଙ୍କ ବଡ଼ଭାଇ ଅଜୟ ବେହେରାଙ୍କୁ ଆଜି ସକାଳେ ଖବର ଦେଇଥିଲେ ।
ଅଜୟ ବେହେରା ପୋଖରୀ ନିକଟକୁ ଯାଇ ପାଣିରେ ଶିଶୁ କନ୍ୟାର ଶବ ଭାସୁଥିବାର ଦେଖିବାକୁ ପାଇଥିଲେ । ଏ ସଂପର୍କରେ ପୁଲିସକୁ ଖବର ଦେଇଥିଲେ । କୁଆଖିଆ ଥାନା ଏସ.ଆଇ ମଧୁମିତା ମହାନ୍ତି ଘଟଣାସ୍ଥଳରେ ପହଞ୍ଚି ଶବକୁ ଜବତ କରିବା ସହ ଅଭିଯୁକ୍ତ ମା’କୁ ଗିରଫ କରି କୋର୍ଟ ଚାଲାଣ କରିଛନ୍ତି । ମା’ ପୁଲିସ ସମ୍ମୁଖରେ ଝିଅକୁ ହତ୍ୟା କରିଥିବା ଘଟଣାକୁ ସ୍ୱୀକାର କରିଛି । ପୁଲିସ ଏ ସଂପର୍କରେ ଥାନାରେ କେସ୍ ନଂ-୪୭/୧୮ ରେ ଏକ ମାମଲା ରୁଜୁ କରି ଘଟଣାର ତଦନ୍ତ କରୁଛି । କୁଆଖିଆ ଥାନା ଅଧିକାରୀ ଆଶିଷ ସାହୁ ଘଟଣାର ତଦନ୍ତ କରୁଛନ୍ତି ।