ଅସହାୟ ଗରିବ ପିଲାଙ୍କୁ ପାଠ ପଢ଼ାଇ ଉଦାହରଣ ପାଲଟିଥିବା କଟକର ଡି. ପ୍ରକାଶ ରାଓଙ୍କୁ ମନ କି ବାତ୍ ଜରିଆରେ ଶୁଭେଚ୍ଛା ଦେଲେ ପ୍ରଧାନମନ୍ତ୍ରୀ ମୋଦି ।
ମୋଦି ସରକାର ଚତୁର୍ଥବର୍ଷ ପୁର୍ତ୍ତି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶବାସୀଙ୍କୁ ମନ କି ବାତ୍ ଜରିଆରେ ସମ୍ବୋଧିତ କରିଛନ୍ତି । ଆଜି ଦିନ ୧୧ ଟାରୁ ମନ କି ବାତ୍ ମାଧ୍ୟମରେ ଦେଶର ବିଭିନ୍ନ ସମସ୍ୟାରେ ହୋଇଥିବା ଉନ୍ନତି, ମହିଳାଙ୍କ ସମ୍ବନ୍ଧୀୟ, ପ୍ଲାଷ୍ଟିକ ବ୍ୟବହାର କମ୍ କରିବା ଭଳି ଅନେକ ବିଷୟରେ ଆଲୋକପାତ କରିଛନ୍ତି ମୋଦି । ତେବେ ଏହାରି ମଧ୍ୟରେ ସବୁଠାରୁ ଗୁରୁତ୍ୱ ପୂର୍ଣ୍ଣ କଥା ହେଲା ଯେ ମୋଦି କଟକର ଚା’ ବିକାଳି ଡି.ପ୍ରକାଶ ରାଓଙ୍କ ବିଷୟରେ ଦେଶବାସୀଙ୍କୁ ଜଣାଇଥିଲେ । ରେଡିଓରେ ପ୍ରସାରିତ ଏହି ମନ କି ବାତ କାର୍ଯ୍ୟକ୍ରମ ଜରିଆରେ ଏହି ଚା ବିକାଳୀ ପ୍ରକାଶ ରାଓଙ୍କୁ ତାଙ୍କର ଅବଦାନ ପାଇଁ ଶୁଭେଚ୍ଛା ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
Kanak News is now on WhatsApp
Join and get latest news updates delivered to you via WhatsApp
ମୋଦିଙ୍କ ମନ କି ବାତରେ କଟକର ଚା ବିକାଳୀ ଡି. ପ୍ରକାଶ ରାଓଙ୍କ ନାଁ ଶୁଣି ଦେଶବାସୀ ମଧ୍ୟ ତାଙ୍କ ବିଷୟରେ ଜାଣିବା ପାଇଁ ଉତ୍କଣ୍ଠିତ ହୋଇଥିବେ ନିଶ୍ଚିନ୍ତ । କିନ୍ତୁ ମୋଦି ଆଜିର ମନ କି ବାତ୍ ଅଭିଭାଷଣ ଜରିଆରେ ଡି.ପ୍ରକାଶ ରାଓଙ୍କ ବିଷୟରେ କହିଛନ୍ତି ଯେ ଶ୍ରୀମାନ୍ ପ୍ରକାଶ ରାଓ ଗତ ୫୦ ବର୍ଷ ହେବ କଟକରେ ଚା ବିକ୍ରୀ କରୁଛନ୍ତି । କିନ୍ତୁ ଜଣେ ବଦାନ୍ୟ ବ୍ୟକ୍ତି ଯିଏ କି ଚା ବିକ୍ରୀ କରି ମଧ୍ୟ ୭୦ରୁ ଉଦ୍ଧ୍ୱର୍ ଅସହାୟ ପିଲାଙ୍କୁ ଶିକ୍ଷିତ କରିବା ପାଇଁ ନିଜର ସବୁ କିଛି ସମର୍ପିତ କରିଦେଇଛନ୍ତି । ଏବଂ କଟକ ସହରର ବସ୍ତି ଓ ଝୁଡି ତଳେ ବସବାସ କରୁଥିବା ପିଲାମାନଙ୍କ ପାଇଁ ‘ଆଶା ଆଶ୍ୱାସନ’ ନାଁରେ ଏକ ସ୍କୁଲ ଖୋଲିଛନ୍ତି । ଯେଉଁଥିରେ ସେ ନିଜର ରୋଜଗାର କରୁଥିବା ୫୦ ପ୍ରତିଶତ ଅର୍ଥକୁ ସ୍କୁଲରେ ପଢ଼ୁ୍ଥିବା ପିଲାଙ୍କ ପାଇଁ ଖର୍ଚ୍ଚ କରନ୍ତି । କେବଳ ସେତିକି ନୁହେଁ ସ୍କୁଲରେ ପଢ଼ୁଥିବା ସମସ୍ତ ପିଲାମାନଙ୍କ ପାଇଁ ଦେବତା ଭଳି ସେମାନଙ୍କର ସ୍ୱାସ୍ଥ୍ୟ, ଶିକ୍ଷା ଓ ଖାଦ୍ୟ ପେୟର ସମସ୍ତ ବ୍ୟବସ୍ଥା ପ୍ରକାଶ ରାଓ ତୁଲାଇଛନ୍ତି । ପ୍ରକାଶ ରାଓଙ୍କ ଏଭଳି ପରିଶ୍ରମ, ନିଷ୍ଠାପରତା ଏବଂ ଅସହାୟ ଗରିବ ପିଲାଙ୍କ ପାଇଁ ତାଙ୍କର ଅବଦାନକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁଭେଚ୍ଛା ଦେଇଛନ୍ତି ।