ଲୋକସଭାରେ ଆକ୍ରମଣାତ୍ମକ ମୁଦ୍ରାରେ ମୋଦି : ୧୯୪୭ରୁ କଂଗ୍ରେସର ଭୁଲ ଗଣାଇଲେ ପ୍ରଧାନମନ୍ତ୍ରୀ
କନକ ବ୍ୟୁରୋ : ଲୋକସଭାରେ ବେଶ୍ ଆକ୍ରମଣାତ୍ମକ ମୁଦ୍ରାରେ ନଜର ଆସିଲେ ପ୍ରଧାନମନ୍ତ୍ରୀ ମୋଦି । ଭାରତ ବିଭାଜନରେ ନେହେରୁଙ୍କ ଭୂମିକାଠାରୁ ଆରମ୍ଭ କରି ଗଣତନ୍ତ୍ରକୁ ନେଇ କଂଗ୍ରେସ ନେତାଙ୍କ ଉପଦେଶ ଯାଏଁ କାହାରିକୁ ଛାଡିଲେ ନାହିଁ । ସଂସଦରେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ଦେଇ ପ୍ରାୟ ୯୦ ମିନିଟ ଧରି କଂଗ୍ରେସ ଉପରେ ବର୍ଷିଲେ ମୋଦି । ଗୋଟିଏ ପଟେ ଲୋକସଭାରେ ଜାରି ରହିଥାଏ ବିରୋଧୀଙ୍କ ହୋହଲ୍ଲା । ଆଉ ଏପଟେ ୧୯୪୭ରୁ ଗୋଟିଗୋଟି କରି କଂଗ୍ରେସର ଭୁଲ ଗଣି ଚାଲିଥାନ୍ତି ମୋଦି ।
Kanak News is now on WhatsApp
Join and get latest news updates delivered to you via WhatsApp
ଆଗକୁ ବିଧାନସଭା ନିର୍ବାଚନ ହେବାକୁ ଥିବା କର୍ଣ୍ଣାଟକ ପ୍ରସଙ୍ଗ ଉଠାଇ ଲୋକସଭାରେ ସଂସଦୀୟ ଦଳ ନେତା ମଲ୍ଲିକାର୍ଜୁନ ଖଡଗେ ଓ କଂଗ୍ରେସ ଦଳକୁ କାଠଗଡାରେ ଛିଡା କରାଇଥିଲେ ମୋଦି । ସେହିପରି ଏନଡିଏରୁ ଟିଡିପି ଅଲଗା ହୋଇଯିବା ନେଇ ଚର୍ଚ୍ଚା ଭିତରେ କିଭଳି ଟିଡିପି ଗଠନରେ ରାଜୀବ ଗାନ୍ଧିଙ୍କ ଭୂମିକା ରହିଥିଲା ସେକଥା ମନେପକାଇ ଦେଇଥିଲେ । ଗଣତନ୍ତ୍ରର ପାଠ ପଢାଉଥିବା କଂଗ୍ରେସ ଦଳ ଭିତରେ କିଭଳି ଗଣତନ୍ତ୍ର ନାହିଁ ତାର ଉଦାହରଣ ଦେଇ ସର୍ଦ୍ଦାର ପଟେଲଙ୍କୁ ଅଣଦେଖା କରିବାଠାରୁ ଆରମ୍ଭ କରି ରାହୁଲ ଗାନ୍ଧିଙ୍କ ନିର୍ବାଚନ ଯାଏଁ ପ୍ରଶ୍ନ ଉଠାଇଥିଲେ ମୋଦି ।
ଅନେକଥର ସଂସଦରେ କଂଗ୍ରେସ ଓ ଏହାର ନେତାଙ୍କ ବିରୋଧରେ ବିଷୋଦଗାର କରୁଥିବା ପ୍ରଧାନମନ୍ତ୍ରୀ ମୋଦିଙ୍କୁ ପୂର୍ବରୁ ଏଭଳି ଆକ୍ରମଣାତ୍ମକ ଢଙ୍ଗରେ ଦେଖିବାକୁ ମିଳିନଥିଲା । ପ୍ରଧାନମନ୍ତ୍ରୀଙ୍କ ଭାଷଣରେ ଜାମ୍ମୁ-କାଶ୍ମୀର, ପାକିସ୍ତାନ ସମସ୍ୟା, ତେଲେଙ୍ଗାନା ଓ କର୍ଣ୍ଣାଟକ ପରି ପ୍ରସଙ୍ଗ ସ୍ଥାନ ପାଇଥିବାରୁ ଏହା ଏକ ନିର୍ବାଚନୀ ଅଭିଭାଷଣ ବୋଲି ମଧ୍ୟ କୁହାଯାଉଛି ।