ଭାରତର ନୋଏଡାରେ ମୋବାଇଲ ନିର୍ମାତା କମ୍ପାନୀ ସାମସଙ୍ଗ ଦୁନିଆର ସବୁଠାରୁ ମୋବାଇଲ ଫୋନ ନିର୍ମାଣ ଫ୍ୟାକ୍ଟ୍ରି କରିବାକୁ ଯାଉଛି ।ନୋଏଡାର ସେକ୍ଟର ୮୧ରେ ୩୫ ଏକର ଜମିରେ ପରିବ୍ୟାପ୍ତ ସାମସଙ୍ଗ ଇଲେକଟ୍ରୋନିକ୍ସ ଫ୍ୟାକ୍ଟ୍ରିିର ଉଦଘାଟନ ଆସନ୍ତାକାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଦକ୍ଷିଣ କୋରିଆ ରାଷ୍ଟ୍ରପତି ମୁନ-ଜେ-ଇନ କରିବେ । ଏଥିପାଇଁ ସମସ୍ତ ପ୍ରକାର ପ୍ରସ୍ତୁତି ଶେଷ ହୋଇଛି । ଦକ୍ଷିଣ କୋରିଆ ରାଷ୍ଟ୍ରପତି ହେଲିକପ୍ଟର ଯୋଗେ ଏଠାରେ ପହଞ୍ଚିବେ । ସେଥିପାଇଁ ଫ୍ୟାକ୍ଟ୍ରି ପାଖରେ ଏକ ହେଲିପ୍ୟାଡ ମଧ୍ୟ ନିର୍ମାଣ କରାଯାଇଛି ।

ଏହାପୂର୍ବରୁ ଦେଶରେ ୧୯୯୦ ମସିହାରେ ପ୍ରଥମ ଇଲେକଟ୍ରୋନିକ୍ସ ଫ୍ୟାକ୍ଟ୍ରି ନିର୍ମାଣ କରାଯାଇଥିଲା । ଯେଉଁ ଫ୍ୟାକ୍ଟ୍ରିରେ ୧୯୯୭ ମସିହାରେ ଟିଭି ନିର୍ମାଣ ଆରମ୍ଭ ହୋଇଥିଲା । ଏବେ ଥିବା ମୋବାଇଲ ଫ୍ୟାକ୍ଟ୍ରି ୨୦୦୫ ମସିହାରେ ଭାରତରେ ନିର୍ମାଣ କରାଯାଇଥିଲା । ତେବେ ଗତ ବର୍ଷ ଦକ୍ଷିଣ କୋରିଆ କମ୍ପାନି ୪୯୧୫ କୋଟି ଟଙ୍କା ନିବେଶ କରି ଏହି ପ୍ଲାଣ୍ଟକୁ ବିସ୍ତାର କରିବାକୁ ଘୋଷଣା କରିଥିଲା । ଏହି ଫ୍ୟାକ୍ଟ୍ରିରୁ ପୂର୍ବପେକ୍ଷା ଦୁଇଗଣ ଉତ୍ପାଦନ କରାଯାଇପାରିବ ।

ଭାରତରେ ଏବେ ପ୍ରତିବର୍ଷ ସାମସଙ୍ଗ କମ୍ପାନି ୬.୭ କୋଟି ସ୍ମାର୍ଟଫୋନ ନିର୍ମାଣ କରୁଛି । ତେବେ ନୂଆ ପ୍ଲାଣ୍ଟ ଚାଲୁ ହେବା ପରେ ପାଖାପାଖି ୧୨ କୋଟି ମୋବାଇଲ ଫୋନ ଊତ୍ପାଦନ ହେବାର ସମ୍ଭାବନା ରହିଛି । ନୂଆ ପ୍ଲାଣ୍ଟରେ ନା କେବଳ ମୋବାଇଲ ବରଂ ବିଭିନ୍ନ ଇଲେକଟ୍ରୋନିକ୍ସ ସାମଗ୍ରୀ ଯେପରିକି ଫ୍ରିଜ, ଟିଭିର ପାର୍ଟସ ନିର୍ମାଣ କରାଯିବ । ଏହାଦ୍ୱାରା ଉତ୍ପାଦନ କ୍ଷେତ୍ରରେ ଏକ ନମ୍ବର ଭୂମିକାରେ ରହିବ ଏହି ନୂଆ ଫ୍ୟାକ୍ଟ୍ରି । ପୂର୍ବରୁ ନୋଏଡ଼ା ଓ ତାମିଲନାଡୁରେ ସାମସଙ୍ଗର ଦୁଇଟି ମୋବାଇଲ ନିର୍ମାଣ କେନ୍ଦ୍ର ରହିଛି । ଏହାଛଡ଼ା ୫ଟି ରିସର୍ଚ୍ଚ ଆଣ୍ଡ ଡେଭଲପମେଣ୍ଟ ସେଣ୍ଟର ଓ ନୋଏଡାରେ ଏକ ଡିଜାଇନ କେନ୍ଦ୍ର ରହିଛି ଯେଉଁଠି ପ୍ରାୟ ୭୦ ହଜାର ଲୋକ କାମ କରୁଛନ୍ତି ।  ସାମସଙ୍ଗ କମ୍ପାନିର ନୂଆ ଫ୍ୟାକ୍ଟି ଉଦଘାଟନ ପୂର୍ବରୁ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଘଟଣାସ୍ଥଳ ବୁଲି ଦେଖିଛନ୍ତି । ପ୍ରଧାନମନ୍ତ୍ରୀଙ୍କ ଗସ୍ତ ସମୟରେ ଯେପରି କୌଣସି ଅସୁବିଧା ସୃଷ୍ଟି ନ ହେବ ସେଥିପାଇଁ ଉଚ୍ଚ ଅଧିକାରୀଙ୍କ ସହ ଆଲୋଚନା କରିଛନ୍ତି ଯୋଗୀ ଆଦିତ୍ୟନାଥ ।