ମୋଦିଙ୍କ ମୁହଁରେ ଗାନ୍ଧୀଙ୍କ ଗାଥା… । କହିଲେ, ସାରା ବିଶ୍ୱକୁ ବାଟ ଦେଖାଇବା ପାଇଁ ଗାନ୍ଧୀ ଶ୍ରେଷ୍ଠ ଗୁରୁ, ତାଙ୍କ ଦର୍ଶନରେ ରହିଛି ସବୁ ସମସ୍ୟାର ସମାଧାନ ।
କନକ ବ୍ୟୁରୋ : ମହାତ୍ମା ଗାନ୍ଧୀଙ୍କ ୧୫୦ତମ ଜନ୍ମ ଜୟନ୍ତୀରେ ନ୍ୟୁୟର୍କ ଟାଇମ୍ସରେ ପ୍ରକାଶ ପାଇଛି ଗାନ୍ଧୀଙ୍କ ସଂପର୍କରେ ପ୍ରଧାନମନ୍ତ୍ରୀ ମୋଦିଙ୍କ ଆଲେଖ୍ୟ । ସାରା ବିଶ୍ୱ ଅଧିକାରର କଥା କହୁଥିବାବେଳେ ଗାନ୍ଧୀଜୀ ଦାୟିତ୍ୱର କଥା କହୁଥିଲେ ବୋଲି ମୋଦି ଲେଖିଛନ୍ତି । ଆଜିର ଦିନରେ ଭାରତ ଓ ବିଶ୍ୱ ପାଇଁ କାହିଁକି ଗାନ୍ଧୀଜୀ ଜରୁରୀ ସେନେଇ ତାଙ୍କ ଦୃଷ୍ଟିଭଙ୍ଗୀ ରଖିଛନ୍ତି ପ୍ରଧାନମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ସାରାଦେଶ ଜାତିର ପିତା ମହାତ୍ମା ଗାନ୍ଧୀଙ୍କ ୧୫୦ତମ ଜନ୍ମ ଜୟନ୍ତୀ ପାଳନ କରୁଥିବାବେଳେ ଅନ୍ତର୍ଜାତୀୟ ଖ୍ୟାତି ସମ୍ପନ୍ନ ଖବରକାଗଜ ନ୍ୟୁୟର୍କ ଟାଇମ୍ସରେ ପ୍ରକାଶ ପାଇଛି ଗାନ୍ଧୀଙ୍କ ସମ୍ପର୍କରେ ମୋଦିଙ୍କ ଆଲେଖ୍ୟ । ଆଜିର ଦିନରେ ଭାରତ ଓ ବିଶ୍ୱ ପାଇଁ କାହିଁକି ଗାନ୍ଧୀ ଜୀ ଜରୁରୀ ସେନେଇ ତାଙ୍କ ଦୃଷ୍ଟିଭଙ୍ଗୀ ରଖିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ପ୍ରଧାନମନ୍ତ୍ରୀ କହିଛନ୍ତି ଗାନ୍ଧୀ ଜୀ ଏମିତି ଜଣେ ବ୍ୟକ୍ତିତ୍ୱ ଥିଲେ, ଯିଏ ଏମିତି ଏକ ବିଶ୍ୱର ପରିକଳ୍ପନା କରୁଥିଲେ, ଯେଉଁଠି ପ୍ରତ୍ୟେକ ବ୍ୟକ୍ତିର ମହତ୍ୱ ଥିବ ଓ ସେ ସମୃଦ୍ଧିଶାଳୀ ହୋଇଥିବ ।
ସବୁଠାରୁ ବଡକଥା ହେଉଛି ଦି ନ୍ୟୁୟର୍କ ଟାଇମ୍ସର ୱେବସାଇଟକୁ ଗଲେ ଫ୍ରଣ୍ଟ ପେଜ ବା ପ୍ରଥମ ପୃଷ୍ଠାରେ ହିଁ ଗାନ୍ଧୀଙ୍କ ସଂପର୍କରେ ମୋଦିଙ୍କ ଆଲେଖ୍ୟଟି ପ୍ରକାଶ ପାଇଛି । ଯାହା ବିଦେଶ ମାଟିରେ ଉଭୟ ଗାନ୍ଧୀ ଓ ମୋଦିଙ୍କ ଗୁରୁତ୍ୱକୁ ଦର୍ଶାଉଛି ବୋଲି କୁହାଯାଇପାରେ । ମୋଦି କହିଛନ୍ତି ଗାନ୍ଧୀଙ୍କ ପାଖରେ ଏମିତି କଳା ଥିଲା ଯେ ସମାଜରେ ବିଭିନ୍ନ ବର୍ଗ ଭିତରେ ସୃଷ୍ଟି ହେଉଥିବା ବିଭେଦକୁ ଯୋଡିବାରେ ସେ ସେତୁ ଭଳି କାମ କରୁଥିଲେ । ଏଥିପାଇଁ ଏକାଧିକ ଉଦାହରଣ ଦେଇଛନ୍ତି ପ୍ରଧାନମନ୍ତ୍ରୀ ମୋଦି ।
୧୯୧୭ ବେଳକୁ ଗୁଜରାଟର ଅହମ୍ମଦାବାଦରେ ବୟନଶିଳ୍ପ କ୍ଷେତ୍ରରେ ବଡଧରଣର ଆନ୍ଦୋଳନ ଦେଖାଦେଲା । ମିଲ ମାଲିକ ଓ ଶ୍ରମିକଙ୍କ ଭିତରେ ବିବାଦ ଏତେ ବଢିଗଲା ଯେ, କେହି କାହାରି ଜିଦରୁ ଓହରିବାକୁ ରାଜି ନଥିଲେ । ଆଉ ସେତେବେଳେ ଗାନ୍ଧୀ ଜୀ ମଧ୍ୟସ୍ଥତା କରି ଉଭୟ ପକ୍ଷକୁ ସୁହାଇଲା ଭଳି ଏକ ବାଟ ବାହାର କଲେ । ଶ୍ରମିକ ମାନଙ୍କ ପାଇଁ ଗାନ୍ଧୀ ଜୀ ମଜଦୁର- ମହାଜନ- ସଂଘ ଗଢିଲେ । ସାଧାରଣରେ ଦେଖିଲେ ଏହା ଏକ ସଂଗଠନର ନାଁ ଭଳି ଲାଗୁଛି । କିନ୍ତୁ ଭଲଭାବେ ତର୍ଜମା କଲେ ଜଣାପଡିବ, କିଭଳି ଗୋଟିଏ ଛୋଟିଆ ପଦକ୍ଷେପ ମଧ୍ୟ ବଡ ପ୍ରଭାବ ପକାଇ ପାରିବ । କାରଣ ସେତେବେଳେ ସମାଜରେ ବିତଶାଳୀ ଲୋକଙ୍କୁ ମହାଜନ କୁହାଯାଉଥିଲା । ଏବଂ ମଜଦୁର ଅର୍ଥାତ ଶ୍ରମିକ ଶ୍ରେଣୀ । କିନ୍ତୁ ଶ୍ରମିକଙ୍କ ସହ ମହାଜନଙ୍କ ନାଁକୁ ଯୋଡି ସମାଜରେ ଥିବା ଏକ ବିରାଟ ବିଭେଦକୁ ଦୂର କରିବା ଲାଗି ପ୍ରୟାସ କରିଥିଲେ ଗାନ୍ଧୀ ଜୀ ।
ଛୋଟିଆ ଜିନିଷରେ ବଡ ରାଜନୈତିକ ପ୍ରଭାବ ସୃଷ୍ଟି କରିପାରୁଥିଲେ ଗାନ୍ଧୀ ଜୀ । ଚରଖାରେ ସୂତା ବୁଣି, ଖଦି ପିନ୍ଧିବାକୁ ଆହ୍ୱାନ ଦେଇ ଦେଶର ଅର୍ଥନୀତିରେ ବୈପ୍ଳବିକ ପରିବର୍ତନ ପାଇଁ ଜନ ଆନ୍ଦୋଳନ ତିଆରି କରିପାରିଥିଲେ । ଚିମୁଟାଏ ଲୁଣକୁ ନେଇ ଜନ ଆନ୍ଦୋଳନ ସୃଷ୍ଟି କରିପାରୁଥିଲେ ଗାନ୍ଧୀ । ଉପନିବେଶ ଶାସନ ସମୟରେ ଭାରତରେ ଲୁଣ ଉପରେ ଟିକସ ବସାଗଲା । ଏହାକୁ ବିରୋଧ କରି ଗାନ୍ଧୀ ଜୀଙ୍କ ନେତୃତ୍ୱରେ ୧୯୩୦ରେ ଦାଣ୍ଡି ଯାତ୍ରା ଆରମ୍ଭ ହେଲା । ଆରବ ସାଗର ଉପକୂଳରୁ ଚିମୁଟାଏ ଲୁଣକୁ ନେଇ ଗାନ୍ଧୀ ଜୀଙ୍କ ଆନ୍ଦୋଳନ ଐତିହାସିକ ଆଇନ ଅମାନ୍ୟ ଆନ୍ଦୋଳନର ରୂପନେଲା ।
ମୋଦି ଲେଖିଛନ୍ତି ଯେ, ଗାନ୍ଧୀଙ୍କ ଦୃଷ୍ଟିରେ ସ୍ୱାଧୀନତାର ଅର୍ଥ ଅନୁଶାସନହୀନ ନୁହେଁ । ରାଜନୈତିକ ସ୍ୱାଧୀନତା ଓ ବ୍ୟକ୍ତିର ସାମଗ୍ରିକ ବିକାଶ ଭିତରେ ଗଭୀର ସମ୍ପର୍କ ରହିଛି । ତେଣୁ ଗାନ୍ଧୀ ଏଭଳି ଏକ ବିଶ୍ୱର ପରିକଳ୍ପନା କରୁଥିଲେ, ଯେଉଁଠି ପ୍ରତ୍ୟେକ ବ୍ୟକ୍ତିର ମହତ୍ୱ ଥିବ ଓ ସେ ସମୃଦ୍ଧିଶାଳୀ ହୋଇଥିବ । ୟଙ୍ଗ ଇଣ୍ଡିଆରେ ଗାନ୍ଧୀ ଜୀ ଲେଖିଥିଲେ ଅଧିକାରର ମୂଳ ଉତ୍ସ ହେଉଛି ଦାୟିତ୍ୱ । ଯଦି ଆମେ ସମସ୍ତେ ଆମ ଦାୟିତ୍ୱ ଠିକରେ କରିବା, ତାହାହେଲେ ଆମ ଅଧିକାର ଆମକୁ ଆପେଆପେ ମିଳିଯିବ । ସାରା ବିଶ୍ୱ ଅଧିକାରର କଥା କହୁଥିବାବେଳେ ଗାନ୍ଧୀ ଜୀ ଦାୟିତ୍ୱର କଥା କହୁଥିଲେ ବୋଲି ମୋଦି ଲେଖିଛନ୍ତି । ତେଣୁ ଆମର ମାର୍ଗଦର୍ଶନ କରିବା ପାଇଁ ଗାନ୍ଧି ଜୀ ଜଣେ ଉତମ ଶିକ୍ଷକ । ମାନବିକତାରେ ବିଶ୍ୱାସ କରୁଥିବା ବ୍ୟକ୍ତିଙ୍କୁ ଏକାଠି କରିବାଠୁ ଆରମ୍ଭ କରି ନିରନ୍ତର ବିକାଶ ଓ ଅର୍ଥନୈତିକ ଆତ୍ମନିର୍ଭରଶୀଳ ହେବା ଯାଏଁ ଗାନ୍ଧୀ ଜୀଙ୍କ ପାଖରେ ସବୁ ସମସ୍ୟାର ସମାଧାନ ଥିଲା । ତେଣୁ ନୂଆ ନୂଆ ଉଦ୍ଭାବନ ଜରିଆରେ ଗାନ୍ଧୀବୀଦକୁ ଜୀବିତ ରଖିବା ଲାଗି ମୋଦି ଆହ୍ୱାନ ଦେଇଛନ୍ତି ।