କନକ ବ୍ୟୁରୋ : ଗୋଟିଏ ଦିନରେ ଦୁଇଟି ରାଜନୈତିକ ମେଗା ସୋ । ଆସନ୍ତା ୧୫ ତାରିଖରେ ପୁଣି ମୋଦି-ନବୀନ ମୁବାକିଲା । ବଲାଙ୍ଗୀରରେ ପ୍ରଧାନମନ୍ତ୍ରୀଙ୍କ ସମାବେଶ, ଭୁବନେଶ୍ୱର ବରମୁଣ୍ଡାରେ ମୁଖ୍ୟମନ୍ତ୍ରୀଙ୍କ ସରକାରୀ କାର୍ଯ୍ୟକ୍ରମ । ନିର୍ବାଚନ ବର୍ଷରେ ଲୋକଙ୍କ ପାଖରେ ପହଂଚିବା ପାଇଁ ଦୁଇ ପ୍ରମୁଖ ରାଜନୈତିକ ଦଳ ବିଜେଡି-ବିଜେପି ଭିତରେ ଜୋରଦାର ହୋଇଛି ରାଜନୈତିକ ପ୍ରତିଯୋଗିତା ।
Kanak News is now on WhatsApp
Join and get latest news updates delivered to you via WhatsApp
ଜାନୁୟାରୀ ୫’ରେ ଯେଉଁ ଭଳି ରାଜନୀତିର ୨ଟି ମେଗା ସୋ’ ଦେଖିବାକୁ ମିଳିଥିଲା, ତା’ର ପୁନରାବୃତି ଘଟିବାକୁ ଯାଉଛି । ଜାନୁୟାରୀ ୧୫ ତାରିଖରେ ପୁଣି ହେବ ମୋଦି ନବୀନ ଲଢେଇ । ବଲାଙ୍ଗୀରରେ ମୋଦି ବିଭିନ୍ନ ଯୋଜନାର ଶୁଭାରମ୍ଭ ସହ ଦଳୀୟ ସମାବେଶ କରୁଥିବା ବେଳେ ଭୁବନେଶ୍ୱର ବରମୁଣ୍ଡା ପଡିଆରେ କୃଷକ କାର୍ଯ୍ୟକ୍ରମର ଉଦଘାଟନ କରିବେ ନବୀନ ପଟ୍ଟନାୟକ
ରାଜନୀତିର ଏହି ପ୍ରତିଦ୍ୱନ୍ଦିତା ଭିତରେ ଚର୍ଚ୍ଚା, କ’ଣ ରହିବ ମୋଦିଙ୍କ ଆଭିମୁଖ୍ୟ?ଖୋର୍ଦ୍ଧା ଓ ବାରିପଦା ଭଳି ନବୀନଙ୍କ ପ୍ରତି ମୋଦିଙ୍କ ଆଭିମୁଖ୍ୟ ନରମ ରହିବ ନା’ ବଲାଙ୍ଗୀରରେ ବଦଳିଯିବ ଷ୍ଟ୍ରାଟେଜି । ଏପଟେ କୃଷି କାର୍ଯ୍ୟକ୍ରମରେ କେନ୍ଦ୍ର ସରକାରଙ୍କୁ ପୁଣି ଟାର୍ଗେଟ୍ କରିବେ କି ନବୀନ ।
ଏଭଳି ପ୍ରଶ୍ନ ଏଥିପାଇଁ ଉଠୁଛି କାରଣ ବିଗତ ୫ଦିନ ଭିତରେ ଦେଶର ରାଜନୀତିରେ ଘଟି ଯାଇଛି ଅନେକ କିଛି ଘଟଣା । ସବର୍ଣ୍ଣ କୋଟା ପ୍ରସଙ୍ଗରେ ବିଜେଡି, ଏନଡିଏ ସରକାରକୁ ସମର୍ଥନ କରିଥିବାବେଳେ ମହାମେଂଟରେ ବିଜେଡି ସାମିଲ ହେବ ନାହିଁ ବୋଲି ବିଜେଡି ସୁପ୍ରିମୋ ସ୍ପଷ୍ଟ କରିସାରିଛନ୍ତି । ଏପଟେ ଓଡ଼ିଶାର ଦୁଇ କେନ୍ଦ୍ର ମନ୍ତ୍ରୀଙ୍କୁ ଛାଡି ଦେଲେ କେନ୍ଦ୍ର- ସ୍ତରୀୟ ବିଜେପି ନେତାଙ୍କ ମୁହଁରୁ ଶୁଣିବାକୁ ମିଳୁନି ବିଜେଡି ବିରୋଧୀ ସ୍ୱର । ଅପରପକ୍ଷରେ ବିଜେଡିର ଆକ୍ରମଣ କିନ୍ତୁ ଦୁଇ ଗୁଣିତ ହୋଇଯାଇଛି ।
ଏସବୁ ଭିତରେ କିନ୍ତୁ ଗୋଟିଏ ମାସ ଭିତରେ ମୋଦିଙ୍କ ତୃତୀୟଥର ଓଡ଼ିଶା ଗସ୍ତ, ଅନେକ କିଛି ବାର୍ତା ରଖୁଛି, ତାହା ପୁଣି ନିର୍ବାଚନ ବର୍ଷରେ । ପୂର୍ବଭାରତ ବିକାଶ କଥା କହି, ବିଜେପି, ବିଜେଡି ଗଡ଼ରେ ପଶିବାକୁ ବି ଉଦ୍ୟମ କରୁଛି ଏଥିରେ ବି ସନ୍ଦେହ ନାହିଁ ।