ବେଗୁନିଆ ବିଧାୟକ ପ୍ରଶାନ୍ତ ଜଗଦେବଙ୍କ ଦାଦାଗିରି ! କାର୍ଯ୍ୟକ୍ରମକୁ ନିମନ୍ତ୍ରଣ ମିଳିନଥିବାରୁ ଟେଣ୍ଟ ଭାଙ୍ଗିଲେ, କର୍ମୀଙ୍କୁ ପିଟିଲେ ।
କନକ ବ୍ୟୁରୋ : ବେଗୁନିଆ ବିଧାୟକ ପ୍ରଶାନ୍ତ ଜଗଦେବଙ୍କ ଦବଙ୍ଗଗିରି । ତାଙ୍କୁ ନଡାକି ବେଗୁନିଆରେ କୌଣସି ବି କାର୍ଯ୍ୟକ୍ରମ କଲେ ଯେପରି ସହି ପାରୁ ନାହାନ୍ତି ବିଧାୟକ । ଆଜି ସେବା ଅନୁଷ୍ଠାନ ପକ୍ଷରୁ ହେଉଥିବା ରକ୍ତଦାନ ଶିବିରକୁ ଅଧାରୁ ବନ୍ଦ କରିବାକୁ ପଡିଛି । କାରଣ ସ୍ଥାନୀୟ ବିଧାୟକ ପ୍ରଶାନ୍ତ ଜଗଦେବଙ୍କୁ ସେବା ଅନୁଷ୍ଠାନ ପକ୍ଷରୁ ନିମନ୍ତ୍ରଣ କରାଯାଇନଥିଲା । ହେଲେ ରକ୍ତଦାନ ଶିବିର ବନ୍ଦ କରିବାର କାରଣ ସଂପର୍କରେ ସିଡିଏମଓ କିଛି କହୁନଥିଲେ ମଧ୍ୟ ଗତକାଲିର ଘଟଣାରୁ ଏହା ଯେ ବିଧାୟକଙ୍କ କାମ ତାହା ସ୍ପଷ୍ଟ ଜଣାପଡୁଛି ।
Kanak News is now on WhatsApp
Join and get latest news updates delivered to you via WhatsApp
ସେବା ଅନୁଷ୍ଠାନ ପକ୍ଷରୁ ଅଂଚଳର ଗରିବ ଲୋକଙ୍କୁ କମ୍ବଳ, ଚପଲ ବଂଟନ କାର୍ଯ୍ୟକ୍ରମ ପାଇଁ ଗତକାଲି ବେଗୁନିଆ ମିନି ଷ୍ଟାଡିୟମରେ ଟେଂଟ ପୋତା ଯାଉଥିଲା । ହେଲେ ବିଧାୟକ ପ୍ରଶାନ୍ତ ଜଗଦେବଙ୍କୁ କାର୍ଯ୍ୟକ୍ରମକୁ ନିମନ୍ତ୍ରଣ କରାଯାଇନଥିବାରୁ ରାତିରେ ନିଜେ ବିଧାୟକ ଓ ତାଙ୍କ ସହକର୍ମୀ ଯାଇ ଟେଂଟ ଉପାଡି ଫିଙ୍ଗି ଦେଇଥିଲେ । ଏଥିସହ ସେବା ଅନୁଷ୍ଠାନର ସଦସ୍ୟଙ୍କୁ ମଧ୍ୟ ମାଡ ମାରିଥିବା ଅଭିଯୋଗ ହୋଇଛି । ଏନେଇ ଥାନାରେ ମଧ୍ୟ ଏତଲା ଦିଆଯାଇଛି । ତେବେ ବିଧାୟକ ପ୍ରଶାନ୍ତ ଜଗଦେବଙ୍କ ଏଭଳି ଦବଙ୍ଗଗିରି ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି ।