ଏଥର ଆସିବ ବଡ ବଜେଟ: କାଳିଆ, ମିଶନ ଶକ୍ତିକୁ ଅଧିକ ଫୋକସ ! ନିର୍ବାଚନ ଜିତାଇ ଥିବାରୁ ସିଂହଭାଗ ନେବେ ଚାଷୀ ଓ ମହିଳା

271

କନକ ବ୍ୟୁରୋ: ଉପସ୍ଥାପିତ ହେବ ନୂଆ ସରକାରର ନୂଆ ବଜେଟ । ଆସନ୍ତା ୨୮ ତାରିଖରେ ବିଧାନସଭାରେ ଉପସ୍ଥାପିତ ହେବ ବଜେଟ । ତେଣୁ ଏଥିପାଇଁ ଆଗତ ହୋଇଛି ବଜେଟ ଚିଠା ପ୍ରସ୍ତାବ । ରାଜ୍ୟ ମନ୍ତ୍ରିପରିଷଦ ବୈଠକରେ ଚିଠା ପ୍ରସ୍ତାବ ଆଗତ ହୋଇଛି ।
ଏଥର ବଜେଟର ପରିମାଣକୁ ବୃଦ୍ଧି କରାଯାଇଛି । ବଜେଟର ପରିମାଣ ପ୍ରାୟ ୧ ଲକ୍ଷ ୩୯ ହଜାର କୋଟିର ଚିଠା ପ୍ରସ୍ତାବ ଆଗତ ହୋଇଥିବା ସୂଚନା ମିଳିଛି । ଆଜି ବସିଥିବା ମନ୍ତ୍ରି ପରିଷଦ ବୈଠକରେ ବଜେଟ ବୃଦ୍ଧିକୁ ମଞ୍ଚୁରୀ ମିଳିଛି । ଯଦିଓ ବଜେଟର ଆକାର ନେଇ ସରକାର କୌଣସି ବିଧିବଦ୍ଧ ସୂଚନା ଦେଇନାହାନ୍ତି ତଥାପି ଏଥର କାଳିଆ ଯୋଜନା ଓ ମିଶନ ଶକ୍ତି ଯୋଜନା ପାଇଁ ଅଧିକ ବ୍ୟୟବରାଦ କରାଯାଇଥିବା ସୂଚନା ମିଳିଛି ।

ତେବେ ଏଥର ନବୀନଙ୍କୁ ପଞ୍ଚମ ଥରର ସରକାର ଗଢିବାରେ ଅନେକ ମାତ୍ରାରେ ସାହାଯ୍ୟ କରିଛି ନବୀନଙ୍କ ଏହି ଲୋକାଭିମୁଖୀ ଯୋଜନା । କାଳିଆ ଯୋଜନା ଓ ମିଶନ ଶକ୍ତି ଯୋଜନା ନବୀନଙ୍କୁ ୫ମ ପାଳିର ସରକାର କରିବାରେ ଏକ ବଡ ଭୂମିକା ଗ୍ରହଣ କରିଛି । କାଳିଆ ଯୋଜନାରେ ଚାଷୀଙ୍କ ପରିବାରକୁ ପ୍ରଥମେ ୫ ହଜାର ଟଙ୍କା ପଠାଇ କୃଷକଙ୍କ ମନ ଜିଣିଥିଲେ ମୁଖ୍ୟମନ୍ତ୍ରୀ । ଆଉ ନୂଆ ସରକାର ଗଢିବା ଦିନ ହିଁ ଆଉ ୫ ହଜାର କୃଷକଙ୍କ ଖାତାକୁ ପଠାଇବେ ବୋଲି ନବୀନ ନିର୍ବାଚନ ପୂର୍ବରୁ ପ୍ରତିଶ୍ରୁତି ଦେଇଥିଲେ । ବିଜୟ ପରେ ଆଉ ସରକାର କରିବା ପରେ ନବୀନ ପ୍ରତିଶ୍ରୁତି ପାଳିଲେ । ତେଣୁ ନିର୍ବାଚନ ଜିତାଇଥିବା ଯୋଜନାକୁ ଏଥର ବଜେଟରେ ଅଧିକ ଫୋକସ ଦିଆଯିବ ବୋଲି ସୂଚନା ମିଳିଛି ।

ସେହିପରି ନବୀନଙ୍କ ଅନ୍ୟ ଏକ ଲୋକାଭିମୁଖୀ ଯୋଜନା ହେଉଛି ମହିଳାଙ୍କ ପାଇଁ ଉଦିଷ୍ଟ ମିଶନ ଶକ୍ତି ଯୋଜନା । ଚଳିତ ନିର୍ବାଚନରେ ମହିଳା ଅନେକ ଗୁରୁତ୍ୱ ବହନ କରିଥିବାରୁ ନିର୍ବାଚନ ପୂର୍ବରୁ ସବୁ ଦଳ ମହିଳା କାର୍ଡ ଖେଳିଥିଲେ । ତେବେ ନବୀନ ମଧ୍ୟ ମହିଳା କାଡ ଖେଳି ମିଶନ ଶକ୍ତି ମାଧ୍ୟମରେ ମହିଳା ସ୍ୱୟଂ ସହାୟକ ଗୋଷ୍ଠୀକୁ ସ୍ୱାବଲମ୍ବୀ କରାଇଥିଲେ । ନିଜ ଗୋଡରେ ନିଜେ ଛିଡା ହେବାକୁ ନବୀନ ମହିଳାଙ୍କୁ ନାରା ଦେଇଥିଲେ । ଆଉ ବିଜୟ ପରେ ନୂଆ ସରକାରର ନୂଆ ବଜେଟରେ ନବୀନ ମିଶନ ଶକ୍ତି ଯୋଜନାରେ ଅଧିକ ବ୍ୟୟବରାଦ କରିଥିବା ସୂଚନା ମିଳିଛି । ତେବେ ୨୮ ତାରିଖରେ ବଜେଟ ଉପସ୍ଥାପନା ପରେ ହିଁ ସ୍ପଷ୍ଟ ହେବ କେଉଁ ଯୋଜନାକୁ କେତେ ଅର୍ଥ ମିଳୁଛି ।

Comments are closed.