ବିମାନ ଏଏନ୍-୩୨ର ମିଳିଲାନି ପତା : ନିଖୋଜ କର୍ମଚାରୀଙ୍କ ପରିବାରକୁ ଗଲା ମୃତ୍ୟୁର ଚିଠି
କନକ ବ୍ୟୁରୋ : ନିଖୋଜ ବାୟୁସେନା ବିମାନ ଏଏନ୍-୩୨ର ମିଳିଲାନି ପତା। ପ୍ରାୟ ଦୁଇ ମାସର ସର୍ଚ୍ଚ ଅପରେସନ ପରେ ବି ବିମାନର ପତା ନମିଳିବାରୁ ବିମାନରେ ଥିବା ସମସ୍ତ ଯାତ୍ରୀଙ୍କୁ ମୃତ ବୋଲି ଧରି ନେଇଛି ଭାରତୀୟ ବାୟୁସେନା । ବିମାନରେ ଥିବା ସମସ୍ତ ଯବାନ ଏବଂ ବ୍ୟକ୍ତିଙ୍କ ବଂଚିଥିବାର ସଂଭାବନା ନାହିଁ ବୋଲି ବାୟୁସେନା ପକ୍ଷରୁ କୁହାଯାଇଛି । ତେଣୁ ସମସ୍ତଙ୍କୁ ମୃତ ଘୋଷଣା କରିବା ସହ ବିମାନରେ ଥିବା ୨୯ ଜଣ ଯାତ୍ରୀଙ୍କ ପରିବାର ଲୋକଙ୍କୁ ଏନେଇ ଅବଗତ କରାଯାଇଛି। ଏନେଇ ଜାତୀୟ ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି।
Kanak News is now on WhatsApp
Join and get latest news updates delivered to you via WhatsApp
ବାୟୁସେନାର ଏହି ବିମାନରେ ୨ଜଣ ଓଡ଼ିଆ ଯବାନ ମଧ୍ୟ ଥିଲେ । ଗଂଜାମ ଜିଲ୍ଲା ବ୍ରହ୍ମପୁର ସୁକୁଣ୍ଡାର ଚରଣ, ଏହି ବିମାନରେ ଯାତ୍ରା କରୁଥିଲେ । ସେହିପରି ଯାଜପୁର ଜିଲ୍ଲା ରଙ୍ଗରଙ୍ଗା ଗାଁର ପୂର୍ଣ୍ଣଚନ୍ଦ୍ର ସେନାପତି ଏହି ବିମାନ ଯୋଗେ ପୋର୍ଟବ୍ଲେୟାର ଆସୁଥିଲେ । ଦୀର୍ଘ ଦିନ ଧରି ପୁଅଙ୍କ ଫେରିବା ବାଟକୁ ଚାହିଁ ରହିଥିବା ବେଳେ ଏବେ ଆସିଛି ମୃତ୍ୟୁର ଚିଠି। ଗତ ଜୁଲାଇ ୨୨ ତାରିଖରେ ବାୟୁସେନାର ବିମାନ ଏଏନ୍-୩୨ , ୨୯ ଜଣ ଯାତ୍ରୀଙ୍କୁ ଧରି ଚେନ୍ନାଇରୁ ପୋର୍ଟବ୍ଲେୟାର ଅଭିମୁଖେ ଯାଉଥିବାବେଳେ ନିଖୋଜ ହୋଇଯାଇଥିଲା।