କନକ ବ୍ୟୁରୋ: କୋରାପୁଟ ଜିଲ୍ଲାରେ ଯବାନଙ୍କ ଏହି ଜଘନ୍ୟକାଣ୍ଡକୁ ନେଇ ଜଳିଲା ପ୍ରତିବାଦର ନିଆଁ । ନାବାଳିକାଙ୍କୁ ଗଣଦୁଷ୍କର୍ମ ଘଟଣାର ଅଭିଯୁକ୍ତଙ୍କୁ ଗିରଫ ଦାବିରେ ଶତାଧିକ ଲୋକ ରାଜରାସ୍ତାକୁ ଓହ୍ଲାଇଛନ୍ତି । ଗତକାଲିଠାରୁ ଏହି ଆନ୍ଦୋଳନ ଜାରି ରହିଛି । କୋରାପୁଟରେ ଜାତୀୟ ରାଜପଥ ଅବରୋଧ କରାଯାଇଛି । କୁନ୍ଦୁଲିରେ ଏନଏଚ-୨୬ ଅବରୋଧ କରିଛନ୍ତି ଆନ୍ଦୋଳନକାରୀ । ଫଳରେ ଯାତାୟତରେ ବାଧା ସୃଷ୍ଟି ହୋଇଛି । ବିଶାଖାପାଟଣା-ଜୟପୁର ଗାଡି ଚଳାଚଳ ବାଧାପ୍ରାପ୍ତ ହୋଇଛି । ଦୋଷୀଙ୍କୁ ଗିରଫ ଦାବିରେ ଆନ୍ଦୋଳନକାରୀ ଅଡି ବସିଛନ୍ତି । ପୋଲିସ ଆନ୍ଦୋଳନକାରୀଙ୍କୁ ବୁଝାସୁଝା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ମାଓବାଦୀଙ୍କ କବଳରୁ ଲୋକଙ୍କୁ ସୁରକ୍ଷା ଦେବା ପାଇଁ ମୁତୟନ ହୋଇଥିବା ଯବାନଙ୍କ ବିରୋଧରେ ଆସିଥିଲା ଜଘନ୍ୟ ଅଭିଯୋଗ । କୋରାପୁଟରୁ ପାଖାପାଖି ଶହେ କିଲୋମିଟର ଦୂର ସେମିଳିଗୁଡାରେ ଜଣେ ନୀରିହ ନାବାଳିକାକୁ ସୁରକ୍ଷାକର୍ମୀ ମାନେ ଗଣଦୁଷ୍କର୍ମ କରିଥିବା ଅଭିଯୋଗ ହୋଇଛି । ସଂପୃକ୍ତ ନବମ ଶ୍ରେଣୀ ଛାତ୍ରୀଙ୍କୁ କୋବ୍ରା ବାଟାଲିୟନର ୪ ଜଣ ଯବାନ ଜଙ୍ଗଲ ମଧ୍ୟରେ ଗଣ ଦୁଷ୍କର୍ମ କରିଥିବା ଅଭିଯୋଗ ହୋଇଛି । ଗୁରୁତର ଅବସ୍ଥାରେ ମେଡ଼ିକାଲରେ ଭର୍ତ୍ତି ହୋଇଥିବା ନାବାଳିକାଙ୍କ ସ୍ୱାସ୍ଥ୍ୟବସ୍ଥା ଏବେ ବି ସଂକଟାପନ୍ନ ରହିଛି । ସେପଟେ ଘଟଣା ପାଇଁ ଦୁଃଖ ପ୍ରକାଶ କରିବା ସହ ଘଟଣାକୁ ଅମାନବୀୟ କହି କଡା ସ୍ୱରରେ ନିନ୍ଦା କରିଛନ୍ତି ମୁଖ୍ୟମନ୍ତ୍ରୀ ।
ତେବେ ଯବାନଙ୍କ ପୋଷାକରେ ଥିବା ୪ ଜଣ ବ୍ୟକ୍ତି ଦୁଷ୍କର୍ମ କରିଥିବା ପୀଡ଼ିତା ନାବାଳିକା ତାଙ୍କ ବୟାନରେ କହିଛନ୍ତି । ନାବାଳିକାଙ୍କ ଏହି ବୟାନ ପରେ ସନ୍ଦେହ ଘେରରୁ ଚାଲି ଆସିଛନ୍ତି କୋରାପୁଟରେ ରହୁଥିବା ରିଜର୍ଭ ଫୋର୍ସର ଯବାନ । ତେବେ ଏହି ଅଭିଯୋଗକୁ ଖଣ୍ଡନ କରିଛି ବିଏସଏଫ୍ । ଘଟଣା ଘଟିଥିବା ଅଂଚଳକୁ ବିଏସଏଫ୍ ଅପରେସନ୍ ପାଇଁ ଯାଇନାହିଁ ବୋଲି କହିଛନ୍ତି ଡିଆଇଜି ଜେ.ସି ନାୟକ । ଅନ୍ୟପଟେ, ଏହି ଘଟଣାରେ ପୁଲିସ୍ ଡିଜି ମଧ୍ୟ କଡ଼ା ପ୍ରତିକ୍ରିୟା ରଖିଛନ୍ତି । ଘଟଣାରେ ଯେକେହିବି ସଂପୃକ୍ତ ଥାଆନ୍ତୁ ନା କାହିଁକି, ଦୃଢ କାର୍ଯ୍ୟାନୁଷ୍ଠାନ ହେବ ବୋଲି ପୁଲିସ ଡିଜି ସୂଚନା ଦେଇଛନ୍ତି ।