ସାଧାରଣ କୃଷକ ଭଳି ବିଲରେ କାମ କରୁଥିଲେ କୃଷିମନ୍ତ୍ରୀ : ମନ୍ତ୍ରୀଙ୍କ କାମକୁ ପ୍ରଶଂସା କରିବା ସହ ସୋସିଆଲ ମିଡିଆରେ ଫଟୋ ସେୟାର କଲେ ରାଜ୍ୟପାଳ
ଏହି ଭାରତରେ ଏପରି ଜଣେ ନେତା ଅଛନ୍ତି ଯିଏ କି ଅତି ସାଧାରଣ ଭାବରେ ନିଜର କାମକୁ ଅତ୍ୟନ୍ତ ନିଷ୍ଠାରେ ସମ୍ପାଦନ କରନ୍ତି
କନକ ବ୍ୟୁରୋ : ଆମ ଦେଶ ଭାରତରେ ଯଦି କୌଣସି ବ୍ୟକ୍ତି କୌଣସି ସରକାରୀ ଅଥବା ମର୍ଯ୍ୟାଦା ପଦ-ପଦବୀରେ ରହନ୍ତି ତେବେ କଥା ସରିଲା । କାରଣ ଅନେକ ସମୟରେ ଦେଖାଯାଏକି ସେମାନେ ନିଜକୁ ସାଧାରଣ ମଣିଷ ଭାବନ୍ତି ନାହିଁ । ଏପରିକି ଲୋକମାନଙ୍କ ସହ କଥା ହେବା ସମୟରେ ବି ସେମାନେ କୁଣ୍ଠାବୋଧ କରନ୍ତି । କାରଣ ସେମାନେ ଭାବନ୍ତି ଯେ, ଆମେ ମାନେ ଯେଉଁ ପୋଷ୍ଟରେ ରହିଛୁ ତାହାର ଅର୍ଥ ହେଉଛି ଆମେ ସାଧାରଣ ଲୋକମାନଙ୍କଠାରୁ ଭିନ୍ନ । ଏହାସହ ନେତାମାନଙ୍କ କଥା ପଚାରେ କିଏ? କାରଣ ଅନେକ ସମୟରେ ନେତାମାନେ ସାଧାରଣ ଲୋକମାନଙ୍କ ପାଖକୁ କେବଳ ନିର୍ବାଚନ ସମୟରେ ଯାଆନ୍ତି ଆଉ ଅନ୍ୟ ସମୟରେ ଅଚିହ୍ନା କରନ୍ତି । କିନ୍ତୁ ଏହି ଭାରତରେ ଏପରି ଜଣେ ନେତା ଅଛନ୍ତି ଯିଏ କି ଅତି ସାଧାରଣ ଭାବରେ ନିଜର କାମକୁ ଅତ୍ୟନ୍ତ ନିଷ୍ଠାରେ ସମ୍ପାଦନ କରନ୍ତି । ମିଳିଥିବା ସୂଚନା ଅନୁସାରେ ସେ ଜଣେ କୃଷି ମନ୍ତ୍ରୀ ମଧ୍ୟ । ସେ ପୁଡୁଚେରୀର କୃଷିମନ୍ତ୍ରୀ ଅଛନ୍ତି ଏବଂ ତାଙ୍କର ନାମ କମଲ । ଜାତୀୟ ଗଣମାଧ୍ୟମରୁ ମିଳିଥିବା ସୂଚନା ଅନୁସାରେ, ସେ ନିଜ ନିର୍ବାଚନ ମଣ୍ଡଳୀ ଯାଇଥିବା ସମୟରେ ନିଜ ବିଲରେ ୨ ଘଣ୍ଟାରୁ ଅଧିକ ସମୟ କାମ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ତେବେ ଏହି ଘଟଣା କନକ ସୋସିଆଲ ମିଡିଆରେ ପ୍ରବଳ ବେଗରେ ଚର୍ଚ୍ଚା ହୋଇଥିଲା । ଗୁରୁତ୍ୱପୂର୍ଣ୍ଣ ବିଷୟ ହେଲା ଖୋଦ ସେଠାକାର ରାଜ୍ୟପାଳ ଏହି ଭିଡିଓକୁ ସେୟାର କରିଛନ୍ତି । ରାଜ୍ୟପାଳ ସେହି ଭିଡିଓ ସେୟାର କରିଥିବା ସମୟରେ ଲେଖିଛନ୍ତି କି ଆପଣ ଜାଣିବା ପାଇଁ ଚେଷ୍ଟା କରନ୍ତୁ ସେହି ବ୍ୟକ୍ତି ଜଣକ କିଏ? ଏହାପରେ ସେ ଲେଖିଛନ୍ତି ଯେ, ରାଜ୍ୟର କୃଷିମନ୍ତ୍ରୀ । ରାଜ୍ୟପାଳ ମଧ୍ୟ କୃଷିମନ୍ତ୍ରୀଙ୍କ କାମକୁ ଅତ୍ୟନ୍ତ ପ୍ରଶଂସା କରିଛନ୍ତି । ପ୍ରକୃତରେ ଆମେ ଯେଉଁ ପଦପଦବୀରେ ରହିଥାଉ ନା କାହିଁକି ଆମର ନିଜ କାମ କଲେ କୌଣସି ଅସୁବିଧା ହୋଇନଥାଏ । ତେଣୁ ବିନା କୈାଣସି ଭାବନାରେ ଆମକୁ ନିଜ କାମ ଅତ୍ୟନ୍ତ ନିଷ୍ଟାର ସହ ସମ୍ପାଦନ କରିବାର ଆବଶ୍ୟକତା ରହିଛି ବୋଲି ରାଜ୍ୟପାଳ କିରଣ ବେଦୀ କହିଛନ୍ତି । କେବଳ କୃଷି ବିଭାଗ ନୁହେଁ କମଲଙ୍କ ପାଖରେ ବିଜୁଳି ଓ ଶିକ୍ଷା ସହ ଅନେକ ଗୁରୁତ୍ୱପୂର୍ଣ୍ଣ ବିଭାଗ ରହିଛି । ଜଣେ ମନ୍ତ୍ରୀଙ୍କର ଏପରି କାର୍ଯ୍ୟକୁ ସାରା ଦେଶରେ ଚର୍ଚ୍ଚା କରିବା ସହ ଯେଉଁମାନେ ଏହି ଭିଡିଓକୁ ଦେଖୁଛନ୍ତି ସେମାନେ ପ୍ରଶଂସା କରୁଥିବା ଦେଖାଯାଉଛି ।