ଆଧାର କାର୍ଡ ନାହିଁ ତ ମଧ୍ୟାହ୍ନ ଭୋଜନ ନାହିଁ ! ଛାତ୍ରଛାତ୍ରୀଙ୍କ ପାଇଁ ଡେଡଲାଇନ୍ ଜାରି କଲେ ସରକାର
କନକ ବ୍ୟୁରୋ : ଆଧାର କାର୍ଡ ନାହିଁ ତ ସ୍କୁଲରେ ମଧ୍ୟାହ୍ନ ଭୋଜନ ନାହିଁ । ଜୁଲାଇ ୩୧ ତାରିଖ ସୁଦ୍ଧା ରାଜ୍ୟର ସମସ୍ତ ସ୍କୁଲର ସବୁ ଛାତ୍ରଛାତ୍ରୀଙ୍କ ଡାଟା ସହ ଆଧାର ନମ୍ବର ଲିଙ୍କ୍ କରିବାକୁ ନିର୍ଦ୍ଦେଶ ଦେଇଛନ୍ତି ରାଜ୍ୟ ସରକାର । ଏ ନେଇ ସ୍କୁଲ ଓ ଗଣଶିକ୍ଷା ବିଭାଗ ସଚିବ ରଂଜନା ଚୋପ୍ରା ରାଜ୍ୟର ସମସ୍ତ ଡିଷ୍ଟ୍ରିକ୍ଟ ଏଜୁକେସନ୍ ଅଫିସର-ଡିଇଓ, ବ୍ଲକ୍ ଏଜୁକେସନ୍ ଅଫିସର- ବିଇଓ ଏବଂ ସର୍ବଶିକ୍ଷା ଅଭିଯାନର ଜିଲ୍ଲା ପ୍ରକଳ୍ପ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ର ସରକାର ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀଙ୍କ ପାଇଁ ସହାୟତା ପାଇବାକୁ ହେଲେ ସର୍ବଶିକ୍ଷା ଅଭିଯାନ, ରାଷ୍ଟ୍ରୀୟ ମାଧ୍ୟମିକ ଶିକ୍ଷା ଅଭିଯାନ ଓ ମଧ୍ୟାହ୍ନ ଭୋଜନ ଯୋଜନାର ହିତାଧିକାରୀଙ୍କ ପାଇଁ ଆଧାର ନମ୍ବର ଯୋଡ଼ିବାକୁ ବାଧ୍ୟତାମୂଳକ କରିଛନ୍ତି ।
ପ୍ରତ୍ୟେକ ଛାତ୍ରଛାତ୍ରୀଙ୍କ ଆଧାର ନମ୍ବରକୁ ଜୁଲାଇ ୩୧ ତାରିଖ ସୁଦ୍ଧା ଷ୍ଟୁଡେଂଟ୍ ଡାଟାବେସରେ ଯୋଡ଼ିବା ପାଇଁ ରାଜ୍ୟ ସରକାର ପୂର୍ବରୁ ବି ନର୍ଦ୍ଦେଶ ଦେଇଥିଲେ । ଏହି ଡାଟାବେସ୍ ଏବେ ରାଜ୍ୟ ଓ ସର୍ବଭାରତୀୟ ସ୍ତରରେ ସ୍ୱଚ୍ଛତା ଆଣିବ ବୋଲି ଆଶା କରାଯାଉଛି । ତେବେ ଯେଉଁ ଛାତ୍ରଛାତ୍ରୀଙ୍କ ଆଧାର କାର୍ଡ ବା ନମ୍ବର ନାହିଁ, ସେମାନଙ୍କ ଆଧାର କାର୍ଡ ଖୁବ୍ ଶୀଘ୍ର ତିଆରି କରାଇନେବା ପାଇଁ ବିଇଓମାନଙ୍କୁ ନିର୍ଦ୍ଦେଶ ଦିଆଯାଇଛି ।