ମାଟ୍ରିକ୍ ପ୍ରଶ୍ନପତ୍ର ଲିକ୍ ! ପରୀକ୍ଷାର ୧୦ ମିନିଟ ପରେ ହ୍ୱାଟସଆପରେ ଘୂରି ବୁଲିଲା ପ୍ରଶ୍ନପତ୍ର, ମନ୍ତ୍ରୀ କହିଲେ ଘଟଣାରେ ନାହିଁ କୌଣସି ସତ୍ୟତା
କନକ ବ୍ୟୁରୋ : ମାଟ୍ରିକ ପରୀକ୍ଷା ଆରମ୍ଭରୁ ଦେଖା ଦେଲା ବିବାଦ । ହ୍ୱାଟସ ଆପରେ ଘୁରି ବୁଲିଲା ମାତୃଭାଷାର ପ୍ରଶ୍ନ ପତ୍ର । କେନ୍ଦ୍ରାପଡ଼ା ଜିଲ୍ଲା ଆଳି ବଜାର ଅଂଚଳରେ ହ୍ୱାଟସଆପରେ ମାତୃଭାଷା ସେଟ୍ – ଏ’ ଓ ସି’ର ପ୍ରଶ୍ନପତ୍ର ଭାଇରାଲ ହୋଇଥିବା ଅଭିଯୋଗ ହୋଇଛି । ଏହି ପ୍ରଶ୍ନପତ୍ର ଅସଲି କି ନକଲି ତାହା ସ୍ପଷ୍ଟ କରାଯାଇ ନଥିବା ବେଳେ ଗଣଶିକ୍ଷା ବିଭାଗ ଅଭିଯୋଗକୁ ଖଣ୍ଡନ କରିଛି ।
Kanak News is now on WhatsApp
Join and get latest news updates delivered to you via WhatsApp
ପରୀକ୍ଷାର ପ୍ରଥମ ଦିନରେ ଗୋଟିଏ ପଟେ କ୍ଲାସରୁମରେ ପିଲା ମାତୃଭାଷା ପରୀକ୍ଷା ଦେଉଥିଲେ ଆଉ ଅନ୍ୟପଟେ ମୋବାଇଲରୁ ମୋବାଇଲ ଘୁରିବୁଲୁଥିଲା ପ୍ରଶ୍ନପତ୍ର । ଏହି ଖବର ସୃଷ୍ଟି କରିଥିଲା ବିବାଦ । ପିଲା ପରୀକ୍ଷା ଦେଉଥିବା ମାତୃଭାଷାର ଅବିକଳ ପ୍ରଶ୍ନ ହ୍ୱାଟ୍ସଆପ୍ ବୁଲୁଥିବା ଅଭିଯୋଗ ହୋଇଥିଲା । ସେଟ୍-ଏ ଓ ସେଟ୍-ସିର ପ୍ରଶ୍ନପତ୍ର ବାହାରକୁ ଆସିଥିବା ଖବର ବ୍ୟାପିବାରେ ଲାଗିଥିଲା । ପରୀକ୍ଷାର ୧୦ ମିନିଟ୍ ପରେ କେନ୍ଦ୍ରାପଡା ଆଳି ବଜାର ଅଂଚଳରେ ଦେଖାଦେଇଥିଲା ଏଭଳି ସ୍ଥିତି ।
ପରୀକ୍ଷାର ୧୦ ମିନିଟ ପରେ ହ୍ୱାଟସଆପରେ ଘୂରି ବୁଲିଲା ପ୍ରଶ୍ନପତ୍ର । ଲିକ୍ ହୋଇଥିବା ପ୍ରଶ୍ନପତ୍ର ସହ ମେଳ ଖାଉଥିଲା ଅସଲି ପ୍ରଶ୍ନପତ୍ର। ଗୋଟିଏ ହେଉଛି ଛାତ୍ରଛାତ୍ରୀ ଦେଇଥିବା ପରୀକ୍ଷା ପ୍ରଶ୍ନପତ୍ର ଏବଂ ଅନ୍ୟଟି ହ୍ୱାଟ୍ସଆପରେ ବୁଲୁଥିବା ପ୍ରଶ୍ନପତ୍ର । ଦୁଇଟି ଯାକରେ ସମସ୍ତ ପ୍ରଶ୍ନ ମେଳ ଖାଉଛି । ହେଲେ ଗଣଶିକ୍ଷା ବିଭାଗ ପ୍ରଶ୍ନପତ୍ର ଲିକ ଘଟଣାକୁ ଖଣ୍ଡନ କରିଛି । ସେପଟେ ଅଭିଯୋଗ ପରେ ବୋର୍ଡର ଗୁରୁତ୍ୱପୂଣ୍ଣ ବୈଠକ ବସିଛି । ଲିକ୍ ପ୍ରଶ୍ନ ସହ ଅସଲ ପ୍ରଶ୍ନର ମେଳ ଖାଉଛି କି ନାହିଁ? କେଉଁଠୁ ପ୍ରଶ୍ନପତ୍ର ଲିକ୍ ହେଲା ଓ କିଏ ପ୍ରଶ୍ନପତ୍ରକୁ ଭାଇରାଲ କରିଛି ସେନେଇ ଆଲୋଚନା ହୋଇଛି ।ପ୍ରାଥମିକ ତଦନ୍ତ ପରେ ଏହି ଘଟଣାରେ କୌଣସି ସତ୍ୟତା ନାହିଁ ବୋଲି କହିଛନ୍ତି ବିଭାଗୀୟ ମନ୍ତ୍ରୀ । ମାଟ୍ରିକ୍ ପରୀକ୍ଷା ଆରମ୍ଭରୁ ସାମ୍ନାକୁ ଆସିଛି ଏଭଳି ବିଭ୍ରାଟ । ଗଣଶିକ୍ଷା ବିଭାଗ ଏହାକୁ ଗୁଜବ ବୋଲି କହୁଥିବା ବେଳେ ଆଗକୁ ଅନ୍ୟ ପରୀକ୍ଷା ଉପରେ ଉଠିଛି ପ୍ରଶ୍ନ ।