ମେଧାବୀଙ୍କୁ ଠକିଲେ ସରକାର ! ନକଲି ଛାତ୍ରଙ୍କୁ ଦିଆଯାଇଛି କୋଟି କୋଟି ଟଙ୍କାର ବୃତ୍ତିରାଶି
କନକ ବ୍ୟୁରୋ : ୫ ମାସ ତଳେ କନକ ନ୍ୟୁଜରେ ମେଧାବୃତି ଘୋଟାଲା ସଂପର୍କରେ ପ୍ରକାଶ ପାଇଥିବା ରିପୋର୍ଟ ଏବେ ସତ୍ୟ ପ୍ରମାଣିତ ହୋଇଛି । ଉଚ୍ଚ ଶିକ୍ଷା ବିଭାଗର ଅଡିଟରୁ ବର୍ଷେ ତଳୁ ଏ ମହାଦୁର୍ନୀତି ଧରାପଡ଼ିଥିଲେ ସୁଦ୍ଧା ସରକାର ନିରବଦ୍ରଷ୍ଟା ହୋଇ ବସିଛନ୍ତି । ଓକେସିଏଲ୍ ଓ ଉଚ୍ଚଶିକ୍ଷା ବିଭାଗର ମଧୁଚନ୍ଦ୍ରିକା ଭିତରେ ହଜାର ହଜାର ଛାତ୍ରଙ୍କ ମେଧାବୃତି ଟଙ୍କାକୁ ନକଲି ଛାତ୍ରଙ୍କ ଦ୍ୱାରା ହଡ଼ପ କରାଯାଇଥିଲେ ସୁଦ୍ଧା କୌଣସି ଉଚ୍ଚପଦସ୍ଥ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇନାହିଁ ।
Kanak News is now on WhatsApp
Join and get latest news updates delivered to you via WhatsApp
ଉଚ୍ଚଶିକ୍ଷା ବିଭାଗ ପକ୍ଷରୁ ପ୍ରସ୍ତୁତ କରାଯାଇଥିବା ଏକ ବିଲରେ ୩୦୨ଜଣ କଲେଜ ଛାତ୍ରଛାତ୍ରୀଙ୍କୁ ଦୁଇ ବର୍ଷରେ ୨୦ ହଜାର ଟଙ୍କା ଲେଖାଏଁ ବୃତିରାଶି ଦିଆଯାଇଥିବା ଦର୍ଶାଯାଇଛି । ଅଭିଯୋଗ ପରେ ଅଡିଟରୁ ଜଣାପଡ଼ିଛି- ୧୯୮ ଜଣ ଛାତ୍ରଛାତ୍ରୀଙ୍କ ଆକାଉଂଟ୍ ରିନ୍ୟୁଆଲ୍ ହୋଇନଥିଲେ ସୁଦ୍ଧା ବେଆଇନ ଭାବେ ବୃତିରାଶି ଦିଆଯାଇଛି ଓ ସେ ଫାଇଲକୁ ହଜାଇ ଦିଆଯାଇଛି । ଏଭଳି ଭାବେ ୩୯ ଲକ୍ଷ ୬୦ ହଜାର ଟଙ୍କା ତୋଷରପାତ କରାଯାଇଛି । ଉତ୍କଳ ବିଶ୍ୱବିଦ୍ୟାଳୟରେ ପଢ଼ୁଥିବା ୨୩ଜଣ ଛାତ୍ରଛାତ୍ରୀଙ୍କ ଆକାଉଂଟକୁ ଟଙ୍କା ଦିଆଯାଇଥିବା ଦର୍ଶାଯାଇଥିଲେ ସୁଦ୍ଧା ଉତ୍କଳ ବିଶ୍ୱବିଦ୍ୟାଳୟରେ ପାଠପଢ଼ୁନଥିବା ୧୭ଜଣ ଅଯୋଗ୍ୟ-ଅଣଛାତ୍ରଙ୍କୁ ବୃତ୍ତିରାଶି ମିଳିଛି ।
ମୋଟ ଉପରେ ଅନେକ କ୍ଷେତ୍ରରେ କଲେଜ ମୁଖ୍ୟଙ୍କ ଅନୁମୋଦନ ନଥାଇ ବା ଜାଲ୍ କରାଯାଇ ବୃତି ଟଙ୍କା ଉଠାଯାଇଛି । ଏମତି ଭାବରେ ଗୋଟିଏ ବିଲରେ ୬୦ ଲକ୍ଷ ଟଙ୍କା ଲୁଟ୍ କରାଯାଇଛି । କେବଳ ୨୦୧୪ ମସିହାରେ ଏଭଳି ଭାବେ ୪୩୬ଟି ବିଲ୍ ପ୍ରସ୍ତୁତ ହୋଇଛି । ଏହାଦ୍ୱାରା ଯୋଗ୍ୟ ମେଧାବୀ ଛାତ୍ରଛାତ୍ରୀଙ୍କ ପାଖରେ ବୃତି ରାଶି ନପହଂଚି କୋଟି କୋଟି ଟଙ୍କା ହଡପ କରାଯାଇଥିବା ସ୍ପଷ୍ଟ ହୋଇଛି ।
ଉଚ୍ଚ ଶିକ୍ଷା ବିଭାଗ ଯୁକ୍ତ ଦୁଇ, ଯୁକ୍ତ ତିନି, ପିଜି ଓ ବୈଷୟିକ କଲେଜରେ ପଢ଼ୁଥିବା ପ୍ରାୟ ୨୫ ହଜାର ମେଧାବୀ ଛାତ୍ରଛାତ୍ରୀଙ୍କୁ ପ୍ରତି ବର୍ଷ ମେଧାବୃତି ଦେଇଥାଏ । ୭୦ ପ୍ରତିଶତରୁ ଅଧିକ ମାର୍କ ରଖିଥିବା ଛାତ୍ର ଓ ୬୦ ପ୍ରତିଶତରୁ ଅଧିକ ମାର୍କ ରଖୁଥିବା ଛାତ୍ରୀମାନେ ଏହି ମେଧାବୃତି ପାଇଥାନ୍ତି । ଓଡ଼ିଶା ସରକାର ଓଡ଼ିଶା ନଲେଜ୍ କର୍ପୋରେସନ୍ ବା ଓକେସିଏଲକୁ ଟଙ୍କା ବାଂଟିବାକୁ ଦାୟିତ୍ୱ ଦେଇ ଦୁର୍ନୀତି ଓ ଠକେଇକୁ ବଢ଼ାଇଦେଇଥିଲେ । ଓକେସିଏଲ୍, ଉଚ୍ଚ ଶିକ୍ଷା ବିଭାଗର କିଛି ଅଧିକାରୀ ଓ ବ୍ୟାଙ୍କ୍ ଅଧିକାରୀଙ୍କ ଅସାଧୁ ମେଂଟ ଯୋଗୁଁ ପ୍ରାୟ ୫୦ କୋଟି ଟଙ୍କାର ଘୋଟାଲା ହୋଇଛି ବୋଲି ସେତେବେଳେ ସୂଚନା ଅଧିକାର କର୍ମୀମାନେ ଅଭିଯୋଗ କରିଥିଲେ ।