ପୁଣି ବିବାଦରେ ମୟୂରଭଞ୍ଜ ସେଂଟ୍ରାଲ୍ କୋ-ଅପରେଟିଭ୍ ବ୍ୟାଙ୍କ ! ଓ.ଟି.ଏସ୍. ଆଳରେ ଲୋନୀଙ୍କୁ ମାତ୍ରାଧିକ ଅନୁକମ୍ପା ଦିଆଯାଇଥିବା ଦର୍ଶାଇଲା ବ୍ୟାଙ୍କ ଅଡିଟ୍ ରିପୋର୍ଟ
କନକ ବ୍ୟୁରୋ : ପୁଣି ବିବାଦରେ ମୟୂରଭଞ୍ଜ ସେଣ୍ଟ୍ରାଲ୍ କୋ-ଅପରେଟିଭ୍ ବ୍ୟାଙ୍କ । ଓ.ଟି.ଏସ୍. ଆଳରେ ଲୋନୀଙ୍କୁ ମାତ୍ରାଧିକ ଅନୁକମ୍ପା ଦେଖାଯାଇଥିବା ବ୍ୟାଙ୍କର ଅଡିଟ୍ ରିପୋର୍ଟରେ ଦର୍ଶାଇଛି । ଗୁରୁତ୍ୱପୂର୍ଣ୍ଣ କଥା ହେଉଛି ବ୍ୟାଙ୍କ ସଭାପତିଙ୍କୁ କ୍ଷମତାଚ୍ୟୁତ କରିବାକୁ ଅଡିଟ୍ ରିପୋର୍ଟରେ ନିର୍ଦ୍ଦେଶ ଦିଆଯାଇଛି । ମୟୂରଭଞ୍ଜ ସେଣ୍ଟ୍ରାଲ୍ କୋ-ଅପରେଟିଭ୍ ବ୍ୟାଙ୍କର ବାରିପଦା ଶାଖାରେ ୮ଜଣ ଲୋନୀଙ୍କୁ ଅନୁକମ୍ପା କରି ୪୫ଲକ୍ଷ ୫୦ହଜାର ଟଙ୍କା ଦିଆଯାଇଥିବା ଗତ ୧୧ତାରିଖରେ ଆସିଥିବା ଚିଠିରେ ଦର୍ଶାଯାଇଛି । ଓ.ଟି.ଏସ୍. ମାଧ୍ୟମରେ ଲୋନୀଙ୍କୁ ଏହି ଟଙ୍କା ଅନୁକମ୍ପାମୂଳକ ଭାବେ ଛଡାଯାଇଥିବା ବେଳେ ଅଡିଟ୍ ରିପୋର୍ଟରେ ଭୁଲ୍ ଦର୍ଶାଯାଇଥିବା ନେଇ ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
ଏହି ଦୁର୍ନୀତି ଘଟଣାରେ ବ୍ୟାଙ୍କର ବର୍ତ୍ତମାନର ସଭାପତି ରାଜକିଶୋର ଆଚାର୍ଯ୍ୟା, ତତ୍କାଳୀନ ଚିଫ୍ ଏକଜିକ୍ୟୁଟିଭ ଅଫିସର ହରିଶଚନ୍ଦ୍ର ଦାସ ଏବଂ ବ୍ରାଂଚ ମ୍ୟାନେଜର ପ୍ରଶାନ୍ତ କୁମାର ସିଂବାବୁଙ୍କୁ ସର୍ଚାର୍ଜ ପ୍ରସିଡିଙ୍ଗ ପାଇଁ ଏହି ରିପୋର୍ଟରେ ଦର୍ଶାଯାଇଛି । ଏହା ସହ ଏମାନଙ୍କ ଠାରୁ ୪୫ଲକ୍ଷ ୫୦ହଜାର ୨୨୦ ଟଙ୍କା ସହ ୧୨ ପ୍ରତିଶତ ସୁଧ ଆଦାୟ କରିବା ପାଇଁ ନିର୍ଦେଶ ରହିଛି । ଗୁରୁତ୍ୱପୂର୍ଣ୍ଣ କଥା ହେଉଛି ବ୍ୟାଙ୍କ ସେକ୍ସନ୍ ୨୮(୩), ଓ.ସି.ଏ. ଆକ୍ଟ ୧୯୬୨ ଅନୁଯାଇ ବ୍ୟାଙ୍କର ସଭାପତିଙ୍କୁ କ୍ଷମତାଚ୍ୟୁତ କରିବାକୁ ମଧ୍ୟ ଚିଠିରେ ଉଲ୍ଲେଖ ରହିଛି । ବ୍ୟାଙ୍କର ବର୍ତମାନ କାର୍ଯ୍ୟନିର୍ବାହୀ ଅଧିକାରୀ ଏସବୁ କଥାକୁ କ୍ୟାମେର ସାମ୍ନାରେ ମାନିଥିବା ବେଳେ ଏନେଇ କାର୍ଯ୍ୟାନୁଷ୍ଠାନ ପାଇଁ ଅଡିଟର୍ ଜେନେରାଲ୍ କୋ-ଅପୋରେଟିଭ୍ ସୋସାଇଟିକୁ କ୍ଲିୟାରେନ୍ସ ମାଗିଥିବାର କହିଛନ୍ତି ।