ମାଟ୍ରିକରେ ମାତ୍ ଦେଲେ ଝିଅ ! ପୁଅଙ୍କୁ ପଛରେ ପକାଇ ମାରିଲେ ବାଜି
କନକ ବ୍ୟୁରୋ : ପୁଣି ପୁଅଙ୍କୁ ପଛରେ ପକାଇଲେ ଝିଅ । ଆଜି ପ୍ରକାଶ ପାଇଥିବା ମାଟ୍ରିକ ପରୀକ୍ଷା ଫଳରେ କିଛି ଏଭଳି ଧାରା ଲକ୍ଷ୍ୟ କରାଯାଇଛି । ୨ ଲକ୍ଷ ୪୭ ହଜାର ୯୪୮ ଜଣ ଛାତ୍ର ପାସ କରିଥିବା ବେଳେ ୨ ଲକ୍ଷ ୫୫ ହଜାର ୫୧ ଜଣ ଛାତ୍ରୀ ଉତୀର୍ଣ୍ଣ ହୋଇଛନ୍ତି । କିନ୍ତୁ ୬ ଲକ୍ଷ ପରୀକ୍ଷାର୍ଥୀଙ୍କ ମଧ୍ୟରୁ ମାତ୍ର ୨ହଜାର ୪ଶହ ପରୀକ୍ଷାର୍ଥୀ ୯୦ ପ୍ରତିଶତ ଉପରେ ମାର୍କ ରଖିପାରିଛନ୍ତି । ତେବେ ଗୁରୁତ୍ୱପୂର୍ଣ୍ଣ କଥା ହେଉଛି, ଓଡିଶାର ପଛୁଆ ଜିଲ୍ଲା କୁହାଯାଉଥିବା ଦେବଗଡରେ ଏଥର ଛାତ୍ରଛାତ୍ରୀ ସାରା ରାଜ୍ୟକୁ ପଛରେ ପକାଇ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଦେଶର ସବୁଠୁ ପଛୁଆ ଜିଲ୍ଳା ଭିତରେ ଅନ୍ୟତମ ଏହି ଜିଲ୍ଳା ଦେଓଗଡ ଆଜି ପ୍ରମାଣିତ କରିଛି ଯେ ଜିଲ୍ଳା ପଛୁଆ ହେଲେ ବି ଏଠାକାର ଛାତ୍ରଛାତ୍ରୀମାନେ ସବୁଠାରୁ ଆଗୁଆ । ଆଜି ପ୍ରକାଶ ପାଇଥିବା ମାଟ୍ରିକ ପରୀକ୍ଷା ଫଳରେ ଏହି ଜିଲ୍ଳାରୁ ସବୁଠାରୁ ଅଧିକ ସଂଖ୍ୟାରେ ୯୬ ଦଶମିକ ୪୯ ପ୍ରତିଶତ ଛାତ୍ରଛାତ୍ରୀ ପରୀକ୍ଷାରେ ସଫଳ ହୋଇଛନ୍ତି । ଆଉ ଏହା ପଛକୁ ରହିଛି ବାଲେଶ୍ୱର , ଯେଉଁଠି ୯୩ ଦଶମିକ ୩୨ ପ୍ରତିଶତ ପରୀକ୍ଷାର୍ଥୀ ଉତୀର୍ଣ୍ଣ ହୋଇଛନ୍ତି ।
ଚଳିତବର୍ଷ ମୋଟ ୬ ଲକ୍ଷ ୮ ହଜାର ପରୀକ୍ଷାର୍ଥୀ ମାଟ୍ରିକ ପରୀକ୍ଷା ଦେଇଥିଲେ । ସେମାନଙ୍କ ମଧ୍ୟରୁ ପାସ କରିଛନ୍ତି ୪ ଲକ୍ଷ ୮୫ ହଜାର ୯୮୯ ଜଣ । ଏମାନଙ୍କ ମଧ୍ୟରୁ ଏ ୱାନ ଗ୍ରେଡରେ ଅର୍ଥାତ ୯୦ ପ୍ରତିଶତରୁ ଅଧିକ ମାର୍କ ରଖିଛନ୍ତି ୨୪୧୬ ଜଣ ଛାତ୍ରଛାତ୍ରୀ । ସେହିପରି ଏ ଟୁ ଗ୍ରେଡ ଅର୍ଥାତ ୮୦ ପ୍ରତିଶତରୁ ଅଧିକ ମାର୍କ ରଖିଛନ୍ତି ୨୩, ୪୯୦ ଜଣ ଛାତ୍ରଛାତ୍ରୀ, ବି ୱାନ ଅର୍ଥାତ ୭୦ ପତିଶତରୁ ଅଧିକ ମାର୍କ ରଖିଛନ୍ତି ୬୨, ୧୯୩ ଜଣ ଓ ବି ଟୁ ଅର୍ଥାତ ୬୦ ପ୍ରତିଶତରୁ ଅଧିକ ୬୧ ଲକ୍ଷ ୨ ହଜାର ୩୯୫ ଜଣ ଛାତ୍ରଛାତ୍ରୀ ପାସ କରିଛନ୍ତି ।
ରାଜ୍ୟର ମାଓ ପ୍ରବଣ ଜିଲ୍ଳା ମାଲକାନଗିରିରେ ସବୁଠାରୁ କମ ପ୍ରତିଶତ ଛାତ୍ରଛାତ୍ରୀ ପାସ କରିଛନ୍ତି । ପ୍ରାୟ ପ୍ରତି ସପ୍ତାହରେ କିଛି ନା କିଛି ମାଓ ହିଂସାର ଖବର ଆସୁଥିବା ଏଇ ଜିଲ୍ଳାରେ ସ୍କୁଲ ପାଠପଢା ବି ବ୍ୟାଘାତ ହୋଇଥିବାର ସଂକେତ ମିଳୁଛି ।
କିନ୍ତୁ ମାଓପ୍ରବଣ ଜିଲ୍ଲା କୋରାପୁଟ ଓ ନୂଆପଡାରେ ଛାତ୍ରଛାତ୍ରୀ ବେଶ ଭଲ ରେଜଲ୍ଟ କରିଛନ୍ତି । କୋରାପୁଟରେ ପାସହାର ୯୨.୫୦ ପ୍ରତିଶତ ଓ ନୂଆପଡାରେ ୯୧.୪୪ ପ୍ରତିଶତ ଛାତ୍ରଛାତ୍ରୀ ପାସ କରିଛନ୍ତି ।ଏପରିକି ଖୋର୍ଦ୍ଧା ଏବଂ ବଲାଙ୍ଗୀରର ପାସହାରଠାରୁ ଏଠାରେ ଅଧିକ ଛାତ୍ରଛାତ୍ରୀ ପରୀକ୍ଷାରେ ଭଲ କରିଛନ୍ତି ।
ମାଟ୍ରିକ ପରୀକ୍ଷା ଜଣେ ଛାତ୍ର କିମ୍ବା ଛାତ୍ରୀଙ୍କ କ୍ୟାରିୟର ଏକ ମହତ୍ୱପୂର୍ଣ୍ଣ ମୋଡ ବୋଲି ବିଚାର କରାଯାଏ । କାରଣ ଏହିଠାରୁ ହିଁ ଆରମ୍ଭ ହୁଏ ଉଚ୍ଚ ଶିକ୍ଷାର ଅଭିଯାନ । କିନ୍ତୁ ଏହା ବି ସତ ଯେ ଏଥିରେ ବିଫଳତା ଜଣକର ଇଛା ଶକ୍ତିକୁ ଦୁର୍ବଳ କରିପାରିବ ନାହିଁ । କାରଣ ଆଗକୁ ଆହୁରୀ ଅନେକ ସମ୍ଭାବନା ରହିଛି ।