ଅମିତାଭଙ୍କୁ ଦେଖିବାର ଅଜବ ନିଶା ! କ୍ଷୀର ଆଣିବା ପାଇଁ କହି ଦୁଇ ଛୁଆ ଘରୁ ବାହାରିଲେ, ମଥୁରାରୁ ଯାଇ ମୁମ୍ବାଇ ପହଞ୍ଚିଲେ ।
ଦେଶରେ କ୍ରିକେଟର ଏବଂ ସିନେ ତାରକାଙ୍କ ପ୍ରତି ସେମାନଙ୍କ ପ୍ରଶଂସକଙ୍କ ଭଲପାଇବା ବହୁତ ଅଧିକ ରହିଥାଏ । ଏବଂ ବିଭିନ୍ନ ସମୟରେ ଏହାର ଝଲକ ମଧ୍ୟ ଦେଖିବାକୁ ମିଳିଥାଏ । କିନ୍ତୁ ମଥୁରାର ଦୁଇଜଣ ପିଲା ନିଜ ପସନ୍ଦର ହିରୋ ବଲିଉଡର ଷ୍ଟାର ଅମିତାଭ ବଚ୍ଚନ ଏବଂ ଟିମ ଇଣ୍ଡିଆର ଅଧିନାୟକ ବିରାଟ କୋହଲିଙ୍କ ସହ ସାକ୍ଷାତ କରିବା ପାଇଁ ଭଲପାଇବାର ସମସ୍ତ ସୀମା ପାର କରିଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମଥୁରାର ଗୌରା ନଗର ବାସିନ୍ଦା ଜୟଦେବ ଶ୍ରୋତ୍ରିୟଙ୍କ ଦୁଇ ପୁଅ ୧୪ ବର୍ଷୀୟ ଭବେଶ କୁମାର ଏବଂ ୧୦ ବର୍ଷୀୟ ଅମନ ମଙ୍ଗଳବାର କ୍ଷୀର ଆଣିବା ବାହାନା କରି ଘରୁ ବାହାରିଥିଲେ । ଏହା ପରେ ସିଧା ବଲିଉଡ ଷ୍ଟାର ଅମିତାଭ ବଚ୍ଚନଙ୍କ ଘର ଜଲସାରେ ପହଞ୍ଚିଥିଲେ । ଏହି ଦୁଇଜଣ ପ୍ରଥମେ ନିଜ ଘର ପାଖରୁ ଅଟୋ ରିକ୍ସା ନେଇଥିଲେ ଏବଂ ରେଲୱେ ଷ୍ଟେସନରେ ପହଞ୍ଚିଥିଲେ । ଆଉ ଏହା ପରେ ସକାଳ ୮.୩୦ ମିନିଟରେ ମୁମ୍ବାଇ ଯାଉଥିବା ପଞ୍ଜାବ ମେଲ ଟ୍ରେନରେ ବସି ପରଦିନ ସକାଳେ ଛତ୍ରପତି ଶିବାଜୀ ଟର୍ମିନସରେ ଓହ୍ଲାଇଥିଲେ ।
ବୃନ୍ଦାବନର କୋତବାଲି ପ୍ରଭାରୀ କହିଛନ୍ତି ଯେ, ମୁମ୍ବାଇ ପହଞ୍ଚି ଏହି ଦୁଇ ଜଣ ଛୁଆ ସିଧା ଅମିତାଭଙ୍କ ଘର ଜଲସାରେ ପହଞ୍ଚିଥିଲେ । ତେବେ ଅମିତାଭଙ୍କ ସହ ସାକ୍ଷାତ ହେବାରେ ବିଫଳ ହେବା ପରେ ଏହି ଦୁଇ ଜଣ ବିରାଟ କୋହଲିଙ୍କ ଘରକୁ ଯିବା ପାଇଁ ଯୋଜନା କରିଥିଲେ । କିନ୍ତୁ ରାତି ହୋଇଯିବାରୁ ପୁଣି ମଥୁରା ଫେରିବାକୁ ନିଷ୍ପତି ନେଇଥିଲେ । କିନ୍ତୁ ମୁମ୍ବାଇର ବୋରୀବଲୀ ଷ୍ଟେସନରେ ଜିଆରପି ପୋଲିସ ଏହି ଦୁଇଜଣଙ୍କୁ ଧରିନେଇଥିଲା ।
ଏହି ଦୁଇଜଣ ପିଲାଙ୍କ ଠାରୁ ପୁରା କାହାଣୀ ଶୁଣିବା ପରେ ଜିଆରପି ପୋଲିସ ଅଧିକାରୀଜଣଙ୍କ ଫୋନ କରି ତାଙ୍କ ବାପାଙ୍କୁ ମୁମ୍ବାଇ ଡାକିଥିଲେ । ଏବଂ ଏହା ପରେ ଦୁଇଜଣ ନିଜ ବାପାଙ୍କ ସହ ମଥୁରା ଫେରିଆସିଥିଲେ । ଦୁଇଜଣ ଭାଇ ଘରୁ ନିଖୋଜ ହୋଇଯିବା ଘଟଣାରେ ମଥୁରା ସ୍ଥିତ ସେମାନଙ୍କ ଘରେ ଆତଙ୍କ ଖେଳିଯାଇଥିଲା । ଏପରିକି ପୁଅ ନିଖୋଜ ହୋଇଯିବା ଘଟଣାକୁ ନେଇ ପରିବାର ପକ୍ଷରୁ ସ୍ଥାନୀୟ ପୋଲିସ ଷ୍ଟେସନରେ ଏତଲା ଦାୟର କରାଯାଇଥିଲା । କିନ୍ତୁ ପୋଲିସ ସେମାନଙ୍କୁ ଖୋଜିବା ଆଗରୁ ଦୁଇ ଜଣ ମଥୁରା ଫେରିଆସିଥିଲେ ।