କନକ ବ୍ୟୁରୋ : ଆତଙ୍କବାଦୀ ଆଜହାରର ଘୋଷଣା, ଜିହାଦି ସଂଗଠନକୁ ଅନୁମତି ଦିଅ କଶ୍ମୀର ଛଡାଇ ଆଣିବୁ । ସଂଗଠନର ମାଗାଜିନରେ ପାକିସ୍ତାନ ସରକାରଙ୍କ ଉଦ୍ଦେଶ୍ୟରେ ଏଭଳି ଲେଖିଛି ଜୈସ-ଏ-ମହମ୍ମଦ ସଂଗଠନ ମୁଖ୍ୟ । ଆଜହାର କହିଛି, ଭାରତ ବିରୋଧୀ ଆକ୍ରମଣ ପାଇଁ ଜିହାଦି ସଂଗଠନଗୁଡିକୁ ପାକିସ୍ତାନ ସରକାର ଅନୁମତି ଦେଲେ କଶ୍ମୀର ଅଧିକାର କରିବା ଅସମ୍ଭବ ନୁହେଁ ।
Kanak News is now on WhatsApp
Join and get latest news updates delivered to you via WhatsApp
ଆତଙ୍କବାଦୀ ସଂଗଠନ ଜୈସର ସାପ୍ତାହିକ ମାଗାଜିନ ପ୍ରଥମ ପୃଷ୍ଠାରେ ଆଜାହାର ଲେଖିଛି ‘ମୁଜାହିଦ୍ଦିନଙ୍କ ପାଇଁ ପାକିସ୍ତାନ ସରକାର ବାଟ ଖୋଲିଦେଲେ କଶ୍ମୀର ସମସ୍ୟା ଏପରିକି ସିନ୍ଧୁ ନଦୀ ଜଳ ବିବାଦର ସମାଧାନ ସବୁଦିନ ପାଇଁ ହୋଇଯାଆନ୍ତା’ । ‘୧୯୭୧ର ସବୁ ତିକ୍ତ ଅନୁଭୂତି ମଧ୍ୟ ୨୦୧୬ରେ ଖୁସିରେ ପରିଣତ ହୋଇପାରନ୍ତା’ । ‘୧୯୯୦ରେ କଶ୍ମୀରରେ ଜିହାଦ ପରେ ଅନେକ ମାତ୍ରାରେ ପରିବର୍ତନ ଆସିଛି’ । ‘ଜିହାଦ ଫଳରେ ଭାରତ ଏକ ସାପରୁ ଜିଆକୁ ରୂପାନ୍ତରିତ ହୋଇସାରିଛି’ ।
ଆଜହାରର ଏହି ଆଲେଖ୍ୟ ପିକିସ୍ତାନ ସରକାରଙ୍କ ଆତଙ୍କବାଦୀ ସଂଗଠନ ସହ ଭିତିରି ସଂପର୍କକୁ ଉଜାଗର କରିଛି । ୧୯୯୪ର ଶେଷ ଭାଗରେ କଶ୍ମୀରରେ ରହି ଆତଙ୍କବାଦୀ ସଂଗଠନ ଚଳାଉଥିଲା ମୌଲାନା ମାସୁଦ ଆଜହାର । ସେହିବର୍ଷ ଫେବ୍ରୁଆରୀରେ ତାକୁ ଜେଲ ହାଜତକୁ ପଠାଇ ଦେଇଥିଲେ ଭାରତ ସରକାର । ହେଲେ ୧୯୯୯ରେ କାନ୍ଦାହାର ବିମାନ ଅପହରଣ ପରେ ଆଜହାରକୁ ମୁକ୍ତ କରିବାକୁ ବାଧ୍ୟ ହୋଇଥିଲେ । ଏହାପରଠାରୁ ପାକିସ୍ତାନରେ ରହି ଭାରତ ବିରୋଧୀ ଆତଙ୍କବାଦୀ ଆକ୍ରମଣର ଷଡଯନ୍ତ୍ର କରିଆସୁଛି ମାସୁଦ ଆଜହାର ।